Read Bawm Chin THUSIMTU 9 Bible Online

THUSIMTU 9 - Bawm Chin bible

THUSIMTU 9

¹Hi bang thu tla hi sâwt tak leh harsa tak hen ka dawn le, mifing leh mirep tla thilti an dâwt mi leh an hua mi lakah Pathian thu thu asi zia ka muh. Âukhawm a mâilei ah thil hawng um ding a theih lo.

²Zeikhawm â dangnâk a um lo. Mirep leh misual, mi ṭha leh mi ṭhalo phung leikâng si mi leh silo mi, bâwlnâk aptu leh aplotu sin khawmah vânduainâk bang cho a tlung. Mi ṭha khawm misual ngâk hen a ṭha dauh lêm lo; siat tleihtu khawm tleihlotu ngâk hen a ṭha dauh lêm lo.

³Vânduainâk chu an ektê tlûnah bang ver hen a hawng tlung le, hi laikulh ah thil a hawng tlung mi chu thil diklo asi. Minung chu an dam kar vial chu an thinlung chu sualnâk leh âtnâk hen a khat le, an thi sawm.

⁴Sikhawmsele âuzawng hi laikulh ah nungdam hen an um mi nih chun lungumnâk an nei le; chakeibaknei a thi mi ngâk hen ui a nung mi a ṭha dauh.

⁵Asi, a nung mi tla nih chun thi ding mi an si ti an theih le, sikhawmsele a thi mi lam nih chun zeikhawm an theih lo. Hi nûnah lâwmman tawng ding mi khawm an nei lo; âu theih khawm an si lo rawh.

⁶An dâwtnâk tla, huatnâk tla, lungkhamnâk tla an nei mi zawng khawm an thihpi hep. Hi laikulh ah a hawng tlung mi zei thil tal lakah tingvo an nei dah lai lo rawh.

⁷A mâi masa le, na buh ei le, lâwm tak hen um; na uain din le, thinlung lâwm tak hen um rawh. Pathian sinah um chu a dik asi.

⁸Lâwm tak leh lâwptlo hen um tum kumza.

⁹Nungnâk zeikhawm silo mi na duh mi nunau hen na dam sung zawngah nuamchenh chu Pathian nih hi laikulh ah a nan pêk mi asi. Zeikhawm silo mi ni tla ah chun a lâwm le, chu chu na lawksawngnâk ding hen na tawng ding mi asi ruangah.

¹⁰Na thilti zeizawng lakah hamh tak hen ṭuan rawh, hi laikulh thihnâk ah chun, thilti, thinlung dawn, theihhâk tla, finghnâk a um awt lo rawh ruangah; chunah chun nang khawm kal ding mi na si.

¹¹Hi laikulh ah hin thil dang, mi tek chak nih tekzuamnâk ah an neh dah lo mi, mi râlṭha khawm nih râltuknâk ah an neh dah lo mi ka theih. Mifing tla khawm nih ei ding an tawng kumza lo, theihthiamnâk nei mi tla khawm an nei kumza lo, mi thiltikho tla khawm nih mun sâng an luah kumza lo. Vânduainâk chu mikip sinah a tlung.

¹²Na hun a hawng tlung ding mi na theih loh. Thang nih va a awh sawm mi, lên lakah ngâ a tâng sawm mi hâwi hen, mêtê hen kan ruat mi thilsual nih zeikarlo ah hawng kan awh.

¹³Hi laikulh ah finghnâk leikâng ruatnâk thu ah zei hâwi asi ti zauhtawnh ding ṭha tak thil zeimawh ka muh mi a um.

¹⁴Khua mêtê minung tam chiam lo mi a um. Lalchem thiltikho tak nih a do. A hual le, a kulh chu siat ding a tum.

¹⁵Chunah chun, mipâm pakhat a um le, sikhawmsele a fing thlo ruangah chu nih chun khua chu a hum kho. Sikhawmsele âukhawm nih anih chu an siarlo.

¹⁶Chaknâk ngâk hen finghnâk a ṭha dauh ka ti kumza le, sikhawmsele, âukhawm nih mipâm chu mifing ah an ruat lo le, a thusim khawm an ngâi piak duh lo.

¹⁷Mifing thu dâisiptê hen ngâi chu, lâirêlnâk ah â tak hen a âu mi ngâi ngâk hen a ṭha dauh.

¹⁸Finghnâk nih chun riamnâm ngâk hen thil ṭha a ti dauh le, sikhawmsele misual pakhat nih thil ṭha tam tak a râwk kho.