Read Bawm Chin THUSIMTU 6 Bible Online

THUSIMTU 6 - Bawm Chin bible

THUSIMTU 6

¹Laikulh ah thil diklo fâk tak ti hen a um mi tla chu ka theih.

²Pathian nih âumawh neihnâk, zahkâinâk leh thil-le-rî a pêk le, asi, a duh phung zeizawng khawm, sikhawmsele chu lakah chun a lâwmhtir awt lo. Khual zeimaw zat rangah lâwmnâk lam asi dauh lai. Thil zeikhawm lo leh thil diklo hep asi.

³Mi nih fa tla zâ nei hen sâwt tak a dam kho, sikhawmsele lâwmnâk zeikhawm neilo hen a thlâk tla amah vûitu khawm um lo mi chu, fasêm a thi chia hen a suak mi lam ṭha dauh ka ti.

⁴Chu fasêm a hawng suak mi chu zeikhawm ṭhatnâk a um lo; mûi nâwngah a vei le, chunah chun philh asi rawh.

⁵Sûn nî chêu khawm a muh lo, nungnâk hi zei hâwi asi ti khawm a theih loh,

⁶sikhawmsele minung kum sâng nih dam hen a dam sungah lâwmnâk tawnglotu ngâk chun dinhnâk tawngtu a ṭha dauh. Chu nûnah chun an panih hen mun pakhat ah an kal vevê lai.

⁷Mi nih thil zeimawh ei ding tawng ding duh hen a rian zawzawng a ṭuan le, sikhawmsele a duh tâwk a nei dah lo.

⁸Mi â ngâk hen mifing zeitin a ṭhat dauh zia? Nung dân theih ding hen mipâm rangah zeitin ti sele a ṭha lai?

⁹Zeikhawm asi lo; thli ṭhâwl mi hâwi asi. Thil dang duh ruang mâng a um ngâk hen chun mah neih lakah lâwmnâk neih a ṭha dauh.

¹⁰Thil zeizawng a hawng tlung mi tla chu a lân thawk hen um ding hen ruat chia rêng asi, mi nih amah ngâk a chak dauh mi chu a êl kho lo ti kan theih.

¹¹Na êl tam bilik leh zeikhawm asi lo dadauh, nangmah khawm a lei na ṭha lêm lo.

¹²Mi a nungnâk tâwi tak, mang tlâk lo dâidul hâwi hen a vei ving mi rangah a ṭha chem ding âu nih theih kho lai? Mi nih a thih nûnah laikulh ah thil a hawng um ding mi âu nih theih kho lai?