Read Bawm Chin THUFING LASUIBU 30 Bible Online

THUFING LASUIBU 30 - Bawm Chin bible

THUFING LASUIBU 30

¹Hi bang tla hi Jakeh fapa Agur thusim asi: “Ka sinah Pathian a um lo, ka sinah Pathian a um lo, ṭangpitu neilo ka si.

²Minung ngâk hen ran ka bangh dauh. Minung nih theihnâk a nei mi hâwi ka nei lo.

³Zei finghnâk khawm ka sîn dah lo, Pathian thu ti mi rêng ka theih lo.

⁴Vân lei thu theihnâk âu nih a nei? Âu nih a kut hen thli tleih kho? Âu nih puan tliar hen tî fûn kho? Âu nih ramri tla siam kho? Na theih mi asi chun, âu asi ne? A fapa chu âu me si?

⁵“Pathian nih a thutiam chu a kil. Himnâk ding hen amah kiltu rangah chun phaw hâwi asi.

⁶Pathian nih a sim lo mi thu, a sim na ti chun nun a nan simh lai le, âwkrâwl thusim na si zia a langh lai,” a ti.

⁷Pathian, ka thih lânah thil panih hawng ka neitir ding hen kan deih:

⁸Âwkrâwl thu simlo ding leh minei khawm silo mipâm khawm silo ding hen hawng ka umtir. Ka herh tâwk cho hen tî-le-râwl hawng ka pêk.

⁹Tamtak ka nei chun, Pathian ka herh loh ka ti lebang lai. Sikhawmsele, ka pâm chun ka fîr lai le, ka Pathian lakah ka mualpho lai.

¹⁰To-aw chu a pu sinah chawngawih lah, siatbarh hen na um lai le, na tuar lai.

¹¹Mi zeimaw mi nih an pa siat an barh le, an nu thinlung duhzia hen an umlo.

¹²Mi zeimaw mi chu thenhlimh tak hen anna ruat le, anna nâwm kho rirî hen an um.

¹³A zeimaw mi chu ṭha thlo hen anna ruat, ṭha thlo hen anna ruat châwk a!

¹⁴A zeimaw mi nih mipâm leh ṭangpi herh lakah ṭhalo tak hen thil an ti; chu hâwi hen ei muhnâk dingah an mang.

¹⁵Chavat nih fanu panih a nei, an panih min “Hawng ka pêk!” Thil pali khim dah lo mi an um:

¹⁶Laikulh thihnâk, nunau fanei lo, mah herh mi tual châr, mei mih kho lo mi.

¹⁷Âuzawng a pa nihsanhtu leh a tar nûnah a nu zauhnawmhtu chu, mulukawlh nih a sa an ei hen langâk tla nih a mit chawih seh.

¹⁸Thil pali ka rangah thil thup theih har tak mi an um:

¹⁹Vân leiah mupi zuangnâk, lungpi tlûnah rûl lâwnnâk, Tisumsumriat ah meilawng kalnâk, nunau leh mipa anna duhnâk.

²⁰Hi bang tla hi nupi zumhkâi lo thilti chu asi: Ṭângdang a pawm le, tak â khawlh le, “Zei thilsual khawm ka ti sual lo,” a ti.

²¹Thil pali tual khawm nih a diarh kho lo mi a um:

²²Sal lal asi mi, mi â, ei hep duh mi,

²³Nunau huatkâi tak pasal a nei mi, to-aw nunau nih a hotunu dîrmun a luah mi.

²⁴Laikulh ah ran metê pali an um le, sikhawmsele thungâi an fing:

²⁵Ngerhtê tla: An chak lo le, sikhawmsele, ṭhalpini rangah tî-râwl an khawmh.

²⁶Lungpi lakah sâirem: Chak chiam mi khawm an si lo, sikhawmsele lungpi lakah umnâk an siam.

²⁷Khâubâwk: Lal an nei lo, sikhawmsele a rual rual hen an kal.

²⁸Bangtlerh: Na kut ah na put leng kho, sikhawmsele lal in ah na muh na lai.

²⁹Thil pali an kal hâu ngâi hen theih kho mi a um:

³⁰Chakeibaknei: Ramsa lakah a chak chem le, zeikhawm a ṭih mi a um lo;

³¹kêl tla, ârkhawng â zûm mi tla, an minung tla mâika ah lal tla anna zûm mi.

³²Mi rangah zauhnawmh leh thilsual ti tum hen na â mi asi chun, a ngâichâng le, ruat set!

³³Chawpê nûk kho tap na suang chun, chawpê nûk a thâu tlang na tawng lai. Âu nâr mawh na vuak chun a thî a suak lai. Thinthawknâk na tuah chun na rangah nawknâk asi lai.