Read Bawm Chin LA TLA LA 4 Bible Online

LA TLA LA 4 - Bawm Chin bible

LA TLA LA 4

¹Ka duh mi, na dawh chiam e! Na puan khuh phên ah na mit ah dâwtnâk a lang. Na sam chu kêl rual Gilead tlângah anna lawk mi hâwi hen a thing nanak.

²Na hâ chu dawrâ mul mêt kâ hen tak khawlh ver mi hâwi hen a ngo. Pakhat khawm a beuh lo; a ektê hen kîm fang hen â rual zat.

³Na mûr chu puansen hâwi asi; na hawlh liauah thungâi duhrim a kâi. Na puan khuh thuam hen na biang a sen ak.

⁴Na ngâwng khawm David insâng hâwi asi, a bial hen a tlawr, phaw sâng khat hêl dak hen ṭhi thlaih mi hâwi asi.

⁵Na ṭâng chu lili nâwngah sazuk faphîr nih râwl an ei mi hâwi asi.

⁶Murrah tlâng tlûnah rimthâw tlâng ah zînglei thlivir a hawng lêng hen khua a dei tiang hen ka um awt.

⁷Ka duh mi nu, na dawh chiam e! Na rangtling a!

⁸Ka nupi, Lebanon Tlâng ah mi ka sinah hawng rawh; Lebanon thawk hen ka sinah hawng. Amana tlâng tlûnah mi chu hawng ṭum le, chakeibaknei leh keitê umnâk Senir leh Hermon Tlâng ah mi chu hawng ṭum rawh.

⁹Na mitmeng ka zauh mi lakah, ka thinlung tum chem leh ka nupi na si. Na ngâwng ah na ṭhi awih nih ka thinlung a lâk hep.

¹⁰Ka nupi leh thinlung tum, na ka dâwtnâk nih hawng ka lawmhtir. Na ka dâwtnâk chu uain ngâk hen a ṭha dauh; na rimthâwtnâk chu rimthâw dang zawng ngâk hen a thaw dauh.

¹¹Ka duhtak, na mûr ah khuaitizû thlum a um; na hawlhkâ chu ka rangah nûk hâng leh khuaitizû asi. Na nipuan lakah Lebanon tlâng ah rimthâwtnâk zawzawng a um.

¹²Ka thinlung tum, ka nupi chu, a thuptê hen a um mi dûm, kulh pang mi dûm, amah rang bîk ah thil chîng mi châwmtu tinungva umnâk asi.

¹³Thei dûm ah pomegranete hâwi hen an kho le, rah ṭha chem hen an rah, henna leh nard khawm an sam lo,

¹⁴safron, calamus leh cinamon rimthâw chi kip a um. Chunah chun murrah leh aloe, rimthâw chem zawzawng tla a kho.

¹⁵Tinungva tla nih dûm chu a chinh le, tiva tla, tivatê tla chu Lebanon tlâng thawk hen a luang. Nunau nih

¹⁶Mar thli, a ṭhangh rawh, sim thli, ka dûm ah hawng lêng le, rimthâw hen khattir. Hawng ka dâwttupa chu a dûm ah hawng sele, theirah a ṭha chem mi ei seh. Mipa nih