Read Bawm Chin ISAI 24 Bible Online

ISAI 24 - Bawm Chin bible

ISAI 24

¹LALPA nih tual a râwk lai le, a karo hen a siah awt. Tual chu a rual tel lai le, mi tla a rek phin na lai.

²Mikip bâwlpu tla leh mi zapi, sal leh hotu, châwktu leh zuartu, lângtirtu leh pûktirtu, minei leh mipâm bang hep hen an thi lai.

³Tual chu siat leh râwk hen a um lai. LALPA nih a sim rawh mi chu ti hen a um lai.

⁴Tual chu a hul le, a uai; laikulh pumpi khawm a dî le; tual leh vân khawm a kuai vevê.

⁵Mi tla nih tual chu Pathian dân buar hen leh thudântuk zungzâl um ding mi chu râwk hen an nawmh.

⁶Churuang chun Pathian nih tual chu siat a barh. A minung tla chu an thilti man pêk asi. An dam mi tla khawm an tâwm dadauh.

⁷Grep zûn tla chu a uai le, uain khawm a tâwm rawh. Mikip lâwm tak hen an um rawh mi tla tu chun an ngaih a sia rawh.

⁸An tumphung ṭingṭang leh khuang hâu tla khawm a bâng rawh.

⁹Uain dinnâk ah lâwmnâk la sak hâu khawm a um lo rawh; a thâwtnâk ruangah â lâwm mi âukhawm an um lo rawh.

¹⁰Khuapi ah mi thil zeizawng chu a nawk, him ding duh hen mi tla chu an in anna renh khumh.

¹¹Uain a um lo rawh ruangah mi tla chu khua dungah an âu. Lâwptlonâk tla a um lo thlo rawh le; ram lakah mi tla a vei rawh.

¹²Khuapi chu râwk hen a um le, a kulh kawtkâ tla a chim.

¹³Hi hi laikulh pumpi phun kip sinah a tlung ding mi asi. Fâng zûn dih rawh mi, oliv kung kip ṭet phin vuak rawh mi leh grep zûn ah a rah kawih thluh rawh mi hâwi asi lai.

¹⁴A thibang tla nih lâwm hen la an sak lai. Thlanglei mi tla nih LALPA rokual zia an sim lai.

¹⁵Chun, saklei mi nih amah chu an sawr lai. Tipi dungah um mi tla nih LALPA Israel Pathian chu an sawr lai.

¹⁶Laikulh mun lât chem thawk hen Israel mi phun rep tak tla nih sawrnâk la an sak mi kan theih lai. Sikhawmsele, kei rang lam chun lungumnâk a um lo! Ka vei thlo rawh! Phehtu nih chun tleih a tum nget rih, zumh an kâi lo dadauh.

¹⁷Mikip nih ka thusim ngâi u! ṭihnungkâi, khur tla, thang tla nih a nan bawh na ko.

¹⁸Ṭihnungkâi lakah mi suak tumtu chu khur lakah a tlâ lai le, khur thawk hen suak mi chu thang nih a awh na lai. Ruah tukpi vân thawk hen tî tla hâwi hen a hawng sûr lai le, tual ram â nin lai.

¹⁹Tual chu a kuai hen a mân hen a kak lai.

²⁰Tual chu zurî hâwi hen a hâwr lai le, thlipi nih basâ a vamh mi hâwi asi lai. Laikulh chu a sualnâk nih a niamh lai; a tlû lai le, a thawknawlh lai lo rawh.

²¹LALPA nih tlûnlei mi thiltikhonâk leh tual tlûnah lâirêltu tla a rêp na ding mi tik a tlung awt rawh.

²²Pathian nih rêngtlâ hâwi hen khur sungah lal murui a khumh na awt. An rangah rêpnâk ni a tlung tik tiang hen a khâr khumh pang na awt,

²³Thlâ tla a thim lai le, nî khawm a chêu lai lo rawh, LALPA Zeizawng tikhotu chu lalchem asi awt ruangah Jerusalem mi Zion Tlâng ah lâi a rêl lai le, mi zapi ruitu tla nih a rokual zia an muh lai.