Read Bawm Chin THUFING LASUIBU 21 Bible Online

THUFING LASUIBU 21 - Bawm Chin bible

THUFING LASUIBU 21

¹LALPA nih tiva duh duh hen a luangtir mi hâwi hen lal thinlung khawm a siam kho.

²Thil zeizawng na ti mi vial dik hen na ngaih kho. Sikhawmsele na thilti lakah LALPA nih lâi a rêl ti theih.

³A dik hen a ṭha mi bâwlnâk ngâk hen LALPA lawmhtirnâk chu ti rawh.

⁴An perpetnâk leh an mi siarlonâk nih misual tla chu neh hen an um lai le, chu hâwi chu sualnâk asi.

⁵Thiamthih tak hen thilti tum le, tamtak na nei lai. Na nam tuktarâi chun na tawng mi a tam tâwk dah lai loh.

⁶Zumhkâilo hen neihnâk na ting mi chu a vei sawm lai. Sikhawmsele thihnâk na tawng lânah asi lai.

⁷Misual chu anmah sualnâk ruangah vânduai an tawng lai le, thil dik ti an duh lo asi.

⁸Misual tla chu lam ngâwi lakah an kal le, thilsual tilotu nih thil dik an ti.

⁹Nupi râng mang ngâk hen in ah um mi ngâk hen in tlûnah um a ṭha dauh.

¹⁰Misual tla nih thilsual ti an duh kumza, âu tlûn khawmah khua an ruat lo.

¹¹Zauhnawmh mang tla nih rêpnâk an tawng le, zeikhawm ruatdawnnâk neilo mi minung khawm nih zûnzauh ding an nei. Mifing nih a sînnâk thawk hen a theihnâk a nei lai.

¹²Pathian, mirep pakhat, amah nih misual insungkhur umdân chu a theih. Misual chu siatnâk ah a kalpi lai.

¹³Mipâm tla ṭap hâu ngâi ding na duhlo mi asi chun, na âu hâu mi âukhawm nih an ngâi piak lai lo.

¹⁴Na lakah âumawh a thinthawk chun, a thup hen thil zeimawh pêk le, chu nih a rehtir lai.

¹⁵Rep tak hen thilti asi liauah mi ṭha tla anna lâwm le, sikhawmsele misual tla chu lungdawng ding hen an hawng put.

¹⁶Theihnâk ṭha kaltâktu zawng chu thihnâk nih a ngâk na.

¹⁷Nuamchênnâk, zû leh tî-le-râwl thaw nih neihnâk a siam dah lo.

¹⁸Mi ṭha rangah misual tla nih tuartir na ding anna tum mi chu anmah tlûnah a tlâ.

¹⁹Nupi râng mang hen um ngâk hen, ramkaro ah kal ving a ṭha dauh.

²⁰Mifing chu nei tak leh nuam tak hen an um. Sikhawmsele mi mâwl tla nih chun an tawng zia zia hen an tangka an veih.

²¹Vêlnei tak leh zumhkâi hen um le, na san a sâu lai; midang nih a nan zah lai le, ṭhadektê hen an ti lai.

²²Ruitu fing nih mi chak nih khuapi an vêng mi a lâk kho, anna rinhsanh mi kulh an râwk kho.

²³Nawknâk lakah um na duh lo chun na thusim lakah a thiamthih.

²⁴Perpet mang mi hawng ka muhtîr le, mizûm leh â putso mi leh zeikhawm ruatnâk neilo mi ka nan muhtir lai.

²⁵Mi zângzê rianṭuan duhlotu chu amah â thah mi asi.

²⁶A thil dawn zawzawng chu nei sele a duh mi thil ver asi. Mirep nih chun zeiliau zawngah siang tak hen thil a pêk kumza kho.

²⁷Misual nih thilsual an tinâk ah mi mang hen bâwlnâk an pêk mi chu LALPA nih a hua.

²⁸Mi âwkrâwl thusim chu lung tlâk asi lo. Sikhawmsele, âumawh thu dawn sesettû chu pawm asi.

²⁹Mirep tla nih chun anmah lakah theihthiamnâk an nei. Misual tla nih chun an ti kho rirî hen perpet ding an tum.

³⁰Minung finghnâk leh chaknâk leh muh khonâk hi LALPA a um lo chun zeikhawm asi lo.

³¹Râltuk ding tîm chia zet hen rang tla nei khawm le, nehnâk lam chu LALPA tâ asi.