Read Bawm Chin THUFING LASUIBU 28 Bible Online

THUFING LASUIBU 28 - Bawm Chin bible

THUFING LASUIBU 28

¹Misual chu âukhawm nih ṭhâwl lo hen a tek. Sikhawmsele mi zumhkâi lam chu chakeibaknei hâwi hen a râl a ṭha.

²Phun tla an sual chun, a nehnûnah lâirêltu dang pakhat an nei nawlh. Sikhawmsele, phun tla chu ruitu fing nih a rui na chun chak tak hen a um kumza.

³Mi nih a thuneihnâk hen mipâm tla nehsawhtu chu tlenhpengtu ruah nih thlâi a râwk mi hâwi asi.

⁴Dân siarlo tak hen na um chun, misual leikâng ṭângṭawm mi na si le; sikhawmsele dân zûltu na si chun misual dotu na si.

⁵Misual tla nih repnâk thu an theih lo, sikhawmsele LALPA sawnhtu tla nih chun fiang tak hen an theih.

⁶Minei zumhkâilo mi si ngâk hen mipâm zumhkâi si a ṭha dauh.

⁷Tlangvâl dân zûltu chu a fing asi. Zeikhawm ṭhatvaknâk umlo hen hâwi siamtu chu a pa rangah ningzak saihtu asi.

⁸Nei duh ruangah pûk midang sinah a fa na lâk chun, na neih chu mipâm zângfahtu tâ asi lai.

⁹Dân zûltu na si lo chun, na thlachamnâk chu Pathian nih ngâi ding a duh lai lo.

¹⁰Mi dik rangah thilsual ti ding hen na perpet chun nangmah thang nih a nan awh lai. Sualnâk neilo mi chu lâwmman ṭha tak pêk asi lai.

¹¹Minei tla chu fing hen anna rêl le, sikhawmsele mipâm umdân ding theihthiamnâk neitu chu a ṭha dauh.

¹²Mi ṭha thiltikho tak an si chun mikip nih an lawmhpi le, sikhawmsele mi ṭhalo nih lâi a rêl chun mi tla anna thup.

¹³Na damsung ah na sualnâk na pheh chun, dingchangnâk na tawng lai lo. Phuang le, mâk le, Pathian nih na lakah khua a ruat lai.

¹⁴LALPA thu ngâi kumza le, na lâwm lai. Na lung a khung chun, nangmah râwknâk asi lai.

¹⁵Mipâm tla chu lâirêltu sual lakah ṭangpi an herh le, chakeibaknei a hûk mi leh vawm â sawk mi hâwi hen ṭihnung a kâi.

¹⁶Theihnâk ṭha neilo hen lâirêltu chu mi nehsawhtu asi. Zumhkâilonâk huatu nih chun sâwt tak hen lâi a rêl lai.

¹⁷Mi thahtu chu chelh rî hen amah thlân chawhtu asi. Thloh rîlmâl lah.

¹⁸Zumhkâi tak hen um le, na him lai. Zumhkâi tak hen na um lo chun, na tlû sawm lai.

¹⁹Hamh tak hen a phâisen nâwntu nih chun ei ding tamtak a nei. A tik veih salam tu chu a pâm kumza lai.

²⁰Mi zumhkâi tla nih chun, thinlung ah duhnâk tling hen nunnuam tak hen an um lai. Sikhawmsele neih mawhlah tuk na si chun, rêp hen na um lai.

²¹Nabeibâng hen thilti chu a dik lo, sikhawmsele lâirêltu nih chun nawhnâk tâwmtê tawng duh ruangah thilsual a ti kho.

²²Mah mâika sialtu nih neih sawm duhnâk an nei le, thil-le-rî a vei awt ti a theih lo.

²³Nunsimhtu chu a nehnûnah sawr salam tu ngâk hen an duh dauh lai.

²⁴Âuzawng a nu leh a pa thil fîr hen pawi ti lotu chu, mifîr ngâk hen ṭhat a lawh lêm lo.

²⁵Mah mâi sialnâk nih nawknâk a suah. LALPA sirhsanhtu chu a ṭha khun asi.

²⁶Mah ngaihdân hen umtu chu âtkâi tak asi. Mah ngâk hen fing mi sîntirnâk zûl le, na him lai.

²⁷Mipâm rangah pêk na le, samphâng hen na um lai lo. Mipâm zauh ding khawm na duh lo chun mi tamtak nih siat an barh lai.

²⁸Misual tla thiltikho hen an um chun, mi tla anna thup. Sikhawmsele an thiltikhonâk a um lo rawh chun, mirep tla nih lâi an rêl nawlh lai.