Read Bawm Chin ISAI 32 Bible Online

ISAI 32 - Bawm Chin bible

ISAI 32

¹Zei tik ni mawh chun lalchem dik tak a lâirêltu leh phun ruitu tla lakah diknâk hen lâirêltu a hawng um lai.

²An ektê hen thli lakah dawrnâk leh thlipi lakah thupnâk mun an si chiau lai. Ramkaro ah tinungva tla a luang mi hâwi leh ram lâwng ah lungpi lian tak thlaliah hâwi an si lai.

³Zapi minung thilherh lakah an nâ a fîm hen an mit a dei lai.

⁴Felfê lo hen an um lai lo rawh le, theihthiamnâk nei hen thil an ti lai le, thil an tum mi chu an sim lai.

⁵Âukhawm nih mi â chu mi zahkâi mawh misual chu mi zumhkâi an ti lai lo.

⁶Mi â nih chun â tak hen thu a sim le, thilsual ti ding mi a dawn. A thilti leh a thusim chu LALPA siarlonâk hep asi le, mi sungvâng rangah buh a pêk dah lo, mi tîhâl rang khawmah din ding a pêk dah loh.

⁷Mi mâwl chu a sual le, thilsual a ti; mipâm tâ chu âwkrâwl hen veitir a tum.

⁸Sikhawmsele, mi zahkâi tla nih zumhkâi tak hen thil an ti le, diknâk ah bir tak hen an dîr.

⁹Nannih nunau nuamsabut hen umtu tla, lawksawngnâk neilo hen umtu, ka thusim hi ngâi u.

¹⁰Tu lam chu nan khim ma chu, kum vei tu tik dingah lungdawng hen nan um lai rawh, grep kawih ding mi nan nei awt lo rawh ruangah.

¹¹Nuam tak hen nan um le, lawksawngnâk khawm nan nei lo; tu lam chun lâu hen thir u! Nan nipuan tla lît ule, nan puan sia hen a sâwm u.

¹²Nan phâisen mun ṭha tak leh grep zûn â râwk rawh ruangah leh

¹³ka mi le tla ram ah bua leh lingnei a hawng kho rawh ruangah ngaihsia hen nan thin makâ chumh u. Mi zapi tla lâwptlonâk in zawzawng leh nuamnâk hen a khat mi khuapi ruangah ṭap u.

¹⁴Lal in tla chu kaltâk hen a um lai le, khuapi chu an roh thlo lai. In tla leh kulh vêng hen a um mi tla chu â râwk pawt lai rawh. Ram sanatung tla chunah chun an tlawng lai le, dawrâ rual nih chunah chun râwl tlatnâk an tawng lai.

¹⁵Sikhawmsele, veikhat chu Pathian nih kan lakah a thlarau a hawng fial nawlh lai. Ram â râwk rawh mi chu a hawng ningno nawlh lai le, phâisen tla khawm nih thlâi tamtak a hawng suah nawlh lai.

¹⁶Ram sung mun kipah repnâk leh diknâk hen thil ti asi lai.

¹⁷Mikip nih thil dik an ti ruangah himnâk leh thlangamnâk a um kumza lai rawh.

¹⁸Pathian mi tla chu lawksawngnâk an nei lai lo rawh le, an in tla him tak hen leh thlangam hen a um lai rawh.

¹⁹(Sikhawmsele thing mun ah rial a tlâ lai le, khuapi chu a chim lai.)

²⁰An thlâi chîng rangah tî a tam ruangah leh an sanatung leh ranrual rangah munkip a ningno ruangah mikip thungâi anna lâwm lai rawh.