Read Bawm Chin THUFING LASUIBU 16 Bible Online

THUFING LASUIBU 16 - Bawm Chin bible

THUFING LASUIBU 16

¹Thiltum tla kan nei kho le, sikhawmsele a dawnghnâk ah chun Pathian nget kan sim.

²Na thilti zeizawng chu dik na ti kho le, sikhawmsele, na thinlung ruat chu LALPA nih a zauhdik.

³Na thiltum tla lakah LALPA malsâwmnâk deih le, na ti tikah dingchangnâk na tawng lai.

⁴LALPA nih thil a siam mi zawzawng hi dawnghnâk a nei le, misual tla dawnghnâk chu siatnâk asi.

⁵LALPA nih â zûm mi zawzawng chu a hua le, rêp lo hen a zuah na lai lo.

⁶Zumh tlâk leh rinh tlâk hen um le, Pathian nih na sual a ngaihdam lai. LALPA thu ngâi le, na lakah thilsual zeikhawm a tlung lai lo.

⁷LALPA na lawmhtir chun, na mêlma khawm hâwikawmh ah na siam kho na lai.

⁸Diklo tak hen cherkhet tawng ngâk hen, dik tak hen tâwmtê tawng aṭha dauh.

⁹Thiltum na nei kho le, sikhawmsele na thilti chu Pathian ruat nget asi.

¹⁰Lal nih Pathian hâwi hen thunei hen thu a sim le, a thu thlûk chu a dik kumza.

¹¹LALPA nih khinghnâk leh tahnâk chu zumhkâi tak leh ṭha tak ding hen a duh.

¹²Lal tla nih sualnâk chu an sâithiam lo, lâirêlnâk chu diknâk hen chaktir asi ruangah.

¹³Lal nih thudik theih a duh le, a simtu khawm a sunhsak.

¹⁴Mifing nih lal lawmhtir ding a tum lai le, lal a thinrun chun mi zeimaw mi rangah thihnâk asi.

¹⁵Lal sunhsaknâk chu ruahtîr liauah ruah sûrtirtu vândâwm hâwi asi. Chunah chun nungnâk a um.

¹⁶Ngûn leh tangka ngâk hen, finghnâk leh theihnâk neih chu a ṭha tuktarâi.

¹⁷Lampi ṭha ah kal mi nih chun sual a kaltâk. Churuang chun a zei mi lakah na kal awt dauh a ruat set, na nungnâk a hum kho lai.

¹⁸Zumhnâk nih chun siatnâk ah a kalpi, putsonâk chu niamnâk asi.

¹⁹Mi zûm pakhat si hen an thilneih lakah vo va nei ngâk hen chun nâu tak leh pâm tak hen um chu a ṭha dauh.

²⁰An sîntir mi chu ṭhadektê ngâi le, na dingchang lai. LALPA chu zumh le, na lâwm lai.

²¹Mifing, mi kum tling chu thil a theihthiamnâk ruangah theih asi. A thu a ṭha bilik leh amah an zûl zia a fâk.

²²Mifing rang chun finghnâk hi nungnâk tikhur asi. Sikhawmsele, mi mâwl sîntir chu tik a thawt salam asi.

²³Theihthiamnâk nei mi nih thu an sim lânah an dawnkan tâ tâwn le, an sim rawh chun zûl tlâk hen a um.

²⁴Vêlneihnâk thu chu khuaitizû hâwi asi. Na tem chun a thlum lai le, na rangah ṭhiselnâk asi lai.

²⁵Lampi dik hâwi hen na ruat mi chu thihnâk leikângah kal mi asi kho.

²⁶Rianṭuantu buh-kâ thâwtnâk nih rianṭuan a chaktir. A sungvanghnâk a khimtir ruangah.

²⁷Misual tla nih chun midang rangah nganfâk pêk ding lei karo an hâwl. An thusim khawm sual hep asi.

²⁸Misual tla nih chawngawihnâk thu an zanh le, nawknâk an tuah le, hâwikawmh tla khawm a ṭhentir.

²⁹Mi râwktu tla nih an hâwi le an perpet na le, siatnâk leiah an kalpi tâwn.

³⁰Nangmah rangah lipha hen zei siarlo tak hen an zauhtu chu zauh set. Thil diklo zeimawh an dawn mi asi.

³¹Sansâunâk hi mirep lâwmman asi. Sam pâr hi rokualnâk lallukhuh asi.

³²Thiltikhonâk ngâk hen dawnhkhonâk a ṭha dauh. Khuapi na neh mi ngâk hen nangmah na sûm kho mi a ṭha dauh.

³³Pathian duhzia theih ding hen mi nih chamchawhnâk an siam le, sikhawmsele Pathian nih sâng ding a tum rerêng asi.