Read Bawm Chin ISAI 41 Bible Online

ISAI 41 - Bawm Chin bible

ISAI 41

¹Pathian nih, “Nannih ram lât tak um mi tla, dâisip hen um ule, ka thu ngâi u! Lâirêlnâk in ah na thunawk tlunh ding hen a tîm le; sim ding hen tik na nei teh lai. Âu a dik ruat ding hen kanna pûm lai.

²“Saklei thawk hen nehtu hawng hen, a kalnâk kipah neh vimatu chu âu me si? Lalchem tla leh phun tla nehnâk âu nih me a pêk? A nâmsâu nih valeidip hâwi hen a mân na. A chanhtiang zum tla nih fapawn thli nih a ranh mi hâwi hen a rektir hep na.

³Ṭhâwl hen him tak hen a kal vima a chak tuktarâi le, tual zângrah hen a tawngh.

⁴Hi hi âu nih a tlungtir? Hi thâwngthâng hi âu nih a tum mi me si? Kei, LALPA chu a tîr thawk hen um mi ka si le, a dawnghnâk khawmah kei LALPA ber ka si lai.

⁵“Ram lât tak ah um mi tla nih ka thilti an muh le, an ṭih le; lâu hen an thir. Churawhchun an ektê hen anna pûm le, an hawng.

⁶Mi zungthiam tla nih an ṭangpi le, anna fawrh tawnh.

⁷Thing hen thilsiamtu nih ngûn dêngtu sinah ‘Na ti dân a ṭha thlo!’ a ti. Milem siamtu nih thîr ling hen kilhtu rangah a fawrh. Annih nih “A sengh dân a ṭha’ an ti le, thîr ling hen a mahmuntê ah milem an kilh tap.

⁸“Sikhawmsele, nannih Israel ka to-aw tla, ka hâwipa Abraham thlâk ka nan thîm na mi nan si.

⁹Tual dawnghnâk ah mi ka nan put na le, a ken ah a lât chemnâk ah mi ka nan kawh na le, nan sinah, ‘Nannih chu ka to-aw tla nan si,’ ka nan ti na. Ka nan nawng na lo, ka nan thîm na mi nan si.

¹⁰Lâu lah u, nan sinah ka um! Nan Pathian ka si, zeikhawm nih an lâutir lah na seh! Chak tak hen kan siam na lai le, kan ṭangpi na lai. Kan nan zauhkhenh na hen kan hum na lai.

¹¹“Nan lakah thinruntu tla nih neh ruangah ningzaknâk an theih lai. An do natu chu an thi lai le,

¹²tual ah muh an si lai lo rawh.

¹³Kei, LALPA nan Pathian chu ka si; kan chaktir na le, ṭih lah u! Ka nan ṭangpi na lai, ka nan ti na a ti.’”

¹⁴LALPA nih, “Israel na mê le, na chaklo ruangah ṭih lah; ka nan ṭangpi lai. Kei, Israel Pathian thenhlimh chu nangmah ruangsuahtu ka si.

¹⁵Fâng khâwngnâk thingphel, a kilhnâk thar siak hâr tak hâwi hen ka nan siam lai. Tlâng tla na chîl lai le, na râwk lai; tlâng tênâu tla chu phildip hâwi hen na nektir dip lai.

¹⁶Boruak ah na vawrh phin lai le thli nih a ranh ving lai, thlipi nih a thektham hep lai. Churawhchun, kei na Pathian ka si ruangah na lâwptlo lai rawh; Israel Pathian thenhlimh chu na ka sawr lai rawh.

¹⁷“Ka mi tla nih tî duh hen an hâwl liauah an tîhâl tuk hen an dang a châr ver liauah Kei, LALPA nih an thlachamnâk chu ka sâng lai le; Kei, Israel Pathian nih ka kaltâk na rêng lai loh.

¹⁸Tlâng karo lakah tiva ka luangtir lai le, a vakuam tla ah chun tinungva ka luangtir lai. Ramkaro chu tili ah ka changtir lai le, ram châr lakah tinungva ka luangtir lai.

¹⁹Ramkaro ah sidar thing ka khotir lai le, thingri thing tla, bua rimthâw tla leh oliv thing tla ka khotir lai. Ram lâwng lakah tumun ka umtir lai le, far thing tla, junipar thing tla leh far thing chi dang tla ka khotir lai.

²⁰Mi tla nih chu chu kei, LALPA nih ka ti mi asi ti an muh hen an theih lai. Israel Pathian Thenhlimh nih a ti taktê rawh ti hen theihthiamnâk an nei lai rawh,” a ti.

²¹LALPA, Israel lalchem nih, sim ding a nei mi chu hi hi asi: “Nannih phun pathian tla, an thu hawng tlunh u. Êlnâk ṭha chem nan nei mi hen êl u!

²²Hawng ule, thil hawng um ding mi simkan u, churawhchun a hawng tlung tikah kan theih kho lai. A lânah thil a hawng um mi tla lâirêlnâk in ah simhfiang ule, a umzia zei asi hawng kan simhfiang u.

²³Mâilei ah thil um ding mi hawng kan simh ule, chu tikah pathian tla nan si ti kan theih na lai! Thil ṭha zeimawh ti ule, siatnâk zeimawh tlungtir ule, lâu leh thlakâm hen hawng kan siam u!

²⁴Nanmah leh thil nan ti mi zawzawng zeikhawm asi lo; a nan sawnh natu khawm fihnung an kâi.

²⁵“Saklei ah um mi minung chu ka thîm rawh; mârlei thawk hen dotu dingah ka hawng put lai. Nehtu hâwi hen lâirêltu tla chu a lamh na le, bêlhêmtu nih sunhtlung valei a lamh hâwi hen.

²⁶Nan dik ngâk kan ti kho na ding hen a hawng tlung ding mi hi nan lakah âu nih sim kho? Âukhawm nih zei thu khawm nan sim lo, nan sim mi theihtu khawm âukhawm an um lo!

²⁷Kei, LALPA, Zion sinah thâwngthâng sim masachemtu ding chu ka si; Jerusalem ah thusim ding hen mi ka fial le, ‘Na mi tla an hawng! In leiah an hawng tlung!’ ti ding hen!

²⁸Pathian tla ka zauh na le, zei thil sim ding khawm an nei lo. thu ka deih na mi pakhat khawm nih an sâng kho lo.

²⁹Hi bang pathian zawzawng tla hi mang tlâk an si lo; zei thil khawm an ti kho lo, hi bang milem tla hi an chak lo hen thiltikhonâk khawm an nei lo.