Read Bawm Chin THUFING LASUIBU 19 Bible Online

THUFING LASUIBU 19 - Bawm Chin bible

THUFING LASUIBU 19

¹Mi mâwl âwkrâwl simtu ngâk hen mipâm zumhkâi tak mi si a ṭha dauh.

²Mi thanuam krai thiamlo chu a ṭha lo. Sûm kholonâk nih nawknâk a umtir.

³A zeimaw mi chu an thilti mâwl ruangah an siat phah le, churawhchun LALPA an sâwi.

⁴Minei tla nih hâwikawmh thar an tawng vima, sikhawmsele mipâm nih a neihlem a khiar kho lo.

⁵Lâirêlnâk ah âwkrâwl thu na sim chun, rêp hen na um lai le, suak kho asi lai lo rawh.

⁶Mikip nih mi pawimawh nih sunhsak hen um an duh le, mi sunhsak mang tla hâwikawmh si ding hen thu an sim.

⁷Mipâm chu a unau tla khawm nih an ṭangpi duh lo. Hâwikawmh a neilo mi chu a chê lo. Zeikhawm neh ṭung lo hen hamh tak hen ti tum chu a ṭha lo.

⁸Nangmah tak kha na ti kho ri hen mi sunhsaktu ah um le, na thiltum chu theihkumza le, na sul-le-lam a tluang lai.

⁹Lâirêlnâk ah âwkrâwl thu sim chu âukhawm rêp lo hen an âwl lo le, mi vânduai an si.

¹⁰Mi mâwl chu nuamchênnâk ah a um ding asi lo. Sal khawm nih milian tla tlûnah lâi a rêl ding asi lo.

¹¹Theihthiamnâk nei mi na si chun, na thinthawknâk ah na sûm kho lai. Mi âu nih mawh diklo hen an ngaih liauah ngaihlo lêm thlâk piak chu mi fâifîm umdân asi.

¹²Lal thinthawknâk chu chakeibaknei hûk hâwi asi. Sikhawmsele a mi sunhsaknâk chu ruah lawmhkâi tak hâwi asi.

¹³Fapa rualo nih a pa siatnâk a tlungtir. Nupi chipchiar mang chu tî a zut lemang mi hâwi asi.

¹⁴Mi nih a nu leh a pa in leh neih-leh-siah chu a thâwn kho. Sikhawmsele LALPA cho nih nupi fing a pêk kho.

¹⁵Na duh chun zângzê tak hen um le, it kumza ko; na sung a vâng nget lai.

¹⁶Pathian dân zûl le, na san a sâu lai; na thlawrhthlâu chun na thi lai.

¹⁷Mipâm sinah thil na pêk mi chu LALPA rangah na lângtir mi asi le, LALPA nih a nan rulh nawlh lai.

¹⁸Theihthiam ding hen nunsimh ding tâwk an si liauah na fa tla nun simh rawh. Nun na simh duhlo mi asi chun, anmah râwk ding hen na ṭangpi na mi hâwi asi.

¹⁹Mi a thintâwi mi chu amah nih tuar ko seh. Veikhat nawknâk ah mi na suah kho chun na ti nawlh ding asi lai.

²⁰Krai pêk na ngâi hen zûl ding na duh chun zei tikah mawh chun na fing nget lai.

²¹Mi nih thil zeizawng ti ding hen tumnâk an nei kho, sikhawmsele LALPA duhzia hâwi hen ti asi lai.

²²Duhlei hamkah chu ningzaknâk asi. Mi âwkrâwl thusim ngâk hen mipâm chu a ṭha dauh.

²³LALPA thu ngâi le, na sân a sâu lai le, lungâwi hen nganfâk lakah mi an hum lai.

²⁴Zeimaw mi chu an zângzê tuk le, an kâ ah buh bar ding men an huam lo.

²⁵Zauhnawmh mang chu rêp hen a um lai le, zeikhawm theih loh mi tla nih theihthiamnâk ah an mang kho lai. Na fing chun nun a nan simh liauah na theihthiam lai.

²⁶Mi nih a pa a nehsawh hen a in ah mi a nu a nar chun mualpho leh ningzaknâk asi.

²⁷Ka fapa, sîntirnâk na duh lo hen na thlawrhthlâu chun, na theih chia tla khawm na thlawrhthlâu lai.

²⁸Theihpitu nih âumawh nganfâktir a tumnâk ah chun lâirêlnâk dik a um lo. Misual nih chun sualnâk ti ding an duh.

²⁹Mi mâwl mah thu thu hen um tumtu chu mah vuakfung a hâwl mi asi ti theih chia asi.