Read Bawm Chin ISAI 46 Bible Online

ISAI 46 - Bawm Chin bible

ISAI 46

¹“Hi hi Babulon pathian tla rangah a dawnghnâk chu asi! Bel leh Nebo chu veikhat chu sawnh hen an um le, sikhawmsele tu lam chun ran dî tak tla, sanatung kêng tlûnah phurhtir hen an um rawh.

²Milem tla chu anmah khawm anna hum kho lo le; lâk le put ving hen an um. Chu chu Babulon pathian rangah dawnghnâk chu asi.

³“Nannih Jakob thlâk ka mi tla lakah a thibang zawzawng tla, ka thu ngâi u. Na suak liau thawk hen ka nan kilkâwi.

⁴Kei, na Pathian ka si, na tar hen na sam pâr tiang ka nan zauhkhenh lai. Ka nan siam mi na si, ka nan zâuhkhenh lai; Ka nan ṭangpi lai le, ruang ka nan suah lai.

⁵LALPA nih, “Âu hen na hawng ka tahthimh awt?” a ti. “Keimah hâwi midang a um ma?

⁶Mi tla nih an tangka sâwngkhâwi an awng le, ngûn an thlêt le tangkasa tla khing hen an khingh. Ngûn dêngtu tla chu pathian lem siam ding hen an lâk, churawhchun an mâimûk le an sawnh!

⁷An liangah an thâng le, an put; a mun ah an siah le, chunah chun an dîrtir, A umnâk mun ah mi khawm â ṭhial kho lo. Mi nih a sinah thla an cham khawmsele, a sâng na hen siatnâk lakah mi a hum kho na lo.

⁸“Nannih misual tla, hi hi theih u; ka thilti tla dawn u.

⁹A lânah thil a hawng um mi chu theihkumza ule, keimah cho Pathian ka si zia theihtir u, Keimah hâwi midang âukhawm an um lo.

¹⁰A bul thawk hen a hawng um nawlh ding mi tla ka simkan le; a lân thawk hen thil a hawng um ding mi khawm ka simkan. Ka thiltum tla chu ka tlawlh lai lo le, ti ding hen thil zeizawng ka tum mi tla chu ka ti nget lai ti ka sim.

¹¹Saklei thawk hen minung pakhat hawng ding hen ka kawh le; mû hâwi hen a hawng a thlûr lai le, thilti ding ka tum mi chu a hawng lîm lai. Ka sim mi chu ti hen a um lai.

¹²“Nannih mi lungkhung tla, nehnâk chu lât thlo ding hen ruattu tla, ka thu ngâi u.

¹³Nehnâk ni ka tlungtir ding mi chu a nâi rawh, a lât rîlmâl lo. Ka neh ding mi chu a sâwt lai lo rawh. Jerusalem chu ka hum lai le, Israel lakah zahnâk ka tlungtir lai,” a ti.