Read Bawm Chin ISAI 48 Bible Online

ISAI 48 - Bawm Chin bible

ISAI 48

¹Juda thlâk Israel mi tla, hi hi ngâi u: LALPA min hen Israel Pathian sawnh ding thu nanna tiam le, sikhawmsele thu nan sim hâwi hen tumnâk nan nei lo.

²Khuapi thenhlimh lakah mi kan si, Israel Pathian, a min chu zeizawng tikhotu LALPA lakah ngauh mi kan si ti hen zûm tak hen thu nan sim nget rih.

³LALPA nih Israel sinah, “A lân thawk hen thil a hawng um ding mi ka simkan rawh le; churawhchun ka tlungtir sawm rawh.

⁴Thîr chang tak leh dâr khauh tak hâwi hen nan lung a khung awt mi ka theih.

⁵Churuangah nan milem tla leh a banghpi siam ding hen an sim mi thu a hawng tlung lânah nanna vêngnâk ding hen a lân thawk hen a hawng um ding mi chu ka simkan ving rawh.

⁶“A lânah thil um ding mi ka sim mi zawzawng kha tu chun a hawng um rawh; ka thu simkan chu a dik asi ti nan theihthiam ding asi rawh. Thil hawng um mi tla a lânah ka langh lo mi thil thar a hawng um ding mi tuah ka nan simh na lai.

⁷Tu cho hin ka hawng tlung asi; a lânah thil hi hâwi a hawng um dah lo. Chu hâwi asi chun zeizawng theih hen nanna ruat lai.

⁸Hel hâwi kumza hen theih nan si ruangah, zumh nan kâi kho awt lo ti ka theih. Chu chu asi, hi hi nan theih dah lo mi chu, zeirangah nan nâ ah thu a lût lo thlo.

⁹“Mi nih ka min an sawr khonâk ding hen, ka thinthawknâk ka tleih le, ka sûm le, ka nan râwk na lai lo.

¹⁰Tangkasa mei lakah an êr mi hâwi hen mei lakah tuarnâk hen kan nik na. Sikhawmsele zeikhawm nan si lo zia ka nan theih na.

¹¹Ka ti mi chu keimah ruang ver asi, ka min chu zauhnawmh ding hen ka siang lai lo, rokualnâk khawm âu rang khawm ka tingtir na ding asi lo, ka tâ chu keimah rang cho asi,” a ti.

¹²LALPA nih, “Ka nan kawh na mi Israel tla, ka thu ngâi u! Kei Pathian, a masachem leh a madungchem Pathian pakhat cho chu ka si!

¹³Ka kut hen tual lungphûm ka siam le, vân ka pharh. Tual leh vân ka kawh na liauah rang tak hen an hawng le, ka sinah anna pêk.

¹⁴“Nan ektê hen a pûm ule, ngâi u! Zei pathian khawm nih Babulon do ding hen ka thîm mi minung chu an simkan kho lo; Ti tir ding hen ka duh mi chu a ti lai.

¹⁵A simtu leh a kawhtu chu keimah ka si; ka suakpi le, dingchangnâk ka pêk.

¹⁶“Tuah ka sinah nâi tek hen hawng le, ka thusim ngâi. A tîr thawk hen fiang tlo hen thu ka sim le, ka thu chu dik kumza hen ka tlungtir,” a ti. (Tuah LALPA zahkâi nih thiltikhonâk hawng ka pêk le, hawng ka fial.)

¹⁷Israel Pathian thenhlimh nangmah a nan humtu LALPA nih thu a sim: “Kei hi LALPA nan Pathian, nanmah ṭhatnâk dingah an sîntir na duhtu leh nan kalnâk ding lampi ah an kaltir natu ka si.

¹⁸“Ka thupêk cho ngâitu nan si chun malsâwmnâk chu tiva kâng dah lo mi hâwi hen nan rangah a hawng luang lai! Tiva kapah tîlian a luang mi hâwi hen nehnâk nan lakah a hawng tlung lai.

¹⁹Nan thlâk tla chu sep zat hen an tam lai le, vei lo rawh ding mi an si ti ka theihtir na lai,” a ti.

²⁰Suak u, Babulon ah mi hawng suak u! Thâwngthâng lâwm tak hen âupi ule; mun kipah theihtir u: “LALPA nih a to-aw Israel chu a hum rawh,” ti hen.

²¹LALPA nih a mi tla, ram lîn leh ramkaro ah a kalpi na liauah tîhâl hen an um lo. Lungpi thawk hen an rangah tî a suaktir le; lungpi a kaktir le, tî a hawng luang.

²²LALPA nih, “Misual tla rangah himnâk rêng a um lo,” a ti.