Read Bawm Chin ISAI 3 Bible Online

ISAI 3 - Bawm Chin bible

ISAI 3

¹Tuah Lalpa, LALPA Zeizawng tikho nih Jerusalem ah mi leh Juda lakah mi thil zawzawng leh mi zawzawng nih anna ngauhsannâk zawzawng a lâk ving awt.

²An buh leh an tî, an mi ralṭha leh an kawrsen tla, an lâirêltu leh an khuavâng tla, an chamchawh thiam tla leh an mi thiam tla,

³an râltuk kawrsen tla leh zapi minung ruitu tla, an mi thuthiam tla leh thil a hawng um ding mi theih ding hen dâwi mangtu tla a lâk ver na awt.

⁴LALPA nih zapi minung tla lakah mipa ngâksia a ṭhang zawh lo mi lâirêltu ah a mang awt.

⁵Khatlei khatlei a nâuneh tawnh hen an um lai. Seino tla nih anmah ngâk upa an zah lai lo le, zeikhawm chawhchân lo mi tla khawm nih an hotu an zah lai loh.

⁶Chi khat lakah thurêltu tla nih an tam dân hâwi hen mi pakhat an thîm ni tik a hawng tlung lai le, a sinah, “Nang chu nei lo khawm le ruk ding zeimawh na nei, churuangah hi nawknâk lakah hin hawng kan ruitu si rawh,” an ti lai.

⁷Sikhawmsele, anih nih, “Kei si lah seh! Ka nan ṭangpi kho na lo. Buh leh nipuan khawm ka nei lo. Nan ruitu ah hawng ka siam lah u,” ti hen a sâng lai.

⁸Asi, Jerusalem chu â râwk rawh! Juda chu a tlû rawh! An thusim leh an thilti zawzawng chu LALPA donâk hep asi; fiang tak hen Pathian khawm an siarlo.

⁹An thinlung ruat chu anmah lakah a tlâ lai. Sodom mi tla hâwi hen langngân hen thilsual an ti. Anna râwk le, anmah tlûnah an tlungtir.

¹⁰Mirep tla chu anna lâwm lai le, an rangah thil zeizawng a tluang lai. An rianṭuan tha fâk lakah anna lâwm kho lai.

¹¹Sikhawmsele misual chu siat leh râwk hen an um le; midang tlûnah thil an ti mi tla chu anmah tlûnah ti hen a um lai.

¹²Tangka pûktirtu tla nih ka mi tla an nehsawh na le, lei anna batnâk tla nih an perpet na. Ka mi le tla, an rui natu tla nih a mahlo leiah an kalpi na le, churuangah zei lei lampi ah pial ding asi ti nan theih loh.

¹³LALPA chu a thunawk sim ding hen tîm zet hen a um le, a mi tla lâirêl ding hen â tîm zet rawh.

¹⁴LALPA nih a mi le tla lakah upa leh ruitu tla chu lâirêl piak na ding hen a put na. Hi phiarnâk hi a siam: “Mi grep dûm tla nan va rawk le, mipâm thil nan lâk mi hen nan in tla nan khattir.

¹⁵Ka mi tla siat leh rawk ding leh mipam tla nâuneh ding hen thuneihnâk nan nei lo. Kei LALPA Zahkâi, Zeizawng tikho nih chu chu ka sim asi,” a ti.

¹⁶LALPA nih, “Zauhnik u, Jerusalem nunau zumh zia khi! An vântâu bû hen an kal. Pherh tak hen an um. Dînpei hen an kê an kâr le, an kêreng ah mi kekhâng âwn sisir hen.

¹⁷Sikhawmsele ka rêp na lai le, an lû ka mêt na lai le, kâwng lel hen ka siah na lai,” a ti.

¹⁸LALPA nih Jerusalem khua mi nunau tla nih, anna zûm phah mi anna ruk mi thuam, an kê khâng tla, an lû ah mi tla, an ngâwng ah mi tla,

¹⁹an tâi ah mi tla a lâk piak hep na ding mi ni a hawng tlung awt. An nipuan khuh tla leh an lukhuh tla;

²⁰dâwithiam tamh mi an bân ah leh an tâi ah anna khimh mi tla;

²¹an kutdawng mi pizung leh an nâr ah anna thlaih mi tla;

²²an kawrfual dawh tak zawzawng tla, nunau kawrfual tla, mipa kawrfual tla leh tangka sâwngkhâwi tla;

²³suak leh langhnâk thuam tla, an mêl nâwtnâk puannêm leh upâwng tla, an lû khuhnâk puan sâu tla lâk ver asi lai.

²⁴Rimthâw mang ding ngâk hen an rim lam a sia lai; tâisâwm ṭha sâwm ding ngâk hen rirual hen tâi anna sâwm lai; sam dawh nei ngâk hen an lû lam a kâwng lai; puan ṭha aih ngâk hen salâpuan anna aih lai. Anna dawhnâk chu ningzakkâi hen a hawng um lai.

²⁵Asi, khuapi ah mi tla, a chak chem mi tla khawm râltuknâk ah an thi lai.

²⁶Khuapi kulh kawtkâ chu a lungfâk hen a ṭap lai, khuapi chu nunau nipuan lît rel hen a to mi hâwi hen a um lai.