Read Bawm Chin THUSIMTU 8 Bible Online

THUSIMTU 8 - Bawm Chin bible

THUSIMTU 8

¹Mifing cho nih thil umdân dik tak chu a theih. Finghnâk nih chun a nihtir le, a thinthawknâk mêl a langhtir lo.

²Lalchem nih thu a sim mi chu ti le, Pathian sinah thu tiam ding hen a nam lah.

³Lalchem nih a duhzia zawng hen zeital a ti kho le, churuangah a mâika ah um lah le; chu mun ṭihnungkâi lakah chun um lah.

⁴Lalchem nih thunei tak hen thil a ti le, thil a ti mi chu âukhawm nih an do kho lo.

⁵A thupêk na ngâi kar vial chu na him asi, mifing nih chun zei hâwi ti ding leh zei tikah ti ding a theih.

⁶Thil ti ding mi lakah a tik tak leh lampi dik a um, sikhawmsele tâwmtê cho kan theih.

⁷Âukhawm nih thil hawng tlung ding mi kan theih lo le, pakhat khawm hawng kan simhtu ding an um lo.

⁸Âukhawm a thi ding mi lakah a vêng hen a thih ni a lanh kho lo. Chu chu raltuknâk kan âwl kho lo mi chu asi; kan lampi ah kal ding kan âwl kho lo.

⁹Hi laikulh ah thilti hen a um mi tla ka dawn liauah hi bang zawzawng hi ka muh, chu laikulh ah chun mi zeimaw mi chu thiltikho tak hen an um le, a dang tla chu an tangah tuartu tla an si.

¹⁰Misual an thlân ah vûi hen an um mi tla chu ka muh na le, an thilsual tinâk khua mi thlân thawk hen kîr mi tla nih an sawr na, chubang khawm chu zeikhawm asi lo.

¹¹Zeirangah mi nih thilsual âwlzâng tak hen an ti zia? Thilsual ti chu rêp sâwm an si lo ruangah.

¹²Misual nih vei zâ thil sual a ti khawmah a dam nget kho rih. Asi, thu an sim mi lakah: “Pathian thu na ngâi chun, thil zeizawng a dik lai.

¹³Sikhawmsele misual rangah chun sul-le-lam a tluang kho lo. An nungnâk chu thlapelê hâwi asi. Pathian ê-aw an ngâi lo ruangah seino an si liauah an thi lai,” an ti mi ka theih.

¹⁴Sikhawmsele chu khawm chu zeikhawm asi lo. Laikulh ah thil a hawng um mi tla zauhnik: zeimaw zâwn chun mi rep tla khawm nih misual rêpnâk an tawng, misual tla khawm nih mirep tla lâwmman an tawng. Chubang tla chu zeikhawm asi lo ka ti.

¹⁵Churuangah mi nih a dam karah lâwmnâk a nei mi chu din leh ei leh mah lakah lâwmnâk cho asi ruangah mah lakah a lâwm ding hen ka theih. Hi laikulh ah a dam karah a rianṭuan Pathian nih a pêk mi lak cho ah a ti kho.

¹⁶Zeiliau zawngah mifing si hen laikulh ah thil umdân theih ding ka tum le, a sûn a zân hen meng khawm le,

¹⁷Pathian nih thil a ti mi chu na theih kho dah lai loh ti ka theih. Zei ti tal a ṭang khawm le, na tawng kho dah lai loh. Mifing tla khawm nih theih ding an tum le, an theih kho lo.