Read Bawm Chin THUFING LASUIBU 5 Bible Online

THUFING LASUIBU 5 - Bawm Chin bible

THUFING LASUIBU 5

¹Ka fapa, na nâ hawng thlîr le, ka finghnâk leh ka muhnâk thu ngâi rawh.

²Churawhchun umdân ding tluang tak na theih lai le, na thu thawk hen theihnâk na nei ti a lang lai.

³Midang nupi tla thusim chu khuaitizû hâwi hen a thlum hen oliv sariak hâwi hen mi a châwchawknâk chu a tlawr kho.

⁴Sikhawmsele, a nehnûn chun, na rangah thil khâ leh nganfâknâk cho asi.

⁵Laikulh thihnâk lampi ah a nan kalpi lai le, a kalnâk lampi chu thihnâk ah a dawng.

⁶Nungnâk lampi leikângah a um lo le, a vei le, thil a hawng um mi tla zeikhawm theihnâk a nei lo.

⁷Ka fapa tla, tuah ka thu ngâi u. Thu ka nan simh mi hi philh lah u.

⁸Chubang hâwi nunau lakah chun a kiang ving le! A in kawtkâ kiangah khawm va kal lah.

⁹Na va kal chun zahkâi na sinâk kha midang nih anna ting lai le, mi khuaruat lo kut ah na kum no liauah na thi lai.

¹⁰Asi, ramdang mi zawzawng nih na neih tla an lâk lai le, na ṭuan tha zawzawng chu midang tâ asi lai.

¹¹Na thihnâk ihkhun ah rûm hen na it lai le, na taksa leh na thari chu ei hep hen a um lai le,

¹²“Zeirangah ka ngâi lo aw? Zeirangah nun hawng ka simhtu ding ka duh lo.

¹³Hawng ka simhtu thu khawm ka ngâi lo rawh, an thusim leikâng khawm ka nâ ka dawnh lo rawh.

¹⁴Tuah mawhsareh hen zatlâng mitmuh ah ningzak a kâi zia ka theih rawh,” na ti lai.

¹⁵Nangmah nupi lakah zumhkâi hen um le, amah cho dâwt rawh.

¹⁶Nunau dang hen nan nei mi fa nih na rangah thil ṭha a ti lai lo.

¹⁷Na fa tla chu ramdang mi tla ṭangpitu silo hen nangmah ṭangpi ding hen an ṭhanglian mi asi.

¹⁸Churuangah chun na nupi lawmh le, na umpi mi nunau lakah a lâwm rawh.

¹⁹Sazuk dawhtak leh dâwtkâi tak hâwi hen zauh. A dawhnâk nih na lung an âwitir sele; a nan dâwtnâk nih a nan kulh seh.

²⁰Ka fapa, zeirangah na dâwtnâk chu nunau dang sinah na pêk awt? Zeirangah midang nupi dawhnâk chu na duh êu?

²¹LALPA nih na thilti zawng a muh hep. Na kalnâk kipah a nan vêng.

²²Misual tla sualnâk chu thang asi. Amah sualnâk lên nih a awh.

²³Mah lakah sûmnâk a nei lo ruangah a thi. A ê-aw ngâilonâk thusim nih thlân ah a kalpi lai.