Read Bawm Chin THUFING LASUIBU 25 Bible Online

THUFING LASUIBU 25 - Bawm Chin bible

THUFING LASUIBU 25

¹Juda lalchem Hezekiah lâirêlnâk in ah mi tla nih an rîn mi Solomon thufing dang:

²Pathian chu thil a thuh mi ruangah kan zah le, Lal tla nih an simhfiang ruangah kan zah na.

³Lal nih a ruat mi na theih lo le, a thinlung dawn khawm kannih theih phanh asi lo. Vân a sâng mi hâwi leh tisumsumriat a thûk mi hâwi asi.

⁴Tangka chu a nâwmnâk lawnh le, thilsiamtu nih thil dawh a suah kho.

⁵Lal nih krai ṭhalo a nan pêk mi chu lawnh le, a lâirêlnâk chu a diknâk lakah theih asi lai.

⁶Lal mâika ah na dîr chun, a thinlung neh tum lah le, mi pawimawh tak si ding hen a umtir lah.

⁷Na dîrmun pawiherh dauh midang rangah pêk ding hen va simh ngâk hen, mun sâng dauh luah rawh ti a ṭha dauh.

⁸Thil zeimawh na muh ruangah lâirêlnâk in ah kal sawm lah. Midang theihpitu na nehnûnah mi nih na diklo zia a hawng phuang chun zeitin na ti awt rawh?

⁹Nang leh na zâwlbâwm ngaihdân â dang chun, nanmah a thlûk ule, thuthup phuang lah u.

¹⁰Chu hâwi asi lo chun thuthup na kil kho lo ti an theih lai le, ningzaknâk na huhphenh kho lai lo.

¹¹Ngaihdân dik thusim chu, tangkasa lakah ngûn hen ṭialh mi hâwi asi.

¹²Mi theihthiamnâk nei mi nih nunsimhnâk thu ngâi duhtu sinah a sim mi chu, ngûn pizung leh lungmantam ngûn ṭha chem hen siam mi hâwi asi.

¹³Mifial zumhkâi chu a fialtu rangah fâng a zûn liauah a lîn thlo liauah tî dâi hâwi hen thinlung a lawmhtir.

¹⁴Mi pêk ding hen thu tiamh hen pêklotu chu, vândâwm leh thli-ruah sûr lo mi hâwi asi.

¹⁵Dawnhkhonâk nih dotu chak chem leh lâirêltu fing khawm a neh kho.

¹⁶Khuaitizû a leiluat hen din lah le; na ei tam tuk chun na luak lai.

¹⁷Na zâwlbâwm tawih nawh tuk lah, a nan neng chun a nan hua lai.

¹⁸Phiartu diklo chu thihnâk nâmsâu, talhbo mawh feizum hâwi asi.

¹⁹Lawksawng liauah zumh tlâk lo rinhsanh chu habeuh râwl khâi leh kekhêng lam kal hâwi asi.

²⁰Mi ngaihsia sinah lasaktu chu, a dâi liauah nipuan lît piak leh liam mâ lakah chitê chulh hâwi asi.

²¹Na mêlma a sung a vâng chun ei ding pêk le, a tî a hâl chun din ding tî pêk rawh.

²²Ningzak na saih lai le, LALPA nih lâwmman a nan pêk lai.

²³Mârlei thli nih ruah a hawng put mi hâwi hen mi chawngawihnâk nih thinthawknâk a siam.

²⁴Nunau râng mang hen in ah munkhat um mi ngâk hen in tlûnah um ving a ṭha dauh.

²⁵A dawnghnâk ram lât tak thawk hen thu ṭha theih chu, kan dî liau leh tîhâl liauah tî dâi din hâwi asi.

²⁶Mi ṭha nih misual âu rang mawh a sualnâk simhtu chu tikhur râwktu leh tikhurchawh tûr thlahtu hâwi asi.

²⁷Khuaitizû din tam tuk a ṭha lêm lo le, chu hâwi hen sawr lawh ding tum tuktarâi mi chu chu hâwi asi.

²⁸Thinthawknâk sûm kho lo mi na si chun, khuapi kulhnei lo, awng hung hen vêngtu neilo hâwi asi.