Read Bawm Chin ISAI 15 Bible Online

ISAI 15 - Bawm Chin bible

ISAI 15

¹Hi hi Moab thu ah thuchah chu asi: Zân khat ko ah Ar leh Kir khuapi chu veih asi le, Moab ram chu a dâi dep.

²Dibon mi tla chu tlâng mi mi thenhlimh thlân leiah ṭap ding hen an kâi. Moab mi tla chu Nebo leh Medeba khua ruangah thungâi an lung a fâk; an lungfâk ruangah an lû leh an khamul tla an mêt hep.

³Tual lâi ah zapi tla nih salâpuan anna aih le; khuapi kulh leh in tlûnah mi zapi tla chu an lungfâk le an ṭap.

⁴Hesbon ah mi leh Elealeh mi tla chu an ṭap le, an ṭap hâu chu lât takah mi Jahaz tiang nih an theih. Kawrsen tla men an thir le, an râlṭhatnâk a tlâu ving.

⁵Moab ruangah ka thinlung a fâk a! Mi tla chu Zoar khuapi ah leh Eklath Selisiah ah an tek. A zeimaw mi chu ṭap bû hen Luhith lam leiah an kal; a zeimaw mi chu lungzûr bû hen Horonaim leiah an tek.

⁶Nimrim Tivatê khawm a kang, a vakap mi bua tla khawm a uai ver le, a ring mi zeikhawm a um lo.

⁷Zeimaw mi chu an neih tla hen suak an tum le, Bakrimei Va an kanh.

⁸Moab ramri kipah ṭap hâu theih asi. Eklaim leh Beerelim khua mi khawm nih an theih.

⁹Dibon khua leiah tiva chu thî hen a sen tît le, Pathian nih mi tla rangah chunah khawm chun thil ṭhalo khun zeimawh a siah piak na. Asi, Moab ram ah um rih mi tla thahtu ding khawm an um lai.