Read Bawm Chin ISAI 10 Bible Online

ISAI 10 - Bawm Chin bible

ISAI 10

¹Râwk leh siat hen na um rawh! Dân diklo tak hen nan siam le, ka mi tla nan nehsawh.

²Chubang hâwi hen mipâm tla chu thu nan neitir lo le, dik tak hen um ding khawm nan siang na lo. Churuang tak chun asi, mi ngâkṭah leh numei tla thil-le-rî nan lâk piak na mi chu.

³Pathian nih an rêp na tikah zeitin nan ti awt? Ram lât tak thawk hen nan siatnâk a hawng tlungtir tikah zeitin nan ti awt? Ṭangpitu hâwl hen zeiah nan tek awt? Nan neih zeiah nan thuh awt?

⁴Râltuknâk ah nan thi lai le, rêngtlâ hâwi hen a nan kalpi na lai. Sikhawmsele LALPA thinthawknâk chu a reh dah lai loh, rêp ding hen a bân a zangh nget lai rih.

⁵LALPA nih, “Asiria! Asiria chu ka thinthawktirtu tla lakah rêp ding hen talhbo hâwi hen ka mang mi asi.

⁶Asiria chu Pathian neilo mi phun ka thinthawktirtu tla do ding hen ka fial. Khualâi ah nâwmtâm hâwi hen lamh bêk na ding hen leh anmah râwk leh lâk piak na ding hen ka fial na.

⁷Sikhawmsele Asiria lal lianchem nih chun amah thinlung ah râwk ding hen tumnâk a nei. Phun tamtak siat leh râwk na ding a tum.

⁸“Thupêktu ka siam na mi vial chu lalchem an si ver.

⁹Kalno leh Karkemis khuapi tla, Hamat leh Arpad khuapi tla ka neh rawh. Samari leh Damaska khawm ka neh rawh.

¹⁰Milem sawnhtu lalram chu rêp ding hen ka kut ka phar, Samari leh Jerusalem ngâk hen milem tam dauhnâk tla chu.

¹¹Samari leh a milem tla zawzawng chu ka râwk rawh, chu hâwi ber hen Jerusalem leh chunah an sawnh mi milem sawnhnâk milem tla khawm chu ka ti awt,” ti hen â khâwng.

¹²Sikhawmsele, Lalpa nih, “Zion Tlâng ah leh Jerusalem ah thil ka ti mi ka lîm tikah, Asiria lal lianchem zûm hen â khâwng mi chu ka rêp lai” a ti.

¹³Asiria lal lianchem nih, “Keimah ngelchel nih chubang chu ka ti rawh. Kei chu mi chak leh mi fing leh mi fâifîm ka si. Phun tla karah ramri tla ka râwk le, an neih an siah an pumh mi tla chu ka lâk piak na. Chunah um mi tla chu chawchal hâwi hen ka lamhbêk na.

¹⁴Laikulh phun tla chu va bû hâwi cho an si, va ti tla lâk piak na mi hâwi hen an neih tla chu awldek hen ka lâk piak na. An thla hen khawm an hawng ka khâwng nawh lo; an kâ âng hen khawm an hawng ka râk nawh lo,” ti hen â khâwng.

¹⁵Sikhawmsele, LALPA nih, “Reitlung nih amah mangtu ngâk hen ka lian dauh a ti kho lai ma? Thing lahnâk sarai nih a lahtu sinah nang ngâk hen ka herh dauh a ti lai ma? Kutzâ chu minung lirhtu asi lo le, minung nih kutzâ chu a lirh dauh asi,” a ti.

¹⁶Awrkâ thaw tak hen anna châwm mi tla sinah LALPA zeizawng tikho nih anmah rêp ding hen râi a fial awt. An tak lakah mei mâ hâwi a durh vima lai.

¹⁷Pathian, Israel tla chêunâk chu mei asi lai. Israel Pathian thenhlimh chu meialh ah a hawng a chang lai le, chu nih chun ni khat ko ah thil zeizawng ling leh bua tiang a khangh hep lai.

¹⁸Tumun leh phâisen ṭha tak tla chu veih dep asi lai le, chu hâwi ber hen minung damlo hen thihnâk nih minung a veih lai.

¹⁹Thing tâwmtê cho a kâng bang a um lai le, ngâksiatê khawm nih an rêl hep kho lai.

²⁰Israel thibang tla chu a vei ding mi phun lakah anna ngauh lo ding mi tik a hawng tlung awt. LALPA Israel Pathian thenhlimh chu anna rinhsan tatak lai rawh.

²¹Israel mi tâwmtê cho an Pathian chak sinah an hawng kîr nawlh lai.

²²Israel mi tla chu tuah tipi kapah sep hâwi hen tam khawmsele, tâwmtê cho an hawng kîr lai. Siatnâk chu mi zapi tla rangah khawng asi le, an rangah siah ziar hen a um.

²³Asi, ram pumpi ah LALPA zahkâi Zeizawng tikho nih siatnâk ka tlungtir lai a ti hâwi hen a tlungtir awt.

²⁴LALPA zahkâi Zeizawng tikho rokual tak nih Zion ah um mi, a mi le tla sinah thu a sim le, “Aigupta mi tla nih an ti na mi hâwi hen an nehsawh na khawmsele Asiria mi tla chu ṭih na lah u.

²⁵Tam sâwt lo hen kan rêp na mi â lîm chun anmah ka veih na awt.

²⁶Kei, LALPA Zeizawng tikho nih Midian tla Oreb lungpi ah ka vuak na mi hâwi hen ka vuakfung hen ka vuak na lai. Asiria mi tla chu Aigupta ka rêp na mi hâwi hen ka rêp na awt.

²⁷Chu tikah chun Asiria thiltikhonâk lakah mi chu ka nan suah na lai le, nan liangah bah mi thilrit chu a um lai lo rawh,” a ti.

²⁸Mêlma kawrsen tla nih Ai khuapi chu an lâk rawh! Migron an pal! An eibâr chu Mikmas ah an mâk!

²⁹Liamnâk lampi ah an liam le, Geba ah an riak! Ramah khuapi mi tla chu an lâu le, lalchem Saul khuapi Gibeah mi tla chu an tek ver.

³⁰Galim mi tla, âu u! Lais ah mi tla, ngâi u! Anathoth mi tla, sâng u!

³¹Madmenah mi leh Gebim mi tla chu nung ding duh hen an tek.

³²Mêlma tla chu tusûn ah Nob khuapi ah an um le, Zion Tlâng ah Jerusalem khuapi ah an kuttum an lirh rawh.

³³LALPA Zeizawng tikho nih thing ṭeng hâwi hen a thlangh na lai. Anna zûmnâk leh sâng chem ah anna ruat mi tla chu hâu ving hen nâutir an si lai.

³⁴LALPA nih tumun sungah mi thing reitlung hen an hâu mi hâwi hen a hâu na lai le, Lebanon tlâng ah thing ṭha chem a tlû mi hâwi hen an tlû lai.