Read Bawm Chin THUFING LASUIBU 13 Bible Online

THUFING LASUIBU 13 - Bawm Chin bible

THUFING LASUIBU 13

¹Fapa fing nih a pa nunsimh a ngâi. Sikhawmsele mi â zûm mi nih chun mawh hen â ruat lo.

²Mi ṭha tla chu an thusim ah lâwmman pêk hen an um lai. Mi perpê lam chu an thilti diklo ruangah sungvâng hen an um lai.

³Na thusim ah a thiamthih le, na nungnâk hum rawh. Nabeibâng hen hawlhtu chu amah râwknâk a siam.

⁴Mi zângzê nih zeizat tal thil duh khawmsele a tawng lêm lo. Hamh tak hen rianṭuantu nih zeizawng a tawng.

⁵Mi zumhkâi nih âwkrâwl an hua le, sikhawmsele misual thusim chu ningzaknâk leh mualphonâk asi.

⁶Repnâk nih thilsual tilotu rangah a hum le, sualnâk lam chu misual tla niamnâk asi.

⁷Zeimaw mi chu minei hâwi hen anna tuah le, sikhawmsele zeikhawm an nei lo. Midang nih mipâm hâwi anna tuah le, sikhawmsele vânṭhatnâk anna ting.

⁸Minei nih a nungnâk hum ding hen tangka mang ding a nei le, sikhawmsele mipâm chu âukhawm nih an ṭhih lo.

⁹Mirep chu chêu tak hâwi asi. Misual tla chu khâwnvâr a mit awt mi hâwi an si.

¹⁰Mi â zûm mi nih nawknâk cho lo chu zeikhawm a tuah lo. Krai khâi chu fingh dauhnâk asi.

¹¹Awldek hen neih chu rang tak hen veihnâk asi. Hamh dauh hen hâwl chu tam dauh tawngnâk asi.

¹²Lungumnâk â râwk chun, thinlung khawm â râwk. Sikhawmsele duhnâk dik nih chun lâwmnâk hen thinlung a khattir.

¹³Krai pêk na duh lo chun, nawknâk na hauh mi asi. Zûl le, na him lai.

¹⁴Mifing sîntirnâk chu nungnâk tinungva asi. Na nungnâk rangah ṭihnung a kâi liauah ruangsuah ding hen an ṭangpi lai.

¹⁵Mifing nih zahnâk a lawh le, sikhawmsele, zumh an kâi lo mi chu veihnâk lampi ah an um.

¹⁶Theihthiamnâk nei mi nih chun, thil a ti lânah a ruat tâ kumza. Sikhawmsele mi mâwl nih chun an âtnâk an phuang.

¹⁷Thu thanhtu zumhkâilo nih nawknâk a tlungtir. Sikhawmsele mi zumhkâi nih chun thlangamnâk a hawng put.

¹⁸Mi zeimaw mi sîn lotu chu a pâm hen a mualpho lai. Nunsimhnâk ngâitu chu zah a kâi.

¹⁹Na duh mi na tawng mi chu thungâi a ṭha! Mi mâwl nih chun sualnâk kaltâk ding a duh lo.

²⁰Mifing tla kawmh le, na fing lai. Mi mâwl hâwikawmh ah na siam chun na vâi lai.

²¹Misual chu mun kipah nawknâk nih a zûl. Sikhawmsele mirep tla chu thil ṭha hen lâwmman pêk asi lai.

²²Mi ṭha nih a tu tla rangah a neih a roh lai. Sikhawmsele misual tla neihnâk chu mirep nih â ting lai.

²³Manglo mi phâisen nih mipâm rangah buh tamtak a suah kho le, sikhawmsele mirualo tla nih nâwn ding an khap.

²⁴Na fapa na rêp lo thlo chun na dâwt lo mi asi. Na dâwt mi asi chun, nun na simh ding asi.

²⁵Mirep nih khawp hen ei ding a nei le, sikhawmsele misual chu a sungvâng kumza.