Read Bawm Chin THUFING LASUIBU 9 Bible Online

THUFING LASUIBU 9 - Bawm Chin bible

THUFING LASUIBU 9

¹Finghnâk nih a in a sak le, a tung pasarih a siam.

²Ran hen puai a tuah le, uain lakah rimthâw a chawmh le, dawhkân ah a siah.

³Khuapi lakah mun sâng ah mi auh ding hen a nungâk tla a fial na:

⁴“Mi mâwl tla, hawng u!” ti hen. Mi â sinah chun,

⁵“Hawng le ka buh hi ei le, uain lakah ka chawmh mi hi din rawh.

⁶Zeikhawm theihlo mi minung tla kha kaltâk na le, nung rawh. Theihnâk lampi ah kal rawh,” a ti.

⁷Mi â zûm mi minung nun na simh chun, an zauhnawmh salam lai. Misual nun na simh chun nganfâk na tawng salam lai.

⁸A zûm mi minung chu nun simh lah, a nan hua lai. Sikhawmsele mifing nun na simh chun a nan zah lai.

⁹Zei thil tal mifing rangah na simh mi chu, a rangah fingh khunnâk asi. Mirep rangah nun na simh chun, a rangah theihnâk a sap lai.

¹⁰Fing ding hen a masa hen LALPA chu na zah ding asi. Thenhlimh mi Pakhat na theih asi chun theihthiamnâk na nei mi asi rawh.

¹¹Finghnâk nih na nungnâk kum a sap lai.

¹²Finghnâk na nei chun mi a dingchang mi pakhat chu na si le, na duh lo asi chun, tuar ding mi pakhat chu na si.

¹³Mi mâwl chu zeikhawm theihlo mi, ningzak theihlo mi nunau a âu mi hâwi asi.

¹⁴A inkhâr kiangah mawh, khua lakah mun sâng tlûnah a to le,

¹⁵an rianṭuan hen anna vel mi zapi tla a auh na:

¹⁶“Mi mâwl tla, hawng u,” ti hen. Mi â sinah,

¹⁷“Fîr mi tî chu a thaw dauh, fîr mi sang chu a thaw dauh,” a ti.

¹⁸A perpet mi tla a in ah va kal mi tla nih chun laikulh thihnâk thûk takah an lût rawh ti an theih lo.