Read Bawm Chin ISAI 29 Bible Online

ISAI 29 - Bawm Chin bible

ISAI 29

¹Pathian mâichâm, Jerusalem tak chu a vânduai rawh! David umnâk khuapi chu a vânduai! Kum dang mawh kum nih mawh hawng tlung hen ral seh, a puai leh a kût ni tla ral sele,

²“Pathian mâichâm” an ti mi khuapi tlûnah siatnâk Pathian nih a hawng tlungtir lai. Ṭapnâk leh lungfâknâk a um lai le, khuapi pumpi chu thisen nih mâichâm a tuam mi hâwi hen a um lai.

³Pathian nih khuapi a do lai le, kulh dak hen a hual lai le, a râwk lai.

⁴Jerusalem chu tual tang thawk hen thlarau a hawlh mi hâwi leh valeidip thawk hen aw dal riah a hawng suak mi hâwi asi lai.

⁵Jerusalem, ramdang minung a nan dotu tla chu valeidip sêm phin mi hâwi an si lai le, an kawrsen ṭihnungkâi tla chu fapawn hâwi hen an zuang phin lai.

⁶Lâkkhatko ah ruatlo hâwi tak hen LALPA Zeizawng tikho nih ruah tukpi lakah khua a rî mi leh linîn hen ruang a nan suah na lai. Thlipi leh meialh a hawng fial lai le;

⁷churawhchun, phun kawrsen tla Pathian mâichâm umnâk khuapi dotu tla chu an râlthuam leh an thuamthil zeizawng zân ah mi mang leh thil dawn tla hâwi hen a vei lai.

⁸Jerusalem do ding hen phun zawzawng hawng a pûm mi tla chu, mi sungvâng nih a mang ah buh a ei le, a hawng a ṭhang le, a sung a vâng nget mi hâwi leh mi a tîhâl hen a thi awt mi nih a mang leiah tî a din le, a hawng a ṭhang le, a rawm a hul hiam mi hâwi asi lai.

⁹Mâilei ah kal le, mâwl tak hen um! Mâilei ah kal le, mitchâw hen um! Uain lo thlo hen rî nek hen um! Zut khat khawm din lo hen hâwr!

¹⁰LALPA, nih a nan ngûtir, ihmu thaw tak it ding hen a râlring. Khuavâng tla chu mi zapi tla mit an si lai le, sikhawmsele, Pathian nih an mit a tuam piak na.

¹¹Khuavâng tla nih langhnâk an muh mi thu umzia chu nan lakah thuh asi lai; singsiahnâk lasui zual hâwi asi lai. Midang âumawh a rêl thiam mi sinah nan va kalpi hen an rêl piak na ding ngiar khawm ule, singsiah mi asi ruangah ka ti kho lo a ti lai.

¹²Mi âumawh a rêl kho lo mi sinah nan va pêk hen a nan rêl piak na ding hen ngiar khawm ule, zei hâwi asi ka theih lo ti hen a nan sâng na lai.

¹³LALPA nih, “Hi minung tla nih hin sawnh ding an ka tum le, sikhawmsele an thu chu zeikhawm asi lo le, an thinlung khawm kâng dang ving asi. An phung mang dân chu zeikhawm asi lo, minung dân leh anmah pipu dân an theih salam mi cho asi.

¹⁴Churuangah ruat lo hâwi tak hen lâu khit hen ka vuak nûnah ka vuak nawlh na lai. Mifing si mi tla chu mi â an hawng si lai le, an finghnâk zawzawng tla chu mang tlâk asi loh,” a ti

¹⁵An thinlung LALPA lakah thuh tumtu tla chu an vânduai! A thuptê hen thilti ding an tum mi chu âukhawm nih muh ding hen leh theih ding hen an ruat lo.

¹⁶Thil zeizawng a let palai hen an siam hep. Sunhtlung valei leh bel hêmtu a zei mi a herh dauh? Thilsiam nih a siamtu sinah, “Na ka siam mi si loh,” mawh “Thil na ti mi chu na theih lo,” a sinah a ti kho mazei?

¹⁷Sâwtlotê ah tumun sah tak chu lo tuahnâk ram asi lai le, lo tuahnâk ram chu tumun sah tak ah â chang nawlh lai ti mi hâwi hen.

¹⁸Chu ni a hawng tlung tik chun, mi nasêt tla nih hâu fâk tak hen lasuibu an rêl mi chu an theih kho lai le, mitchâw mûi nâwngah a um mi tla nih an mitdei hen an muh lai.

¹⁹Mipâm leh mi nâutâ tla chu LALPA Israel Pathian thenhlimh nih lâwmnâk a pêk na mi an tawng nawlh lai.

²⁰Midang tla nehsawhtu leh Pathian rangah zauhnawmhtu tla dawnghnâk asi lai rawh. Misual zawzawng veih an si lai rawh.

²¹Midang simsâwitu tla, dân buartu tla rêp ding mi khaptu, mi zumhkâi nih diknâk tawng lo ding hen âwkrâwl thusimtu tla chu Pathian nih a veih na lai.

²²Churuangah tuah LALPA Israel Pathian, lawksawng liauah Abraham rangah ruangsuahtu nih, “Ka mi tla, nan ningzak kumza lai lo rawh, ningzak ruangah nan mêl â dang kumza lai lo rawh.

²³Fa ka nan pêk na ding mi nan muh tikah chun, kei hi Israel Pathian thenhlimh ka si ti nan theihtir lai. Nan ka zah lai le, chê nan ka ti hen nan dîr lai.

²⁴Mi mâwl nih a theihthiam lai rawh, chipchiar kumza mi tla chu a sîn ding hen anna lâwm lai rawh,” a ti.