Read Bawm Chin THUSIMTU 4 Bible Online

THUSIMTU 4 - Bawm Chin bible

THUSIMTU 4

¹Churawhchun hi laikulh ah diklonâk zawzawng kal vima mi chu ka chuanh nawlh. Nâuneh hen an um mi tla chu an ṭap le, âukhawm nih an ṭangpi na lo. Anmah nehsawhtu leikâng mi tla nih thiltikhonâk an nei ruangah pakhat khawm nih an ṭangpi na lo.

²An thi le an kal rawh mi tla lam ka ngarh na; dam mi tla ngâk hen an rangah a ṭha dauh.

³Sikhawmsele suak lo dâidua hen laikulh ah diklonâk kal vima mi muh lo chu a ṭha dauh.

⁴Zeirangah dingchangnâk ding hen mi nih titi hamh hen rian an ṭuan ti ka ruat fâwn; an zâwlbâwm tla thil an ngarh na ruangah asi. Sikhawmsele zeikhawm asi lêm lo, thli ṭhâwl mi hâwi asi.

⁵Mi nih a kut a tum hen thi ding hen â pâmtir mi chu mi â an ti.

⁶Sikhawmsele asi kho, sikhawmsele tâwmtê nei hen thinlung thlangam tak hen um chu kut nih hen zeiliau zawngah thil tleih tum mi ngâk chun a ṭha dauh.

⁷Chubang tla khawm damsung ah thil zeimawh dang tla chu zeikhawm asi lo ti ka theih.

⁸Mi pakhat amah lâwng hen hinah hin a um. Fapa khawm a nei lo, unau khawm a nei lo, sikhawmsele rianṭuan kumza hen a um le, a neih khawm nih a lawmhtir lêm lo. Chu hâwi hen mah nuamnâk ah mang lo hen hamh tak a rianṭuantu chu âu rangah a ṭuan mi asi lai rawh ne? Chu khawm chu zeikhawm asi lo mi asi fâwn, chu chu hamhkâi tak hen umnâk asi.

⁹Pakhat ngâk hen panih chu a ṭha dauh, an ṭuan tam dauh khun ruangah.

¹⁰Pakhat a tlû khawmah a dang nih a thawh kho. Sikhawmsele minung pakhat cho asi hen a tlû chun, ṭangpitu pakhat khawm a um lo ruangah a ṭha lo thlo.

¹¹A dâi chun, minung panih munkhat it hen a lum kho, sikhawmsele nangmah lâwng hen zeitin na lumtir kho lai?

¹²Minung panih nih minung pakhat amah lâwng mi chu do hen neh kho asi. Rirual pathum bawp mi chu sah ding har tak asi.

¹³Mi chu pâmnâk lakah mi a ram lakah lalchem a hawng si kho, asi lo leh rêngin ah mi chu laltophah ah a to kho, sikhawmsele, a tar hen mi thusim theihthiamnâk neilo mi asi chun, tlangvâl pâm tak a fing mi khawm a tluk lo.

¹⁵Hi laikulh ah zapi minung um mi tla hi ka thinlung hen ka ruat chiam le, lalchem dîrmun luah khotu ding tlangvâl zeiah mawh um ding hen ka ruat.

¹⁶Lalchem lâirêlnâk mi zapi chu rêl châwk lo rê khawm an si kho; a thi rawh chun pakhat khawm nih a thilti ruangah anna lâwm lo. Zeikhawm asi lo. Thli ṭhâwl mi hâwi asi.