Read Bawm Chin ISAI 34 Bible Online

ISAI 34 - Bawm Chin bible

ISAI 34

¹Phun zawzawng lakah mi tla, hawng u! Hawng a pûm ule, ngâi u. Tual leh a tlûnah um mi zawzawng hinah hawng ule, ngâi u.

²LALPA chu phun zawzawng leh an kawrsen zawzawng lakah a thin a run. Siat leh râwk ding hen a mawhtir na.

³An ruak tla chu phûm asi lai lo le, chunah chun a thû lai le, a mân lai; tlâng chu thî hen a sen tût lai.

⁴Nî, thlâ leh ârfi tla valeidip hâwi hen an mân dip lai. Vân chu lasuibuzual mi hâwi hen vei ving hen zual asi lai, ârfi tla chu grep leh theipi nah an tlawng mi hâwi hen an tlâ lai.

⁵LALPA nih a nâmsâu chu vân ah a timhtuah le, tuah Edom mawhtir hen râwk a tum mi chu a vuak awt.

⁶A nâmsâu chu bâwlnâk dawrâ leh kêl thisen leh thâu â buaih mi hâwi hen an thisen leh an thâu â buaih lai. LALPA nih hi bâwlnâk hi Bozrah khuapi ah a ap lai le; hi thahnâk rokual tak hi Edom ram ah a umtir awt.

⁷Mi zapi tla chu chawchal leh chawchal tuai hâwi hen an tlû lai le, tual chu thî hen a sen lai le, thâu nih a khuh lai.

⁸Hi hi LALPA nih Zion ruang a suahnâk leh a mêlma tla phû a lam ding mi tik chu asi.

⁹Edom ram ah tiva tla chu lawngnâi ah â chang lai le, a tual tla chu kât ah â chang lai. Ram pumpi chu lawngnâi hâwi hen a alh lai.

¹⁰A sûn a zân hen a kâng lai le, chu lakah meikhû chu kumleza hen a suak lai. A ram chu a kum kum hen â râwk lai, âukhawm ram sungah anna sawk rêng lai lo rawh.

¹¹Sûmbuh leh langâk tla nih ram chu an luah lai. LALPA nih lâwngtleng hen a siam nawlh lai le, thilsiam um lân mi hâwi hen.

¹²Ram lakah lâirêltu ding lalchem khawm a um lai lo rawh, ruitu zawzawng tla khawm an vei hep lai rawh.

¹³Ling leh bua tla chu lal in leh kulh mi khua tla lakah a kho lai le, kâwlui leh sûmbuh tla a sungah an um lai.

¹⁴Ramsa tla chunah an tlawng lai le, khuri tla anna âu tawnh lai. Zân ah khurinu dinhnâk mun hâwl hen a hawng lai.

¹⁵Chunah chun sûmbuh tla nih bû an khuar lai, an ti lai, an fa an awp lai. Chunah chun ruaklâwmmû a tlawt tlawt hen anna pûm lai.

¹⁶LALPA thilnung siam mi lasuibu ah hâwl le, zei a sim rêl rawh. Hi bang thilsiam lakah pakhat khawm relh asi lai lo, a bawp um lo mi pakhat khawm a um lo. LALPA nih chu hâwi hen um ding hen thu a pêk, amah tak nih a pumh na lai.

¹⁷An lakah ram ṭhenh zârtu leh tingvo chiau pêktu chu LALPA asi. A kum tlâitluan hen chu ram ah chun an um lai le, anmah tâ asi kumza lai.