Read Bawm Chin THUFING LASUIBU 12 Bible Online

THUFING LASUIBU 12 - Bawm Chin bible

THUFING LASUIBU 12

¹Âuzawng theihnâk sunhsaktu nih chun a dik lo liauah simh leh ruahtu a duh. Umdân dik simhtu rangah huatu chu mi mâwl asi.

²Mi ṭha tla tlûnah LALPA chu â lâwm le, sikhawmsele thilsual ti tumtu tla chu a mawhtir na.

³Sualnâk lakah chun himnâk a um lo. Sikhawmsele mirep chu bir tak hen a tlû.

⁴Nupi ṭha chu a pasal nih a zumh hen a lawmh le, sikhawmsele pasal ningzak saihtu nupi chu a ruh lakah dam kho lo mi mâ hâwi asi.

⁵Mi zumhkâi nih ṭhadektê hen a nan ti lai, misual nih chun nangmah perpet ding lâwng a nan duh lai.

⁶Misual thusim chu mi thah ding lâwng an sim le, mirep nih chun nehsawh hen a um mi tla ruangsuah ding hen thu an sim.

⁷Misual tla chu anmah niamnâk leikâng an tawng le, thlâk tla khawm an nei lo. Sikhawmsele mirep dâwngsung tla chu nungdam hen an um.

⁸Theihthiamnâk nei mi na si chun, sawr na lawh lai le; mi mâwl na si chun, mi nih a nan zauhnawmh lai.

⁹Mi rokual mun ting bâk hen sungvâng hen um ngâk chun, mi rarâu mah nungnâk dingah rianṭuantu chu a ṭha dauh.

¹⁰Mi ṭha nih a ran a zauhkhenh le, sikhawmsele misual nih a thilneih zeikhawm a siarlo.

¹¹Lo hamh tak a rianṭuantu nih ei ding a chawng le, sikhawmsele thil do-tla-lo lakah a hun veihtu chu mi mâwl asi.

¹²Misual tla nih an duh chem mi chu thilsual ti tawng ding an duh le, mirep tla lam chu bir tak hen an dîr.

¹³Misual chu amah thusim nih a awh le, sikhawmsele mi zumhkâi chu nawknâk lakah mi a suak.

¹⁴Na lâwmman ting ding chu na thusim leh na thilti lakah asi, na thilti ziatê hen na tawng lai.

¹⁵Mi mâwl nih chun dik hen anna ruat kumza. Mifing tla lam nih chun krai pêk mi thu an ngâi.

¹⁶Mi mâwl chu â nawk chun a lang sawm. Theihnâk neitu tla nih chun zauhnawmhnâk zeikhawm an siarlo.

¹⁷Thudik na sim chun repnâk thilti asi. Sikhawmsele âwkrâwl nih chun replonâk leikângah a kalpi.

¹⁸Dawnruatnâk neilo mi thusim chu nâmsâu hen thûk tak liamh mi hâwi asi. Sikhawmsele fing tak hen thusim nih a damh kho.

¹⁹Âwkrâwl chu a san a tâwi, thudik lam chu a san a um kumza.

²⁰Sualnâk lei dawntu chu chê tak hen ngaltâunâk asi. Sikhawmsele thil ṭha titu nih lâwptlonâk a tawng lai.

²¹Mirep sinah chun thil ṭhalo zeikhawm a tlung lai lo. Misual lam chu nawknâk cho lo chu zeikhawm a nei lai lo.

²²LALPA nih mi âwkrâwl chu a hua le, a thusim lakah â vêng mi chu a lawmh.

²³Mifing nih chun a thu theih chu dâisip hen a kil ziar. Sikhawmsele mi mâwl tla nih an mâwlnâk an langh.

²⁴Rianṭuan hamhnâk nih thiltikhonâk a rian pêk lai le, zângzêtnâk nih sal ah a nan siam lai.

²⁵Lâwmnâk chu lawksawngnâk nih a veih kho. Sikhawmsele vêlneihnâk thusim nih a nan lawmhtir lai.

²⁶Mirep chu a hâwipa rangah ruaitu asi. Sikhawmsele misual lampi nih chun vâinâk leiah a kalpi na.

²⁷Na zângzê chun zeikhawm hi nûnthâi ah na tawng lai lo le, sikhawmsele hamh tak hen rian na ṭuan chun vânṭhatnâk na tawng lai.

²⁸Repnâk chu nungnâk lampi asi le, sualnâk chu thihnâk leiah kalnâk lampi asi.