Read Bawm Chin ISAI 49 Bible Online

ISAI 49 - Bawm Chin bible

ISAI 49

¹Nannih ram lât takah um mi phun tla, Ka thu ngâi u! Ka suak lânah, LALPA nih a to-aw rangah hawng ka thîm ving rawh.

²Ka thu chu nâmsâu hâr mi hâwi hen a siam. Amah kut hen hawng ka hum. Chanhtiang thal zum hâr tak leh mang ding timhtuah zet mi hâwi hen hawng ka siam.

³Ka sinah, “Israel, ka to-aw na si; nangmah ruangah mi nih an ka sawr lai,” hawng ka ti.

⁴“Ka ṭuan le, sikhawmsele, lungum a kâi lo chiam e! Ka chaknâk ka mang le, sikhawmsele zeikhawm â lîm lo,” ka ti. LALPA nih ka thilti lakah lâwmman hawng ka pêk lai.

⁵Ka suak lânah LALPA nih hawng ka ruat ving rawh; a mi tla kîrpi na ding hen a to-aw ah hawng ka siam le, Israel mi rekrâwi tla kîrpi na ding hen. LALPA nih zahkâinâk hawng ka pêk; anih chu ka chaknâk bulpi asi.

⁶LALPA nih ka sinah, “Ka to-aw na rang dingah ti ding rokual tak ka nei. Israel thibang tla rangah rokualtir natu cho na si lai lo le, phun tla rang khawmah chêu ah ka nan siam lai, laikulh zawzawng ruangsuah an si khonâk ding hen,” a ti.

⁷Israel Pathian thenhlimh leh ruangsuahtu nih chun zauhnawmh dep hen a um mi, phun tla nih an hua mi leh lâirêltu tla to-aw sinah chun: “Suah hen na um mi lalchem tla nih an muh lai le, an zah zia langh ding hen an thawk lai le, lal fapa tla khawm nih an muh lai, nanmah zah ding hen nâu tak hen an kûn lai,” a ti. LALPA nih a to-aw a thîm mi ruangah hi bang hi a hawng tlung lai le, Israel Pathian thenhlimh nih a thutiam chu a kil thlir.

⁸LALPA nih a mi tla sinah, “Nangmah ruangsuahnâk ding hen tik a hawng tlung chun kan sunhsak zia ka langhtir lai le, ṭangpi deih hen na âu mi ka nan sâng lai. Kan vêng hen ka nan hum lai le, nangmah ruangah mi zawzawng hen thudântuk ka siam lai. vTuah nan ram siat leh râwk hen a um mi lakah hin ka nan umtir nawlh lai.

⁹Rêngtlâ mi le sinah, ‘Thawsuak tak hen Kal u!’ ka ti lai le, mûi lakah um mi tla sinah ‘Chêu leiah hawng suak u!’ ka ti na lai! Tlâng ah dawrâ tla an tlawng mi hâwi an si lai le;

¹⁰an sungvâng hen an tî a hâl lai lo rawh. Nî sa leh ramkaro linhnâk nih nganfâk a pêk lai lo rawh, anmah dâwttu pakhat nih a rui na lai rawh. Tinungva leiah a kalpi na lai.

¹¹Tlâng tan phak hen lamlian ka siam lai le ka mi le tla velnâk ding hen lam ka timhtuah lai.

¹²Ka mi tla chu ram lât tak thawk hen an hawng lai le, marlei leh thlanglei thawk hen simlei mi Asuan khuapi thawk hen an hawng lai,” a ti.

¹³Vân tla, la sak u! Tual, lâwm hen âu rawh! Tlâng tla chu la sak hen hâu suah na seh! LALPA nih a mi tla chu thla a ngamh na lai le; a mi tla nih nganfâk an tuar mi chu a siherh na lai.

¹⁴Sikhawmsele Jerusalem mi tla nih chun “LALPA nih hawng kan kaltâk rawh mahi: hawng kan philh ving rawh mahi,” an ti.

¹⁵Churuangah LALPA nih a sâng le, “Nunau nih a fa a philh hen a pâwi mi fasêm dâwt lo hen a um mazei? Nunau nih a fasêm a philh menza khawmsele kei chu ka nan philh dah na awt lo.

¹⁶Jerusalem, ka nan philh kho dah lo! Ka kutza tlûnah na min ka rîn ving rawh.

¹⁷“Nangmah a nan dirhnawlhtu ding tuan hen a hawng lai le a nan râwktu tla lam chu an kal lai rawh.

¹⁸Na kiangkam tla a hawi le, zei thil a hawng tlung zauh! Na minung tla anna pûm hen in leiah an hawng tlung liau chir! Kei Pathian nung ka si ruangah, na mi tla chu mo nih a lungsung â zumh phah mi hâwi hen na mi tla chu zumhnâk ah na mang lai.

¹⁹“Na ram tla chu a râwk hen a karo hen a um le, Sikhawmsele, tu lam chun um ding hen a hawng kal. Mi tla rangah a mê awt tuktarâi rawh. Nanmah siat leh râwktu chu, nan sinah mi ram lât takah ṭhial an si lai rawh.

²⁰Na mi tla sal tângnâk ah suak mi tla nih Ni khat chu nan sinah, ‘Hi ram hi a mê tuktarâi. Umnâk ding hen mun kâu dauh kan herh!’ an ti lai.

²¹Churawhchun nangnih na thinlung ah ‘Âu nih me ka rangah hi zawzawng fa an ring? Ka fa tla ka thlâu hep le, ka nei kho lo rawh mi kei tâ nih sal ah tâng hen nar hen ka um mi âu nih hi zawng fa tla hi a châwm na? Keimah lâwng mâk hen ka um mi, hi bang fa tla hi zei thawk hen me an hawng?’” na ti lai

²²LALPA zahkâi nih a mi tla sinah “Phun tla rangah theihtirnâk ka pêk na lai le, na fa tla chu in leiah an hawngpi na lai.

²³Lalchem tla chu na rangah pa hâwi an si lai le; lalnu tla chu nu hâwi an si lai. Na mâika ah an hawng kûn hen a nan zah lai; thinlung nâu tak hen a nan zah zia an langh lai. Chu tikah kei LALPA ka si mi leh keimah ṭangpinâk ngâktu tla chu pakhat khawm lungdawng hen an um lai lo ti na theih lai,” a ti.

²⁴Kawrsen nih râltuknâk ah thil an lâk mi chu na lâk kho ma? Rêngin ah nehsawh hen um mi tla ruang na suah kho na ma?

²⁵LALPA nih, “Chubang tla chu a hawng um ding rêng asi. Kawrsen nih an tleih mi tla chu suh ving asi lai le misual tla nih thil an lâk mi tla chu tleih piak asi lai. Nangmah an dotu chu ka do lai le, na fa tla chu ka hum na lai.

²⁶An nehsawhtu tla chu anmah leh anmah ka thahtir na lai; mi thah duhnâk leh thinthawknâk thinlung an put lai. Churawhchun, minung zawzawng nih Kei LALPA ka si mi leh a nan humtu leh thawsuak tak hen a nan suahtu ka si ti an theih lai. Israel Pathian thiltikho tak ka si zia an theih lai rawh,” ti hen a sâng.