Read Bawm Chin THUSIMTU 10 Bible Online

THUSIMTU 10 - Bawm Chin bible

THUSIMTU 10

¹Thovâi a thi mi nih palang ah mi rimthâw a thûtir kho, mâwlnâk metê nih finghnâk lian chem a râwk kho.

²Mifing nih thil dik a ti mi leh mi â nih thil diklo a ti mi chu laikulh dân asi.

³Khual hen lampi ah tawngnâk ko khawmah a mâwlnâk chu a lang sawm; mikip nih a â ti an theih.

⁴Na lakah na lâirêltu a thinrun chun na rianṭuan bâng ding a tum lah, dâisip hen na um chun diklonâk fâk tak khawm ngaihdam kho asi lai.

⁵Laikulh ah diklonâk ka muh le, chu chu lâirêltu ruangah mi asi.

⁶Minei tla siarlo hen an um liauah, mi mâwl tla nih thuneihnâk mun anna ting.

⁷Milian kê hen a kal liauah sal rang tlûnah â chuan mi ka muh.

⁸Khur na chawh le, chunah chun na tlâ, vâm na siat le, rûl nih a nan chuk.

⁹Lung chawhnâk ah rian na ṭuan chun lung nih nganfâk a nan pêk. Thing na chêk chun na ti mi lakah nganfâk na tawng.

¹⁰Na reitlung a bulh chun na tât lo mi asi, na mang har dauh lai rawh. Dawn kan ding hen chun fing dauh hen a ngâi.

¹¹Rûl dâwithiam ko na hen a chuk masa rawh chun zeikhawm a ṭhavak lo rawh.

¹²Mifing chu a thusim lakah zah a kâi le, mi â lam chu amah thusim nih a râwk.

¹³Mâwltak hen thuruat a dawmh le, âtnâk karo hen a dawngh.

¹⁴Mi â thusim chu â phân zûl. Thil hawng um ding mi âukhawm nih a theih loh, kan thih nûnah thil a hawng um ding mi âukhawm nih hawng kan simh kho lo.

¹⁵Mi âumawh amah in lei lampi khawm theih lo hen mâwl tuktarâi mi chu rianṭuan hen amah a dîttir mi cho asi.

¹⁶Ram lakah lalchem seinotê asi hen leh khuadei ver hen ruitu tla puai lakah um mi ram chu a nawk.

¹⁷Sikhawmsele, lalchem mah thu hen um mi leh ruitu a tik tak ah buh ei mi, mah lakah sûmnâk nei hen zû dinlo mi neitu ram chu a vânṭha asi.

¹⁸Mi â in tlûn thlamh ding a huam lo tuktarâi mi chu, a zut lai le, in chu a chim lai!

¹⁹Puaituah nih a nan lawmhtir le, uain nih nuamnâk a nan pêk, sikhawmsele tangka na nei lo chun, chubang chu tawng kho mi asi lo.

²⁰Lalchem chawngawih leh, a thuptê khawm hen minei khawm chawngawih lah, na ihkhun ah nangmah lâwng khawmah. Na thusim chu va nih a kalpi lai le, a simh na lebang lai.