Read Bawm Chin ISAI 44 Bible Online

ISAI 44 - Bawm Chin bible

ISAI 44

¹LALPA nih, “Ka to-aw, Israel, Jakob thlâk ka mi thîm tla, tuah ngâi u.

²Kei, LALPA a nan siamtu chu ka si; na suak liau thawk hen ka nan ṭangpi. Nang chu ka to-aw, ka mi thîm ka dâwt mi na si; ṭih lah.

³“Ram châr chu tî ka pêk lai le, tual châr lakah tiva tla ka luangtir lai. Ka thiltikhonâk nan fa le tlûnah ka tawih lai le, ka malsâwmnâk chu nan thlâk tla tlûnah ka tlungtir lai.

⁴Tî hen châwm mi belh hâwi hen an ṭhang lai le, tî luangnâk kiangah mi bakrimei hâwi asi lai.

⁵“Pakhat khat hen mi tla nih LALPA tâ ka si’ an ti lai le, Israel mi tla sinah a fawnh ding hen an hawng lai. Mikip nih an bân ah LALPA min singsiahnâk an siam lai le, LALPA mi tla lakah pakhat ka si an ti lai,” a ti.

⁶LALPA, Israel lâirêltu leh humtu, LALPA Zeizawng tikho nih hi hi sim ding a nei: “Kei a masachem leh a madungchem Pathian pakhat cho ka si; keimah lo chu pathian dang âukhawm a um lo.

⁷Ka ti mi hâwi hen âu nih ti kho lai? Tik dawmhnâk thawk hen a dawngh tiang hen thil a hawng um ding mi zawzawng âu nih simkan kho?

⁸Ka mi tla, ṭih lah u! A lân thawk hen tutiang hen thil a hawng tlung ding hen ka simkan mi chu nan theih le, nannih chu hawng ka theihpitu tla nan si. Pathian dang rerêng a um ma? Ka theih dah lo mi pathian thiltikho tak a um ma?” a ti.

⁹Milem tla siamtu zawzawng chu zeikhawm asi lo, pathian tla rangah lâwmman sâng tak an pêk mi khawm zeikhawm asi lo. Chu hâwi milem sawnhtu chu mitchâw leh zeikhawm theihlo mi an si, an ning a zak teh lai.

¹⁰Thîr milem pathian hâwi hen sawnh chu a ṭhatnâk zeikhawm a um lo.

¹¹Âuzawng chu sawnhtu chu nâutir hen a um lai. Milem siamtu chu minung ko asi, a zeipi khawm asi lo. Nik ding hen hawng kal na sele, an lâu lai le, ningzak an tuar lai.

¹²Thîr dêngtu nih thîr sêutê a lâk le, mei ah a rawh. A bân chak hen thîr chu dêng ding hen tukboh a châwi. A ṭuan liau chun a sungvâng, a tîhâl le, a dî.

¹³Thing hen thil siamtu nih thing chu a tah. Châwk hen a ruamâm a rîn le, a siamnâk ruakhâu a nei mi hen a ker le, a in ah siah ding hen minung mêl dawh tak put hen a tuah.

¹⁴Thing mun ah mi sidar thing tla mang ding hen a hâu kho, oak thing leh far thing chi dang tla a thîm. Laurel thing a phun le a ṭhangtirtu ding ruah a ngâk.

¹⁵Mi nih a tan chu tih dingah a mang le, a dang chu milem rangah a mang. A khingkhuai chu amah lumtir ding hen mei tihnâk ah a mang le, sang a em; a dang tan hen pathian a siam le, a sawnh.

¹⁶Chu thing zeimaw mi hen mei a tih le; meh a em le, a ei le, a khawp rawh. Lum at hen a um le, thungâi a lum ṭha a! Mei ṭha tak asi!” a ti.

¹⁷Thing a lei mi vial chu milem ah a siam le, churawhchun a kûn le, a sawnh. A sinah thla a cham le, “Ka pathian na si, hawng ka hum,” a ti.

¹⁸Chubang hâwi minung tla chu an mâwl tuk le, an thilti khawm an theih loh. Thudik lakah an mit an sîm le, an thinlung an khungtir.

¹⁹Milem siamtu nih finghnâk leh theihnâk a nei lo le, “Thing zeimaw mi chu ka tih. Meiṭil tlûnah sang ka rêu le, meh tla ka em le, ka ei. Thing a dang a leifuan hen milem ka tuah. Hinah thing tantum sawnh hen ka buk!” a ti.

²⁰Vachâm ei mi hen a finghnâk â bang cho. A thinlung âtnâk nih amah chu ṭangpi kholo rê hen diklonâk leiah a kalpi. A kut ah a tleih mi milem chu pathian asi lo thlo ti a theih lo.

²¹LALPA nih, “Israel, hi hi theihkumza rawh; ka to-aw na si ti theihkumza rawh. Ka to-aw ah ka nan siam mi na si le; ka nan philh dah lai lo.

²²Sûm ka thiangtir mi hâwi hen na sualnâk chu ka thiangtir. Nangmah ruang an suahtu ka si; ka sinah hawng kîr rawh,” a ti.

²³Vân tla, lâwm hen âu u! Tual mun thûk takah mi âu u! Tlâng sâng leh tumun ah thing tla lâwm hen âu u! LALPA nih a mi Israel tla ruangsuahnâk hen a rokual zia a langh.

²⁴“Kei, LALPA na ruangsuahtu ka si. Kei, hi a nan siamtu pakhat ka si. Kei, thil zeizawng Siamtu LALPA ka si. Keimah lâwng hen vân tla khi ka pharh le; tual ka siam liau khawm âukhawm nih an hawng ka ṭangpi lo.

²⁵Chamchawh thiam tla chu mi mâwl ah ka siam na le, ârfi leikângah simkantu tla ka mualphoh na. Mifing thu chu ka lawnh le, an finghnâk chu âtnâk asi ti ka langh.

²⁶Sikhawmsele, ka to-aw nih simkannâk a sim hen, ka thiltum langhtir ding hen mi ka fial chun, chubang tumnâk tla leh simkannâk tla chu dik tak hen ka tlungtir. Jerusalem ah minung an um nawlh ding mi thu ka sim le, Juda khuapi tla khawm sak nawlh ding thu tla ka sim. Chubang khuapi tla râwk an si rawh mi chu dirh nawlh hen a um lai.

²⁷Thupêk hen tisumsumriat tla ka kangtir.

²⁸Kirus sinah, ‘Nang chu lâi hawng ka rêl piaktu na si lai ti ding ka nan duh mi chu na ti lai: Jerusalem sak nawlh ding hen leh Biakin lungphûm tla chu phûm ding hen thu na pêk lai,” a ti.