Read Bawm Chin THUFING LASUIBU 2 Bible Online

THUFING LASUIBU 2 - Bawm Chin bible

THUFING LASUIBU 2

¹Ka fapa, ka nan sîntir mi chu châwng le, ti ding hen thu ka nan simh mi chu philh rîlmâl lah.

²Finghnâk zei asi, ngâi le, theihthiam ding a tum rawh.

³Asi, theihnâk chu deih le, muh ding hen ngiar.

⁴Tangka leh ro na hâwl mi hâwi hen hâwl.

⁵Chu hâwi na ti chun, LALPA ṭih ding dân na theih lai le, Pathian leikâng thu na theih lai.

⁶Finghnâk pêktu chu LALPA asi le, theihnâk leh theihthiamnâk chu amah thawk hen mi asi.

⁷Ṭangpinâk a pêk le, mirep zumhkâi rangah a hum na.

⁸Midang tla rangah ṭhadektê hen titu tla chu a hum na le, amah sinah â pêk mi tla chu a vêng na.

⁹Ka thu na ngâi mi asi chun, diknâk, repnâk, ṭhatnâk zei asi na theih lai. Na thilti ding mi tla khawm na theih lai.

¹⁰Na hawng fing lai le, na theihnâk nih a nan lawmhtir lai.

¹¹Na muhnâk leh na theihthiamnâk nih a nan vêng lai le,

¹²thil diklo ti ding mi lakah a nan hum lai. An thusimnâk ah mi nawktirtu tla leh

¹³sual mûi ah um mi hen repnâk umdân kaltâktu tla,

¹⁴sual thilti nuam titu tla leh zeikhawm theihlo misual nâwngah nuam ti mi tla,

¹⁵zumhkâilo mi leh rinhtlâklo mi minung tla lakah mi chu a nan vêng lai.

¹⁶Nunau hawlhkâ nêm tak hen a nan lêmtu thinlung chu na do kho lai.

¹⁷Chubang hâwi nunau tla chu an pasal tla lakah zumhkâilo, an thutiam thenhlimh philhtu tla an si.

¹⁸A in ah na kal mi asi chun, thihnâk lei lampi ah na kal mi asi. Chunah kalnâk nih chun laikulh thihnâk leikâng kalnâk asi.

¹⁹Chu nunau sinah kaltu chu a kîr dah loh. Nungnâk lampi leiah a hawng kîr dah loh.

²⁰Churuang chun mi ṭha zûn na zauh hen, mirep umdân châwng le, rep tak hen um rawh.

²¹Mirep tla, mi rangtling tla chu kan ram ah hin an um lai.

²²Sikhawmsele, Pathian nih misual tla chu ram lakah mi a tleih lai le, tual ah belh a phâwi mi hâwi hen ram lakah mi chu a lâk ving na lai.