Read Bawm Chin THUFING LASUIBU 22 Bible Online

THUFING LASUIBU 22 - Bawm Chin bible

THUFING LASUIBU 22

¹Neih-le-siah leh minṭhatnâk na thîm awt chun minṭhatnâk thîm rawh.

²Minei leh mipâm chu anna bang cho, LALPA siam vevê mi an si.

³Theihthiamnâk neitu nih chun nawknâk a tlung ding mi a muh hen â phelh sawlh ving. Sikhawmsele, dawnruatnâk neilo mi minung nih a tâwn sut lai le, a nehnûn chun a lawksawng lai.

⁴LALPA lakah ê-aw ngâi le, nâu tak hen um rawh. Neih-le-siah hen zahkâi tak hen na um lai le, na san a sâu lai.

⁵Nung ding na duh chun misual tla thang hen tleih hen an sinah mi chu a kiang rawh.

⁶Ngâksia chu a umdân ding sîntir le, a dam sung zawzawng ah a theihkumza lai.

⁷Mipâm chu minei sal an si. Tangka pûktu chu a pûktirtu sal asi.

⁸Diklonâk chî na tuh chun, siatnâk a hawng um lai le, midang rangah na nâunehnâk a dawng lai.

⁹Hawk le, mipâm rangah na buh ṭhenh na. Na ṭhenh na mi ruangah malsâwm hen na um lai.

¹⁰Mah thu thu hen um tumtu tla lakah a kiang rawh. Chu tikah tawhnâk tla, thu êlnâk, a simsiatnâk a um lai lo rawh.

¹¹Thinlung thenhlimh leh aw-ka nêm duh mi na si chun lal chu na hâwipa asi lai.

¹²Mi âwkrâwl thusim LALPA nih a muh hen a duh lo kâng asi ruangah thudik chu a bir asi.

¹³Mi zângzê nih chun lênglei ka suak chun chakeibaknei nih hawng ka seh lai a ti le, in ah a um ziar.

¹⁴Ṭângdang pâwmnâk chu thang asi. Chu nih a awh na mi tla tlûnah LALPA a thinthawk.

¹⁵Ngâksia tla nih âtkâi tak hen thil tla an ti hen anna thiamthih lo. Nunsimh hen vuaknâk nih lungfîm a suah lai.

¹⁶Minei tla rangah thil na pêk hen, nei ding na duh ruangah a pâm mi tla na nâuneh chun nangmah ngelchel na pâm lai.

¹⁷Mifing tla nih thu an sim mi ka nan sîntir lai, ngâi rawh. An sîntirnâk tla a sîn le,

¹⁸na theihkumza hen na sim singsuan kho chun na lâwm lai.

¹⁹Tuah a nan simh ding hen ka duh mi chu LALPA na ngauhsan thlir ding mi chu asi.

²⁰Na rangah finghnâk thu sâwmthum ka rîn. Chu lakah chun theihnâk leh krai pêknâk a um.

²¹Chu nih thudik chu zei tak asi, a nan sîntir lai. Na hâwl chun sângnâk dik na tawng lai.

²²Na ti kho ruang ko ah mipâm chu nangmah ṭhatphahnâk ah mang lah. Lâirêlnâk ah ṭangpi herh tak chu ṭhatphahnâk rangah mang lah.

²³LALPA nih an rangah an thunawk a dopi lai le, âuzawng anmah ṭhihtu chu a ṭhih na lai.

²⁴Mi thintâwi leh siat-le-râwktu mi perpê chu hâwikawmh ah siam lah.

²⁵Anmah zia na châwng lai le, lêt kho na si lai lo rawh.

²⁶Mi bat lakah nangmah mawhphurh ding hen thu a tiam lah.

²⁷Zeikhawm pêk ding na nei lo chun na ihkhun tiang an lâk ving lai.

²⁸An thlâk natu nih ramri an siam mi chu ṭhial lah.

²⁹Rian ṭha ṭuantu minung chu hawng ka muhtir le, kei khawm nih lal hâwikawmh rangah tlâk mi ṭha chem ngâk a ṭha dauh mi minung ka nan muhtir lai.