Read Bawm Chin ISAI 1 Bible Online

ISAI 1 - Bawm Chin bible

ISAI 1

¹Hi lasuibu lakah hin, Uziah, Jotham, Ahaz leh Hezekiah Juda lalchem an si liauah Amoz fapa Isai sinah Pathian nih Juda tla leh Jerusalem thu a sim mi rîn asi.

²LALPA nih, “Tual leh vân, ka thusim ngâi u! Fa ka châwm na mi tla, ka lakah an hel.

³Ran nih a dâwngpu a theih le, sanatung tla nih an dâwngpu nih râwl a pêk na mi mun an theih. Sikhawmsele ka mi Israel tla ngâk hen an theih dauh. Annih nih chun an theih lo thlo,” a ti.

⁴Mi vânduai, phun sual tak, râwk hen um mi leh misual nan si! Nan sualnâk nih a nan niamtir na! LALPA Israel Pathian thenhlimh chu nan duh lo le, dunglei nan sît.

⁵Zeirangah a lakah hel kumza hen nan um? Rêp hen um ma nan duh nget rih? Israel, na lû chu liam mâ nih a tuam pang le, na thinlung leh na dawnruatnâk khawm a ngawr.

⁶Na lû sîp thawk hen na kezaphah tiang hen na taksa lakah a himnâk rêng a um lo. Thî a suak mi leh mâ leh liam mâ nih an tuam pang. Na liam mi mâ tla chu ṭâwl hen tuam asi lo. Zei turpâng khawm buaih asi lo.

⁷Na ram chu râwk hen a um le, na khuapi tla chu tual ah duah hen a um. Na zauh ko liauah ramdang minung nih na ram an lâk le, thil zeizawng an râwk hep.

⁸Jerusalem chu mâk hen a um le, khuapi hual mi lakah grep dûm ah vêngtu umnâk basâ mawh chawngma phâisen ah mi basâ vêngtu neilo hâwi asi.

⁹LALPA zeizawng tikho nih a thibang zeimaw mi zuah na lah sele chu Jerusalem chu Sodom leh Gomorah hâwi hen râwk dep hen a um lai.

¹⁰Jerusalem, na lâirêltu leh na minung tla chu Sodom leh Gomorah ah um mi tla hâwi an si rawh. LALPA nih na sinah thu a nan simh mi hi ngâi rawh. Kan Pathian nih a nan sîntirnâk ah hin ngâi set rawh.

¹¹Anih nih chun, “Ka sinah bâwlnâk nan ka ap mi zawzawng tla hi duh ding hen ma nan ka ruat? Ka sinah bâwlnâk ah dawrâ tla duah ding hen nan hawng ap mi leh nan ran ṭha thâu tla chu ka rangah a tam tuktarâi rawh. Chawchal leh dawrâ leh kêl thisen ka nengtawr rawh.

¹²Ka sinah sawnh ding hen nan hawng liauah hi bang hawng put ding hen âu nih a nan ngiar na? Ka Biakin hawng sirh ding hen âu nih a nan ngiar na?

¹³Nan thil ap nan hawng put mi chu a thawt ko asi. Rimthâw nan duah mi rim khawm ka fih asi. Nan Thlathar Kût, nan Dinhni leh nan phung pumh ni tla nan sualnâk nih a râwk hep mi lakah ka tel kho lo.

¹⁴Nan Thlathar Kût leh nanna lâwmnâk ni khawm ka hua le; ka rangah thilrit leh nengtawr kâi asi.

¹⁵“Thlacham hen nan bân nan phar tik khawmah ka nan zauh na ding asi lo. Zeizat tal thlacham khawm ule, nan kut chu thisen a buaih hep ruangah kan ngâi piak na ding asi lo.

¹⁶Thiang ver hen a ṭâwl u. Thilsual nan ti mi ka muh mi tla hi bâng u.

¹⁷Asi, thilsual ti bâng ule, thildik ti a sîn u. Diknâk ti hen um mi tla chu zauh ule, nehsawh hen um mi chu ṭangpi na u, mi ngâkṭah tla ṭanh ule, numei tla hum na u,” a ti.

¹⁸LALPA nih, “Tuah thu kan rêl lai. Nan sualnâk chu sen khawmsele, vûr hâwi a vâr hen ka nan ṭâwl na lai. Nanna buaih mi chu sen duk rê khawmsele, samul hâwi hen nan vâr lai.

¹⁹Ka thu cho nan ngâi chun, ram lakah a suak mi thil ṭha tla nan ei lai.

²⁰Sikhawmsele nan ka siarlo mi asi chun, vânduai tak hen nan thi lai. Kei LALPA nih ka sim asi,” a ti.

²¹Khuapi zumhkâi tak chu mi hur â zuar mi hâwi asi rawh! Veikhat chu mirep tla hen an khat le, sikhawmsele tu lam chu mi thahtu karo an um.

²²Jerusalem, veikhat chu tangkasa hâwi na si, sikhawmsele tu lam chu zei rua khawm na tlâk lo rawh; uain ṭha hâwi na si le, sikhawmsele tu lam chun tî hâwi cho na si rawh.

²³Na ruitu tla chu hel hen mifîr tla hâwikawmh an si rawh; thilpêk leh nawhnâk duhtu an si kumza. Mi ngâkṭah tla khawm lâirêlnâk ah an hum na lo, numei tla thunawk sim mi khawm an ngâi piak duh na lo.

²⁴Churuangah tuah LALPA zeizawng tikho, Israel Pathian thiltikho tak nih a sim mi chu ngâi rawh. “Na lakah phû ka lam awt, ka mêlma leh nangnih nan ka nawktir lai lo rawh.

²⁵Na lakah thil ka ti awt. Thîr an tliangtir mi hâwi hen ka nan thiangtir lai le, na nawmhnâk zawzawng chu ka lawnh phin lai.

²⁶A lânah mi hâwi hen simhtu leh lâirêltu ka nan pêk lai. Churawhchun Jerusalem chu khuapi rep leh zumhkâi asi, an ti lai,” ti hen.

²⁷LALPA chu mirep asi ruangah Jerusalem leh chunah mikip sual rim rawh mi tla chu a hum na lai.

²⁸Sikhawmsele, a lakah sualtu leh heltu tla chu a veih na lai le; amah kaltâktu zawng chu a thah na lai.

²⁹Thing nan sawnh mi leh dûm thenhlimh nan siam mi tla chu nanna sîr lai rawh.

³⁰Oak thing a uai le, a thi awt mi hâwi leh dûm âukhawm tî tawih lo mi hâwi na si lai.

³¹Meichi nih fapawn a khangh mi hâwi hen mi thiltikho tla chu an thilsual ti nih a veih na lai le, chu siat leh râwknâk chu âukhawm nih an khap kho lai loh.