Read Bawm Chin ISAI 26 Bible Online

ISAI 26 - Bawm Chin bible

ISAI 26

¹Juda ram ah mi zapi tla nih hi la hi an sak ni ding a tlung awt rawh: Kan khuapi chu a bir! Pathian amah tak nih kulh chu a vêng!

²Khuapi kulh kawtkâ chu awng ule, phun zumhkâi thil dik titu phun ah mi tla chu lûttir na u.

³LALPA, nangmah nih, a nan zumhtu tla leh tumnâk bir tak neitu tla chu thlangamnâk rangtling pêk na.

⁴LALPA chu zumh kumza ule, amah nih hawng kan hum kumza lai.

⁵Â zûm mi minung tla chu a nâutir na le; an umnâk khuapi bir tla chu a râwk piak hen a kulh tla a chimtir le, valeidip ah a mântir.

⁶Nehsawh hen an um mi tla chu tu chun a tlûnah an kal rawh le, an kê hen an lamhbêk.

⁷LALPA, mi ṭha rangah lampi chu na tlawrtir le; an khualtlâwngnâk lampi khawm a râwn rawh.

⁸Na duhzia hâwi hen kan um le, nangmah lakah kan lungum; kan duh mi zawzawng chu nangmah na si.

⁹Zân ah chun ka thinlung zawzawng hen ka nan ngâi le, tual leh a mi tla lâi na rêl liauah a dik zia an theih ver lai.

¹⁰Misual sin khawmah vêl na nei le, thil dik ti lam chu an tum dah lo. Hi mirep umnâk ram khawmah hin thil diklo an ti nget rih; na rokualnâk theih ding an duh lo.

¹¹Na mêlma tla nih na rêp na awt mi an theih lo. LALPA ningzak saih na le, tuartir na rawh; rêpnâk na timhtuah mi chu tuartir na. Na minung tla na dâwt na zia muhtir na.

¹²LALPA, nangnih sul-le-lam tluangnâk na kan pêk lai; thil zeizawng kan tawng mi chu thil na ti mi ruangah asi.

¹³LALPA kan Pathian, midang tla nih kan lakah lâi an rêl le, sikhawmsele nangmah cho kan LALPA na si.

¹⁴Tu chun an thi rawh le, an nung nawlh lai lo rawh; an thlarau khawm a thawk nawlh lai lo rawh, nangnih na rêp na hen na veih na rawh dangâiah. Âukhawm nih an theih na lai lo rawh.

¹⁵LALPA, kan phun tla na ṭhangtir le, zei leikâng zawngah a ram chu na kauh le, chu nih chun na rangah zahkâi tak hen a nan siam.

¹⁶LALPA, na mi tla chu na rêp na le, ngaihsia tak hen na sinah thla an cham.

¹⁷LALPA, nangnih nunau nganfâk tuar a râk mi hâwi hen na kan râktir.

¹⁸Nganfâk tuar hen kan rûm le, sikhawmsele zeikhawm kan ring lêm lo. Kan ram rangah zei nehnâk khawm kanna ting lo; zeikhawm kan lîm mi a um lo.

¹⁹Kan minung thi rawh mi tla chu an hawng nung nawlh lai! An taksa nungnâk nei hen an hawng kîr nawlh lai. An thlân ah it rawh mi zawzawng tla chu an hawng a ṭhang lai le, lâwm hen la an sak lai. Dâmtî nih tual a thartir mi hâwi hen sâwt tak a thi rawh mi tla chu LALPA nih a nungtir nawlh lai.

²⁰Ka mi tla, nan in sungah va kal ule, in a khâr khumh pang u. Pathian thinthawknâk a reh lân lo chu hun sâwtlotê va a thup rih u.

²¹LALPA chu vân ah a umnâk thawk hen tual ah mi tla an sual ruangah rêp ding hen a hawng kal. A thuptê hen tual tlûnah mi thahtu tla khawm a puang lai le, thah hen a um rawh mi tla khawm tual nih a thuh lai lo rawh.