Read Bawm Chin THUFING LASUIBU 31 Bible Online

THUFING LASUIBU 31 - Bawm Chin bible

THUFING LASUIBU 31

¹Hi bang tla hi lalchem Lemuel rangah a nu nih thu a simh mi chu asi:

²“Nang chu ka fapa duhtak na si le, ka thlachamnâk hen ka nan tawng mi asi. Zeise ka nan simh lai?

³Nunau pungnâk ah na tha veih lah le, na tangka khawm nunau lakah veih lah; Lal tla men râwktu an si.

⁴Lemuel, ngâi rawh. Lal nih uain a din ding asi lo, rîtnâk khawm a duh ding asi lo.

⁵An din chun dân an philh le, midang herhnâk lakah diknâk an thlawrhthlâu.

⁶Rîtnâk chu a thi ding mi rangah asi, chubang tla chu nganfâk tuar mi an si ruangah.

⁷An pâmnâk leh an lawksawngnâk philh ding hen din na seh.

⁸“Mah rangah thusim kholo mi rangah sim piak na rawh. Ṭangpitu neilo tla chu an thu theihpi na rawh.

⁹An rangah thu sim le, rep tak hen lâirêltu si rawh. Ṭangpi herh leh mipâm tla chu hum na rawh.

¹⁰Nupi rangah a tlâk mi tawng a har a! Lungmantam hen khawm tahkhiat kho asi lo.

¹¹A pasal nih a rinhsanh le, zeiliau khawmah an pâm dah lo.

¹²A damsung zawng chu nganfâknâk pêklo hen ṭhadektê hen a nâwl a zulh.

¹³Samul puan leh puannêm tah hen â nawk kumza.

¹⁴Sawlehtu lawng hâwi hen lal in ah mi tî-le-râwl lât takah mi a hawng put.

¹⁵Nî a suak lânah a thawk le, a dâwngsung rangah eibâr a timhtuah le, a to-awnu rangah thil ti ding simh ding hen.

¹⁶Ram a zauh le, a châwk. Tangka hen grep keuh a châwk le, a chîng.

¹⁷Rianṭuan rât tak mi, mi chak tak leh mi thanuam tak asi.

¹⁸A thilsiam zawzawng a sung ti a theih le, khua thim tiang hen rian a ṭuan.

¹⁹La a kher le, puan a tah.

²⁰Mipâm leh mi ngâkṭah sinah a hawk.

²¹A dâwngsungkhur lumnâk ding duh ruangah vûr lak khawmah rian ṭuan a bâng lo.

²²Ihkhun phah tla a siam le, dum pâwl puan mangṭhia tla â aih.

²³A pasal khawm khua lakah ruitu tla hen anna mêltheih.

²⁴Puan leh tâisâwm a tah le, sawlehtu sinah a zuar.

²⁵A chak hen zahkâi hen a um le, a mâilei thu khawmah lawksawngnâk a nei lo.

²⁶Finghnâk hâu nêm tak hen thu a sim.

²⁷A dâwngsung tla rangah thilherh ti hen â nawk kumza.

²⁸A fa tla nih an lawmh le, a pasal khawm nih a sawr.

²⁹A pasal nih, “Nunau dang tla khawm nupi ṭha tak an si le, chu zawng lakah na ṭha chem,” a ti.

³⁰Duhrim kâinâk hi perpetnâk asi le, dawhnâk chu a vei kho. Sikhawmsele LALPA zahtu nunau chu sawr hen a um lai.

³¹A thilti mi zawng lakah thangṭhat a lawh. Mikip zah tlâk hen a um.