Read Bawm Chin THUFING LASUIBU 8 Bible Online

THUFING LASUIBU 8 - Bawm Chin bible

THUFING LASUIBU 8

¹Finghnâk a âu mi chu ngâi! A san chu amah nih a theih.

²Tlâng tlûnah lampi kiangah mi leh lamthuam ah a dîr.

³Khuapi lûtnâk kulh kawtkâ kiangah a âu:

⁴“Minung tla, ka nan simh na, tual tlûnah um mi mikip ka nan auh na.

⁵Nan chu lo rih ma? Kum tling leikâng fûk u. Nan lungfiang lo rih ma? Theihnâk a sîn u.

⁶Ka thu ṭha hi ngâi u; ka nan simh na mi zawng chu a dik asi.

⁷Ka sim mi chu thudik asi; âwkrâwl chu kei rangah huatkâi asi.

⁸Ka sim mi zawzawng chu a dik le; diklo leh pialnâk ding a um lo.

⁹Muhnâk nei mi rangah chun a fiang le; theihtir mi rangah chun zeizawng a awl!

¹⁰Tangkasa ngâk hen kan sîntirnâk hi thîm rawh; ngûn a ṭha chem mi ngâk hen theihnâk hi thîm dauh rawh.

¹¹“Kei chu Finghnâk ka si le, lungsung ngâk hen ka ṭha dauh; na thil duh zeikhawm nih tahkhiat kho mi ka si lo.

¹²Kei chu Finghnâk ka si le, muhnâk ka nei. Theihnâk ka nei le, tluang tak hen lâi ka rêl kho.

¹³LALPA zah ding hen chun sual hua ding asi; mi â zûm mi leh a sung-û tir mi chu ka hua, sual leikâng leh âwkrâwl thu khawm ka hua.

¹⁴Thinlung ah ka tum le, ka ṭuan, theihthiamnâk ka nei le, ka chak.

¹⁵Lal tla rangah lâi ka rêlpi na hen, lâirêltu tla dân ṭha ka siampi na.

¹⁶Tual tlûnah lâirêltu tla nih keimah ṭangpi hen lâi an rêl le, ram lakah lâirêltu leh milian tla khawm.

¹⁷Hawng ka dâwttu chu ka dâwt le, hawng ka hâwltu zawng nih an ka tawng lai.

¹⁸Ka nei le, zah ka lawh, ka sul-le-lam a tluang hen ka dingchang.

¹⁹Ka sin thawk hen na tawng mi chu ngûn ngâk hen a ṭha dauh. Tangka a tliang chem mi ngâk men a ṭha dauh.

²⁰Mirep lampi ka zawh le; diknâk lampi ka zûl.

²¹Hawng ka dâwttu tla sinah neihnâk ka pêk le, an in chu thil-le-rî hen ka khattir.

²²“LALPA nih a masachem hen kei hawng ka siam le, a lânah a rianṭuan masachem ka si.

²³A tîr chem ah siam mi ka si le, laikulh tuah lânah a masachem ka si.

²⁴Tinungva leh tisumsumriat um lânah suak mi ka si.

²⁵Tlâng a umnâk mun ah siam asi lânah leh, tlâng sâng um lânah suak rawh mi ka si.

²⁶Pathian nih tual leh phâisen mawh tual ṭhuam khat um lânah um rawh mi ka si.

²⁷Vân a mun ah a um liauah leh tisumsumriat khatlei khatlei kâwlkil a siam lânah ka um ving rawh.

²⁸Vândâwm a mun ah a siah lânah leh tisumsumriat tinung a siam lânah khawm ka um rawh.

²⁹Tipi mi tî amah nih a sim mi rî lêm kal lo ding hen thu a pêk liauah leh tual a siam lân khawmah ka um ving rawh.

³⁰Mi thilsiam thiam hâwi hen a kiangah ka um le, nisiar hen a lâwmnâk ka si le, a mâika ah lâwm tak hen ka um kumza.

³¹Laikulh leh minung fa tla hen lâwm tak hen kan um.

³²“Tuah, tlangvâl tla, ka thu ngâi u. Thu ka sim mi hâwi hen ti ule, lâwptlo tak hen nan um lai.

³³Sîntir hen na um mi thu ngâi, fing tak hen um le, dâithlâng lah.

³⁴Mi ka thu ngâitu, nisiar ka kawtkâ kiangah umtu leh ka in tualmâi ah hawng ka ngâktu tla chu anna lâwm lai.

³⁵Kei an hawng ka tawngtu chu nungnâk an tawng mi asi. LALPA a lakah â lâwm lai.

³⁶Kei hawng ka tawnglotu chu amah nganfâk â pêk mi asi. Âuzawng hawng ka huatu chu thih a duh mi asi.”