Read Bawm Chin ISAI 36 Bible Online

ISAI 36 - Bawm Chin bible

ISAI 36

¹Juda tla lalchem Hezekiah a lal mi kum leilinâk ah Asiria lal lianchem Senakerib nih Juda ram ah mi khuapi kulhnei tla a do le, a lâk na.

²Churawhchun a milian chu Lakis thawk hen Jerusalem leiah kawrsen tamtak hen kal hen lalchem Hezekiah an sinah a pêk ding hen thu a pêk. Chu milian nih chun puan siamtu tla rianṭuannâk ah mi lampi tlûnlei mi tili thawk hen tî luangnâk an chawh mi kiang chu a luah.

³Juda mi pathum chu amah tawng ding hen an hawng suak: lal in ah mi hotu Hilkiah fapa Eliakim; lâirêlnâk in ah lasuirîntu Sebna; lasui rîn mi bu kiltu Asap fapa Joah tla an si.

⁴Asiria milian nih chun an sinah lalchem Hezekiah nih a rinhsanh chem mi zei asi lal lianchem nih theih ding a duh ti hen a simh na.

⁵“Thu ko hen râltuk kawrsen thiamnâk leh chaknâk mun chu lâk kho ding hen na ruat ma? Asiria lal tlûnah na hel mi hi âu nih an ṭangpi kho ding hen na ruat?

⁶Aigupta chu nangmah ṭangpitu si ding na ruat le, sikhawmsele, anih chu ṭhianṭhunh rangah lâiluang kung mang hen a kiak le, kut lakah a sunh mi hâwi asi lai. Âuzawng Aigupta lal ngauhsanhtu chu, chu hâwi an si lai,” a ti.

⁷Asiria milian nih a sim vima le, “Asi lo leh, LALPA nan Pathian lakah ma nanna ngauh awt hawng ka simh? Hezekiah nih Juda mi leh Jerusalem mi tla, mâichâm pakhat lak cho ah sawnh ding a ti liauah a râwk mi kha LALPA mi thenhlimh tla thlân leh mâichâm tla asi.

⁸Tuah lal lianchem min sâl hen na sinah thutiamnâk ka siam lai. A chuantu ding minung tamtak na tawng kho ding asi chun rang sâng nih ka nan pêk na lai.

⁹Asiria milian dîrmun niam chem khawm nan tluk kho lo mi, Aigupta mi tla nih kari leh rang tlûnah chuan mi tla an pêk na ding nan lungum nget rih.

¹⁰LALPA ṭangpi lo hen nan ram hi ka do hen râwk kho ding hen nan ruat ma? LALPA amah tak nih do hen veih ding hawng ka simh asi,” a ti.

¹¹Churawhchun Eliakim, Sebna leh Joah nih milian sinah, “Arab hawlh hen thu hawng kan simh le, kan theihthiam lai. Hebrai hawlh hen thusim lah; kulh tlûnah mi zawzawng nih an ngâi ko,” an ti.

¹²Anih nih a sâng le, “Hi bang thu zawzawng tla hi nannih leh lal sin cho ah sim ding hen lal lianchem nih hawng ka fial hen ma nan ruat? Silo, kulh tlâng tlûnah to mi tla nanmah hâwi hen an êk eitu ding mi leh an zun dintu ding mi sinah khawm ka sim asi,” a ti.

¹³Churawhchun milian chu a dîr le, Hebrai hawlh hen thu a sim, Asiria lal lianchem nih thu an simh na mi chu ngâi u;

¹⁴Hezekiah nih an perpet na lo ding hen an simh na asi. Hezekiah nih an hum kho na ding asi lo.

¹⁵LALPA sinah a ngauh ding hen an lêm na lah seh. LALPA nih a nan hum na ding hen ruat lah ule, kan Asiria kawrsen tla nih nan khuapi an lâk ding mi kham ding hen khawm ruat lah u.

¹⁶Hezekiah thu ngâi lah u! Asiria lal lianchem nih khuapi ah mi hawng suak hen hawng a pêk ding hen thu an pêk na. Nan dûm mi grep tla ei ding leh nan theipi kûng ah mi theipi ei ding hen, nan tikhurchawh lakah mi tî din ding hen siang asi lai,

¹⁷Asiria lal lianchem nih nanmah ram hâwitê hen an pêk na mi lakah grep din ding hen grep zûn tla, sang siam ding hen fâng tla an pêk na lân lo chu.

¹⁸Hezekiah nih LALPA nih a nan hum na ding mi thinlung put ding hen an âttir lah na seh. Zei phundang pathian tla khawm nih Asiria lal lianchem nih an ram a lâk ding mi a hum dah tâwn ma?

¹⁹Tuah Hamat leh Arpad pathian tla zeiah an um rawh? Sepharvaim pathian tla chu zeiah an um? Pakhat tal nih Samari an hum ma?

²⁰Zei liauah hi bang ram zawzawng pathian tla nih kan lal lianchem lakah mi an ram a hum dah tâwn? Chun Jerusalem chu LALPA nih a hum kho lai ti ruatnâk thinlung zei nih me a nan neihtir na?” a ti.

²¹Mi zapi tla chu dâisip hen an um le, lalchem Hezekiah nih a simh na mi hâwitê hen an um; zei thu khawm an sim lo.

²²Churawhchun Eliakim, Sebna, leh Joah nih an ngaihsia tukah an nipuan tla an thlêk le, an kal le, Asiria milian nih thu a sim mi chu lalchem sinah an va sim rawh.