Read Bawm Chin ISAI 2 Bible Online

ISAI 2 - Bawm Chin bible

ISAI 2

¹Hi bang thuchah tla hi, Juda leh Jerusalem thu ah Amoz fapa Isai sinah Pathian nih a pêk mi chu asi:

²Ni a hawng tlung ding mi lakah Biakin umnâk tlâng chu tlâng dang zawzawng ngâk hen a sâng chem mi asi lai le, tlâng zawzawng tlûn leiah a fawng lai. Phun tamtak tla chu tî luang hâwi hen an hawng lût lai.

³Chu tla nih chun, “Israel Pathian Biakin leiah LALPA tlâng ah kan kâi lai. A duhzia thil ti ding hen hawng kan sîntir lai; amah lampi thîm lakah kan kal lai. LALPA sîntirnâk chu Jerusalem ah a um lai le; Zion ah a mi tla sinah thu a sim lai,” an ti lai.

⁴Phun rokual tak lakah remlonâk thu ah lâi a rêl lai. An nâmsâu tla chu phâisen ah an dêng lai le, an fei tla chu phâisen nâwnnâk thîr zum rangah an dêng lai. Phun tla chu râltuk ding hen an kal lai lo rawh, râltuk ding khawm timhtuahnâk an nei lai lo rawh.

⁵Jakob thlâk tla, tuah LALPA nih chêu hawng kan pêk mi lakah kan kal lai!

⁶Pathian, na mi Jakob thlâk tla chu na kaltâk na rawh! Ram chu saklei leh Philistia ram thawk hen hawng mi dâwithiam tla hen an khat rawh. Mi nih ramdang umdân an châwng.

⁷An ram chu ngûn leh tangka hen a khat le, an neih kil khawm dih ti a um lo. An ram chu rang hen a khat le, an kari tla khawm dawng ti a um lo.

⁸An ram chu milem hen a khat le, anmah kut ngelchel hen an siam mi thil tla chu an sawnh.

⁹Mikip nâutir hen ningzak saih an si lai. LALPA, ngaihdam rîlmâl lah na!

¹⁰LALPA thinthawknâk leh a thiltikhonâk leh rokualnâk thawk hen ruangsuak ding hen tlâng ah lungpûk ah mawh khur an chawh mi sungah anna thup lai.

¹¹Minung khâwngnâk dawnghnâk, minung zûmnâk veihnâk a hawng tlung awt. Churawhchun LALPA amah cho chu chungnungtir hen a um lai.

¹²Chu ni ah chun LALPA zeizawng tikho nih mikip thiltikho tla, mi puar tla, mi zûm tla a nâutir na lai.

¹³Lebanon tlâng ah dar thing sâng tla leh Basan ram ah oak thing tla chu a râwk lai.

¹⁴Tlâng sâng tla leh tlâng tênau tla chu rualrang hen a siam lai.

¹⁵Kulh tla leh insâng tla khawm rual rang hen a siam.

¹⁶Lawnglian chem leh â dawh chem mi tla khawm a piltir lai.

¹⁷Minung khâwngnâk tla chu a dawng lai le, minung zumhnâk tla chu veih asi lai rawh. Milem tla chu veih phin asi lai le, LALPA amah cho chu chu ni ah chungnungtir hen a um lai.

¹⁹LALPA chu tual ninh ding hen a hawng kal tikah chun a thiltikhonâk leh a rokualnâk leh a thinthawknâk lakah mi ruangsuak ding hen, mi tla chu tlâng ah mi lungpûk ah leh khur an chawh mi sungah anna thup lai.

²⁰Chu ni a hawng tlung tik chun, an siam mi ngûn leh tangka milem tla chu an lawnh ving lai le, zabui leh balâk tla sinah an mâk lai.

²¹LALPA chu tual ninh ding hen a hawng tik chun, a thinthawknâk leh a rokualnâk leh a thiltikhonâk lakah mi chu ruangsuak ding hen tlâng ah mi pûk ah leh khur lakah anna thup lai.

²²Thi kho mi minung tla chu zumh lah rawh. Zei me an chawhchânnâk um?