Read Bawm Chin ISAI 28 Bible Online

ISAI 28 - Bawm Chin bible

ISAI 28

¹Israel lalram chu a vânduai rawh! A rokualnâk chu a ruitu zurî lû ah chawmpâr lallukhuh hâwi hen a nawh rawh. Anna zumhnâk lû chu rimthâw an thuh le, sikhawmsele chunah chun zurî bû hen an rîl ko.

²LALPA nih âumawh mi chak leh thiltikho tla anmah do ding hen tîm chia zet a nei le, zeimaw mi chu thli leh ruahpi lakah rial hâwi, a zeimaw mi chu ruah tukpi hâwi, a zeimaw mi chu tîlian fek tak hâwi hen an hawng kal lai le, chu tla chu ram an khat zat lai.

³Chubang ruitu zurî zûm tak tla chu kezaphah tangah lamhbêk hen an um lai.

⁴Chubang mizûm ruitu tla rokualnâk vei ding mi chu theipi a tikah min masachem mi tla ei sawm vima mi hâwi hen an vei lai.

⁵LALPA Zeizawng tikho chu chawmpâr lallukhuh rokual tak hâwi hen a mi le tla thibang rangah a hawng kalnâk ni chu a nâi rawh.

⁶Lâirêltu tla sinah chun dik tak hen theihnâk a pêk na lai le, dotu tla lakah khuapi kulh kawtkâ vêngtu tla chu râlṭhatnâk a pêk na lai.

⁷Khuavâng leh bâwlpu tla tiang men zû an rî le an hâwr. Uain leh a hâng tla an din tam tuktarâi le, an tlû le, anna nawk. Khuavâng tla khawm an din zia a tam tuk ruangah langhnâk tla Pathian nih a hawng pêk mi an theihthiam lo, bâwlpu tla khawm uain an din tam tuktarâi le, thurêl ding an hawng put mi tla rêl kho lo hen an um.

⁸An tonâk dawhkân chu luak hen a khat le, thiang mi mun rêng a um lo.

⁹Ka lakah an chipchiar. “Mi nih sîntir hen ka um a ti theih hen âu nih zûl? A thuchah chu âu nih herh hen a theih? Fasêm nûk tlei rawh mi rang lâwng ah a ṭha asi!

¹⁰A lasui ṭial vima leh a tlar tlar hen leh sîn ding ruat vima hen sîntir ding hawng kan tum,” an ti.

¹¹Ka thu nan ngâi duh lo mi asi chun, ramdang minung hawlh mang hen leh hawlh hâu dang chê tak mang hen Pathian nih sîn ding mi chu a nan sîntir na lai.

¹²Nan ektê hen dînnâk leh thlangamnâk a nan pêk na le, sikhawmsele a thu nan ngâi duh lo.

¹³Churuangah asi, LALPA nih a lasui ṭial vima leh a tlar tlar leh sîn ding mi ruat vima hen an sîntir na awt mi chu. Churawhchun nan kê kâr kipah nan tlû lai. Liamh hen nan um lai le, thang nih an awh na lai le, rêngin ah an put na lai.

¹⁴Tuah nannih mi zauhnawmh mang, Jerusalem ah hi bang mi tla tlûnah lâirêltu tla, LALPA thusim ngâi u.

¹⁵Thihnâk hen thutiamnâk siam hen nanna zûm le, laikulh thihnâk hen remnâk nan phanh rawh. Siatnâk a hawng tlung tikah zuah na ding hen nanna ruat, perpetnâk leh âwkrâwl thu lakah him ding nanna ngauh ruangah.

¹⁶Hi hi, tuah, LALPA zahkâi nih, ‘Zion lungphun bir tak leh chak tak ka siah. Chu lakah chun a ki mi lung ka siah le, chu lakah thu tla rîn mi ka siah, ‘Lungnâk bir tak chu a felfê ber asi.’

¹⁷Diknâk chu lungphûm rangah tahnâk asi lai le, zumhkâinâk chu a thûk zia tahnâk asi,” a ti. Thli leh ruah lakah mi rial nih nanna ngauhsan âwkrâwl tla chu a hûi peng lai le, nanna humnâk chu tîlian nih a veih lai.

¹⁸Thihnâk hen thutiamnâk nan siam mi chu a vei lai le, laikulh thihnâk hen remnâk nan siam mi chu râwk asi lai. Siatnâk nih a hawng niamh chun neh hen nan um lai rawh.

¹⁹Zîng siar hen a nan vuak lemang na lai. A sûn a zân hen nan tuar lai. Pathian thawk hen thuchah thar kip nih ṭihnungkâi thar a hawng tlungtir lai.

²⁰Thufing nih, ihkhun tâwi tuk mi lakah it tumtu nih â zangh awt khawmah a tâwi tuk, puan â vurh awt khawmah a ting lo ti mi hâwi nan si lai.

²¹LALPA nih Perazim Tlâng ah leh Gibeon vakuam ah ti mi hâwi hen a do na lai le, a thilti lakah a chê zia langhtir a tum mi hâwi hen khan. A thil thup rianṭuan tla a lîm lai rawh.

²²Simhkannâk ka nan pêk mi lakah ni salam lah! Chu hâwi hen na ti chun, na rangah suak ding a har salam lai. LALPA Zeizawng tikho nih ram pumpi râwk ding hen a thlûk mi thu ka theih.

²³Ka thusim hi ngâi le; thu ka nan simh mi lakah hin na nâ thlîr rawh.

²⁴Phâisen nâwntu âukhawm an phâisen nâwn ding hen an kal lai lo le, an thlâi chî tuh ding hen khawm anna tîm lai lo.

²⁵Tual chu a timhtuah le, dill (chabanak) leh kumin (bawhawk) belh chî tla a vawrh. Fâng chu a tlar hen a tuh le, a phâisen rîlah fâng dang a tuh.

²⁶Pathian nih a sîntir ruangah a rianṭuan ding dân chu a theih.

²⁷Dill chî leh kumin chî thlawngh ding hen talhbo rit an mang dah lo; a vuaknâk fung tâwk cho a zâng mi an mang dauh.

²⁸Fâng chu vei salam ding hen bâng lo thlo hen an chîl lo le, kari chu fângmal mân lo ding hen a khalh liau khawmah chîl ding dân chu an theih ko.

²⁹Chubang finghnâk zawzawng chu LALPA Zeizawng tikho thawk hen mi asi. Pathian thiltum chu finghnâk asi le, anna dingchang kumza asi.