Read Bawm Chin ISAI 30 Bible Online

ISAI 30 - Bawm Chin bible

ISAI 30

¹LALPA nih thu a sim le: “Juda lakah lâirêltu tla chu ka lakah an hel ruangah an vânduai! Keimah siam lo mi thiltum an zûl le, keimah duhlo kâng hen remnâk dingah min an rîn le, mi pakhat sual midang tlûnah an thang asi.

²Keimah thu lo hen Aigupta ah ṭangpi sâwm ding hen an kal. Anmah humtu ding ah Aigupta chu an duh le, churuangah Aigupta lalchem lakah anna ngauh.

³Sikhawmsele lalchem chu anmah ṭangpi ding hen thiltikhonâk a nei lai lo le, Aigupta nih a humnâk chu siatnâk hen a dawng lai.

⁴Anmah ram ruangrûl ah ruat mi chu Aigupta khuapi tla Zoan leh Halles ah tlung rawh khawmsele,

⁵Juda mi zapi tla nih phun zumhtlâklo tla chu anmah ṭangpi ding hen an zumh mi nih a ṭangpi na kho lo tikah anna sîr lai,” a ti.

⁶Hi hi marlei kângah ramkaro ah mi ramsa tla thu ah Pathian thuchah asi: “Ram ruangrûl ah ruat mi tla chu ram ṭihnungkâi, chakeibaknei tla, rûl tûrnei tla leh rûlpi a zuang mi umnâk ah an kal. An sanatung leh an sangâwngsâu tla chu anmah ṭangpi kholotu ding mi phun rangah pêk ding hen thilpêk man tamtak tla an phurhtir.

⁷Aigupta nih a ṭangpi na mi chu zeikhawm asi lo. Churuangah Aigupta chu ‘Rûlpi Tûr neilo’ ti hen min telê ka phuah,” a ti.

⁸Pathian nih mi tla chu zei hâwi an si lasuibu lakah rîn ding hawng ka simh le, zei hâwi tluk an sual ti singsiah kumzanâk ding hen.

⁹Pathian lakah an hel kumza, âwkrâwl thu an sim kumza, LALPA sîntirnâk ngâi ding an êl kumza.

¹⁰Khuavâng tla chu dâisip um ding hen an simh na. “Thudik rerêng kan sinah sim lah u. Kanmah ngâi duh mi hawng kan simh u. Kan perpetnâk hi kan thlah ding asi lo.

¹¹Kan lampi ah mi suak ule, lam hawng kan kham mi hi bâng u. Nan Israel Pathian thenhlimh thu rerêng theih ding kan duh lo,” an ti.

¹²Sikhawmsele, hi hi Israel Pathian thenhlimh nih a sim mi asi: “Thu ka nan simh na mi chu ngâi ding nan duh lo le, râwknâk leh perpetnâk ah nanna ngauh.

¹³Nan sual rawh. Vâm sâng tak a kak le, a chim mi hâwi nan si; nan tlû sawm lai.

¹⁴Tualbêl hâwi hen nan kuai hep le, a kuai zia a fâk tukah, meiṭil sarnâk tâwk ding men a lian mi a um lai lo, tipang ah tî sâwknâk rang khawm a tlâk lai lo,” a ti.

¹⁵LALPA zahkâi, Israel Pathian thenhlimh nih, mi zapi tla sinah thu a sim le: “Hawng kîr ule, keimah lakah dâisip hen hawng a ngauh u. Chu tikah nan chak hen nan him lai,” a ti. Sikhawmsele, nan êl.

¹⁶Chu hâwi um ding ngangâk hen nan mêlma lakah him ding hen rang chak tak tlûnah chuan ding lam nan tum. Nan dik ngâk, suak ding chu nan tum ding rerêng! Nan rang tla chu chak tâwk ual ding hen nan ruat le, sikhawmsele a nan ṭhâwl natu chu a chak dauh lai.

¹⁷Mêlma kawrsen pakhat nan muh chun, mi sâng khat nan tek lai, an tektir phin na ding hen kawrsen panga cho khawm â tâwk lai. Tlâng ah riangvâi tak hen puanzâr fung pakhat cho lo chu nan kawrsen pakhat khawm a him lai lo.

¹⁸Chu hâwi asi khawmah LALPA lam chu nan lakah khua a ruat nget rih. Thil dik a ti kumza mi asi ruangah nan lakah lungkhamnâk a nei kumza. LALPA ngauhsantu tla chu an thaw a suak.

¹⁹Nannih Jerusalem ah um mi tla, nan ṭap lai lo rawh. LALPA chu mi siherhnâk nei mi asi le, amah ṭangpi deih hen nan auh chun a nan sâng na lai.

²⁰LALPA nih tik harsa zawzawng a nan tuartir na lai le, sikhawmsele, nanmah sîntir ding hen amah ngelchel a um lai le, nannih nih amah rangah nan hâwl ding a herh lai lo rawh.

²¹Vawrhlei ah mawh kehlei ah mawh vâi khawm ule, nan dunglei ah hi hâwi thu a sim mi nan theih lai, “Hinah lampi a um hi! Hinah kal u,” ti hen.

²²Nan milem tla tangka hen nan luanh mi leh ngûn hen nan luanh mi chu nâwmtâm hâwi hen nan lawnh ving lai le, “Ka mitmuh ah um lah!” nan ti lai.

²³Zeiliau khawmah nan thlâi chî tuh lakah LALPA nih kho ding hen ruah a sûrtir lai le, fângzûn liauah neih leh siahnâk an pêk na lai le, nan ranrual tla khawm nih ram nah ningno tamtak an nei lai.

²⁴Chawchal leh sanatung phâisen nâwntu nih râwl ṭha chem leh duhkâi chem an ei lai.

²⁵Nan mêlma kulh tla nan lâk ni ah leh an mi tla nan thah ni ah chun, tinungva chu tlâng kip leh mual kip thawk hen a hawng luang lai.

²⁶Thlâ chu nî hâwi hen a hawng chêu lai le, nî chu ni dangah mi a chêu lehsarih hen a chêu lai le, ni sarih chêu kha ni khat ah fawnh hep mi tluk asi lai. Hi bang zawzawng tla hi LALPA nih a mi tla liam mâ damh hen a tuam ni ah a hawng tlung lai.

²⁷LALPA rokualnâk leh thiltikhonâk chu a râltlâng hen muh kho asi lai. Mei leh a khû nih a thinthawknâk a zauhtir. Thu a sim le a thu nih mei hâwi hen a khangh.

²⁸A mâilei ah thli a fial le, tîlian nih thil a fenh hep mi hâwi asi. Siatnâk ah phun tla chu a phiat dep na le, thilsual an tum mi chu a dawnghtir.

²⁹Sikhawmsele, nannih Pathian mi tla, zân puai thenhlimh ah nanna lâwm hen la nan sak mi hâwi hen nan lâwptlo lai. Israel Vêngtu LALPA Biakin leiah tumphung theikhang tla hen lâwm tak a kal mi hâwi hen nan um lai.

³⁰LALPA nih a lâirêl diknâk chu mikip rangah a theihtir lai le, a thinthawknâk fâk tak a theihtir na lai. Chunah chun, meialh tla, sûmpi tla, rial tla, ruah tukpi tla a hawng um lai.

³¹Asiria tla nih LALPA hâu an theih rawh chun an lâu lai le, a rêpnâk fâk tak an theih lai rawh.

³²LALPA nih anmah a vuak lemang na liauah a mi tla chu tumphung khuang leh ṭingṭang tum hen an um lai. Pathian amah tak nih Asiria mi tla a do na awt.

³³A lân thawk hen Asiria lal lianchem duahnâk mun mei humpi chu timhtuah asi rawh. A thûk hen a kâu le, thing châr sâng tak an pawng tung. LALPA nih kâng ding hen a kâ mi meialh a thaw hen a hawng suah lai.