Read Bawm Chin ISAI 17 Bible Online

ISAI 17 - Bawm Chin bible

ISAI 17

¹LALPA nih, “Damaska chu khuapi asi lai lo rawh le; thil râwk mi pawng cho asi lai rawh.

²Siria khuapi tla chu a vei pawt lai rawh. Ran leh dawrâ tla râwl tlatnâk asi lai le, chunah mi chu âukhawm nih an khalh na lai lo rawh.

³Israel chu vêngtu neilo asi lai le, Damaska nih mah thu hen a umnâk chu a vei lai rawh. Siria thibang tla chu Israel tla hâwi hen mualpho tak hen an um lai. Kei, Zeizawng tikho LALPA nih chu chu ka sim asi,” a ti.

⁴LALPA nih, Israel tla rokualnâk dawng ding ni chu a nâi rawh, a neihnâk chu pâmnâk nih a luah lai.

⁵Israel chu phâisen ah mi fâng an ât chia hâwi asi lai le, Rephaim vakuam ah mi phâisen sar hep hen a karo hen mâk mi hâwi asi lai.

⁶Mi tâwmtê cho a thibang an um lai le, Israel chu oliv thing a rah zawzawng kawih hep hen a tlûnlei ah a ṭeng pâr ah a rah panih pathum um mi mawh a tanglei ṭeng ah tâwmtê a um mi hâwi asi lai. Kei, Israel LALPA Pathian nih chu chu ka sim asi,” a ti.

⁷Chu ni a hawng tlung tik chun, mi nih anmah siamtu Israel Pathian Thenhlimh sinah ṭangpi duh hen an hawng a hawi lai.

⁸Anmah kut hen an siam mi leh anmah kutsuak pathiannu Aserah lem leh rimthâw duahnâk mâichâm an rinhsanh lai lo rawh.

⁹Chu ni a hawng tlung tik chun, ṭha tak hen vêng hen a um mi khuapi tla chu Hiv mi leh Amor mi tla nih Israel lakah mi an tek le, an khuapi chu siat leh râwk hen an mâk mi hâwi asi lai.

¹⁰Israel, lungpi a bir mi hâwi hen a nan humtu leh ruang a nan suahtu Pathian chu na philh rawh. Ramdang pathian sawnhnâk ding hen dûm thenhlimh lehlam na siam dauh.

¹¹Sikhawmsele na phun mi chu zîngleiah an hawng chawrh hen an pâr le, chu khawmah zeikhawm kawih ding a um dah lai lo. Lawksawngnâk leh dam kho lo mi nganfâk cho asi lai.

¹²Phun thiltikhonâk tla chu tipi rihâu hâwi hen leh tî tlingtlawk fâk tak mi hâwi hen hâu an suah lai.

¹³Phun tla chu tîlian a tlung mi hâwi hen an hawng le, sikhawmsele Pathian nih nun a simh na le, dunglei an kîr le, pangdâr mi valeidip leh fapawn thli nih a ranh mi hâwi an si.

¹⁴Zânlei ah chun ningṭihnâk an tlungtir le, zînglei ah chun an kal ving. Chu chu kan ram rûntu tla mikip tingvo chu asi.