Read Bawm Chin THUFING LASUIBU 7 Bible Online

THUFING LASUIBU 7 - Bawm Chin bible

THUFING LASUIBU 7

¹Ka fapa, ka thusim theihkumza le, thil ti ding ka nan simh mi chu philh lah.

²Ka thusim mi hâwi hen ti le, na nung lai. Na mit na vêng mi hâwi hen, ka nan sîntir mi tla zûl ding hen a thiamthih rawh.

³Ka nan sîntir mi tla chu zeiliau zawng tleih le, na thinlung ah rîn.

⁴Finghnâk chu na farnu hâwi hen ruat le, muhnâk chu na hâwikawmh ah ruat rawh.

⁵Midang nupi lakah mi leh nunau nih an lêmnâk lakah mi an vêng lai.

⁶Veikhat chu ka in langawtkawt ah ka chuanh le, tlangvâl theihthiamnâk neilo mi ka muh na le,

⁷pakhat lam chu mâwl dauh hen a lang.

⁸Nunau zeimaw mi umnâk khuavâu zâwllâi ah a va kal.

⁹Zânleibâi a mûi nûnah chu nunau in kiangah a va kal.

¹⁰Chunah chun nunau hen anna tawng le, nunau chu â zuar mi thuam hen â thuam le, a thinlung hen tumnâk a nei.

¹¹Chu nunau chu râlṭha tak leh ningzak theihlo mi asi le, khua dung kiang tla ah mawh,

¹²a zeimaw zâwn ah sumtuahnâk mun ah a va kal mi a bawh na.

¹³Tlangvâl rangah a kut hen a vuanh le, a châwchawk, mâitawnh hen a zauh le, a sinah,

¹⁴“Tusûn ah thil ap ding ka timhtuah le, bâwlnâk lakah mi sa chu.

¹⁵Churuangah nangmah hâwl ding hen ka hawng. Nangmah an tawng ding ka duh le, hinah na um ko mahi a!

¹⁶Ihkhun chu Aigupta puan nêm a ṭial mi hen ka phah.

¹⁷Rimthâw murrah, aloe, leh cinamon ka chulh.

¹⁸Hawng ko! Khuadei ver hen nuam kan chenh lai. Khatlei khatlei kanna lawmh tawnh lai.

¹⁹Ka pasal khawm in ah a um lo. Ram lât tak khualtlâwng ah a kal ving.

²⁰Tangka tamtak a put le, zarhkar nih lân lo chu a hawng kîr ding asi lo,” a ti.

²¹Churawhchun duhrim a kâinâk hen a lêm rawh.

²²Chawchal a thahnâk leiah kalpi mi hâwi leh

²³sazuk sunh ding hen thang lakah a tlâ mi hâwi hen, mawhsareh hen chu nunau nih a kalpi rawh. Va nih a theih lo ruangah lên lei a fûk mi hâwi hen a nungnâk chu ṭihnungkâi lakah a um rawh ti a theih lo.

²⁴Ka fapa tla, tuah ka thu ngâi u. Ka thusim lakah nan nâ dawnh u.

²⁵Chubang hâwi nunau neh ding hen na thinlung siam lah; chu nunau chu mi lam vâi hâwi hen zûl lah.

²⁶Anih chu mi tamtak râwktu asi le, mi tamtak thahtu khawm asi.

²⁷A in ah na kal chun laikulh thihnâk lampi ah kal mi na si. Tu ko ah thihnâk nâi chem asi.