Read Bawm Chin ISAI 45 Bible Online

ISAI 45 - Bawm Chin bible

ISAI 45

¹LALPA nih Kirus chu lalchem si ding hen a thîm. Phun tla nehtu dingah a ruat le, lalchem tla thiltikhonâk suh na ding hen a fial le; LALPA nih khuapi kulh kawtkâ chu a rangah a awng piak lai. LALPA nih Kirus sinah,

²“Keimah tak nih na lampi chu ka timhtuah lai le, tlâng sâng leh tlâng tla chu rual zat hen ka siam lai. Khua kulh dâr kawtkhâr chu ka râwk lai le, thîr tluan tla chu ka khiak lai.

³Mun thim leh mun thup ah mi ro a nan pêk lai; chu tikah kei LALPA ka si zia leh Israel Pathian nih na min hen a nan kawh ti na theih lai.

⁴Ka to-aw Israel, ka mi thîm tla ṭangpi ding hen ka nan ruat. Hawng ka theih lah khawm le, zahkâinâk rokual tak ka nan pêk.

⁵“Kei, LALPA ka si, âukhawm pathian dang a um lo. Hawng ka theih lah khawm le, chaknâk na herh mi ka nan pêk lai.

⁶Laikulh khatlei dawnghnâk thawk hen khatlei dawngh tiang mikip nih LALPA ka si ti leh pathian dang rerêng a um lo ti an theih khonâk ding hen hi hi ka ti mi asi.

⁷Chêu leh mûi khawm ka siam vevê; malsâwmnâk leh siatnâk khawm ka tlungtir mi an si vevê. Kei LALPA nih chubang thil zawzawng ka ti mi asi.

⁸Vân thawk hen nehnâk chu ruah hâwi hen ka hawng fial lai le, ting ding hen tual chu â awng lai le, diknâk leh thawsuaknâk hen ka êntir lai. Kei, LALPA nih hi bang hi ka tlungtir awt,” a ti.

⁹Tual bêl nih a siamtu rangah bêl dang zawzawng hâwi hen hawng ka siam a ti ngam mazei? Valei khawm nih bêl siamtu rangah zei na ti ti hen a deih mazei? Bêl nih a siamtu sinah zung na thiam lo ti hen a sâwi mazei?

¹⁰Âutal nih a nu leh a pa sinah, “Zeirang hi hâwi hen nan hawng ka siam?” a ti ngam mazei?

¹¹LALPA, Israel Pathian Thenhlimh mâilei thu ruattu nih, hi hâwi hen a sim: “Ka fa le tla thu mawh ka ti ding mi thu mawh nan hawng ka deih ding leh nan hawng ka simh ding hen thu nan nei lo.

¹²Kei, tual siam hen a sungah um ding mi minung siamtu ka si. Ka thiltikhonâk hen vân tla ka pharh le, nî leh thlâ leh ârfi tla ka thu thu hen ka siam na.

¹³Keimah nih Kirus chu ka thiltum rangtlingtir leh diktir ding hen a thinlung ka thawktir mi asi. A kalnâk lampi ka dingtir lai. Anih nih ka khuapi Jerusalem a sak nawlh lai le, ka mi sal tâng tla a suah na lai. Hi ti ding hen âukhawm nih an mang hen an nawh mi asi lo,” a ti. LALPA, Zeizawng tikho nih a sim asi.

¹⁴LALPA nih Israel sinah, “Aigupta leh Sudan neihnâk chu na tâ asi lai le, Seba ram ah mi sâng tla chu na sal an si lai; rêng khimh bû hen a nan zûl lai. Na sinah an hawng kûn lai le, ‘Pathian na sinah a um, Amah cho chu Pathian chu asi, ti hen thutluang an vâwr lai.

¹⁵‘Israel Pathian, a mi tla ruangsuahtu a thup hen a um mi Pathian chu asi.

¹⁶Milem siamtu zawzawng chu ningzak leh mualpho hen an um lai.

¹⁷Sikhawmsele Israel chu LALPA nih a hum le, zungzâl hen nehtu asi; a mi tla chu zei liau khawmah an mualpho lai lo!’” a ti.

¹⁸LALPA nih vân tla a siam le, anih chu Pathian asi! Tual a tuah hen a siam le, um kumza ding hen bir tak hen a siam. A karo hen a siam lo, mi le tla umnâk mun dingah a siam mi asi. “Kei, LALPA ka si, pathian dang a um lo,” titu chu amah asi.

¹⁹A thup hen thu ka sim lo, ka thiltum chu ka thuh lo. A karo hen siat leh râwk hen um mi hawng ka zauhkhenh piaktu dingah Israel mi tla ka herh lêm lo. Kei, LALPA thu dik simtu ka si; a dik mi chu mikip theih hen ka langh,” a ti.

²⁰LALPA nih, “Phun zawzawng mi tla, Ram neh hen a um liauah thibang zawzawng tla hawng a pûm ule, niknâk lakah a pêk u! An thing milem hen khualâi ṭawltu tla, anmah hum kholotu pathian sinah thlachamtu tla, chubang minung tla nih chun zeikhawm an theih lo.

²¹Lâirêlnâkah hawng ule, nan thunawk hawng put u; a dotu ding mi tla chu thu a deih tawnh na seh. Tuan liau khawmah thil a hawng tlung ding mi simkantu âu a um? Kei, LALPA a mi tla ruangsuahtu ka si lo ma? Pathian dang a um lo.

²²“Laikulh pumpi mi tla, tuah keimah leiah hawng a hawi ule, him tak hen um u! Pathian um mi chu keimah pakhat cho hi ka si.

²³Ka thutiam chu a dik le, lêt asi lai lo rawh. Bir tak hen ka sinâk zawzawng hen ka tiamh mi asi; mikip hawng hen ka mâika ah anna siksidîr lai le, zumhkâi ding hen ka sinah thu anna tiam lai.

²⁴“Keimah thawk hen cho nehnâk leh chaknâk tawng ding asi mi leh hawng ka huatu zawzawng nih ningzaknâk an tuar ding mi an sim lai.

²⁵Kei, LALPA nih, Jakob thlâk tla zawzawng ruang ka suah na lai le, annih nih an ka sawr lai.