Read Bawm Chin ISAI 23 Bible Online

ISAI 23 - Bawm Chin bible

ISAI 23

¹Hi hi Tura thu ah thuchah asi. Nang tisumsumriat ah lawng khalhtupa, ngaihsia hen âu rawh! Na dînnâk lawng mun Tura chu râwk asi rawh; a in leh a lawng dinhnâk khawm râwk asi rawh. Kupra thawk hen na lawng a hawng kîr liauah thâwng na theih rawh.

²Nannih Sidon ah sawlehtu tla, lawksawng tak hen um u!

³Aigupta ram ah an chîng mi fâng tla châwk le zuar ding hen phun zawzawng tla sinah sawleh ding hen tipi kanh hen mi tla na fial na.

⁴Sidon khuapi, na mualpho rawh! Tipi leh tisumsumriat rokual tak thûk tak nih a nan nawng rawh, “Fa rerêng ka nei lo. Fanu fapa khawm ka ring dah lo,” a ti.

⁵Aigupta mi tla khawm Tura â râwk ti an theih tik chun, an lâu khit lai le, an thla a kâm lai.

⁶Nannih Phoinikia mi tla, ngaihsia hen âu u! Ruangsuak ding hen Spain leiah tek ding hen tum u!

⁷Hi hi Tura khuapi sâwt tak um rawh mi lâwmnâk asi kho lai ma? Hi khuapi hi ma, tipi tan hen ram luahtu tla an fial na mi chu?

⁸Tura khuapi lian a sawlehtu lal fapa tla, tual tlûn mi lakah zahkâi chem tlûnah hi bang thil zawzawng hawng tlungtir ding hen ruattu hi âu me si?

⁹LALPA Zeizawng tikho nih a ruat mi asi. An thilti lakah anna zûm mi dawnghtir ding leh an mi zahkâi tla nâutir a tum mi asi.

¹⁰Nannih Spain ram ah mi tla, kal ule, ram lakah phâisen va tuah u! A nan vêng natu ding âukhawm an um lo rawh.

¹¹LALPA nih tipi tlûnah a bân a phar le, lalram tla chu a neh rawh. Sawlehnâk munpi chem Phoinikia râwk ding hen thu a pêk rawh.

¹²Sidon khuapi, na lâwptlonâk chu a dawng hen na mi tla chu nehsawh hen an um rawh. Kupra leiah him ding hen kal menza na khawmsele an him dah lai lo.

¹³(Tura khua tlûnah ramsa chêltirtu chu Asiria mi tla an si lo le, Babulon mi tla an si. Insâng tla hual hen Tura khua kulh tla siat hen khuapi râwk deptu chu Babulon mi tla an si.)

¹⁴Tisumsumriat ah lawng khalhtu tla, ngaihsia tak hen âu u! Nan ngauhsan mi khuapi chu â râwk rawh.

¹⁵Lal damsung kum sâwmsarih liau mi Tura philhnâk ding tik chu a hawng tlung awt rawh. Chubang kum tla a ral tikah chun Tura chu la lakah nunau â zuar mi an phuah mi hâwi asi lai:

¹⁶Na ṭingṭang put le, khuapi hêl rawh, nang, mipâm na hurnâk mâk rawh! Mi tla hawng kîr nawlh ding hen na ṭingṭang tum hen la sak nawlh.

¹⁷Kum sâwmsarih â lîm chun, LALPA nih Tura chu a sawlehnâk mun li leiah a kîrtir nawlh lai, laikulh lalram zawzawng amah nih a mang na lai rawh.

¹⁸A sawlehnâk ah a tawng mi tangka chu LALPA sinah ap asi lai. A kil ving lai lo le, LALPA sawnhtu tla nih buh châwknâk leh an nipuan herh châwknâk ah an mang lai.