Read Bawm Chin ISAI 5 Bible Online

ISAI 5 - Bawm Chin bible

ISAI 5

¹Hi la ka nan sak piak liauah hin ngâi, ka hâwipa leh a grep dûm la asi: Ka hâwipa nih tual ṭha tak tlâng tlûnah grep dûm a nei.

²Tual a chawh le, lung a lawnh hep le; grep ṭha chem mi tla a phun na. A vêngnâk ding hen insâng a sak le, grep chîlnâk ding hen khur a chawh. Grep min tik ding a ngâk le, sikhawmsele grep tla chu a thur hep.

³Churuangah ka hâwipa nih, Nannih Jerusalem ah um mi tla leh Juda mi tla, ka grep dûm leh keimah kar lakah mi thu hi tuah lâi hawng rêl u.

⁴Hi rangah ka ti mi lakah hin ka palh mi a um ma? Zeirangah grep ṭha si ding ka ruat mi hawi silo hen a hawng thur zia?

⁵“Hi hâwi hen ka grep dûm hi ka ti nik kher lai; a kiangah mi dâi ka awnh ver lai le, a kulh vâm tla ka râwk hep lai le, ramsa tla ka eitir na lai le, ka chîltir dip na lai.

⁶A tlûnah belh bua tul hen ka chawrhtir lai. A ngê tla khawm ka tan lai lo le, tual khawm ka rît awt lo; chu hâwi ding ngâk hen belh leh ling hen ka tuamtir pang awt. Vândâwm khawm a tlûnah ruah sûrtir lo ding hen ka khap awt,” a ti.

⁷Israel chu LALPA zeizawng tikho grep dûm asi; Juda mi tla chu grep phun mi tla chu an si. Thil ṭha an ti ding hen an lakah a lungum le, sikhawmsele chu ngâk hen mi lam an thah. Thil dik an ti ding hen a lungum le, sikhawmsele, anmah ruangah tuartu tla chu diknâk duh hen an âu.

⁸Râwk leh siat hen na um rawh! Na nei rawh mi sap singsuan ding hen phâisen leh in tla na châwk. Sâwtlotê ah hi mun ah âumawh an hawng um ding hen mun a um lai lo le, nangmah cho ram lakah na um lai.

⁹LALPA Zeizawng tikho nih thu a sim mi ka theih, “Hi bang in lian pipi leh ṭha tatak tla hi a karo hen a um lai.

¹⁰Grep zûn acre ngâ mun lakah uain gallon nga cho tawng asi lai. Fâng chî kilogram zâ leh sâwmriat nih fâng kilogram leiriat cho a suah lai,” a ti.

¹¹Râwk leh siat hen na um rawh! Zîngtê na thawk le, zû din na dawmh le, zânlei tiang hen na rî.

¹²Na puai lakah ṭingṭang leh khuang leh theikhang tum hen leh uain tla nan din. Sikhawmsele LALPA nih zei thil a ti na theih lo.

¹³Churuangah rêngtlâk hâwi hen an kalpi ving lai. A nan rui natu chu buh ngei hen an thi lai le, mi zapi tla chu tîhâl hen an thi lai.

¹⁴Laikulh thihnâk chu anmah ruangah a sungvâng le, a kâ kâu tak hen a âng. Jerusalem ah milian tla leh zapi minung râk churmar bû hen an dawlh hep na.

¹⁵Mikip ningzak hen an um lai le, â zûm mi zawzawng tla khawm an nâu lai rawh.

¹⁶Sikhawmsele LALPA Zeizawng tikho nih chun a rokualnâk chu a thilti dik hen a zauhtir le, a thenhlimh zia chu a mi le tla lakah lâirêlnâk hen a langhtir.

¹⁷Chu khuapi â râwk mi lakah chun, dawrâ tla nih belh an ei lai le, kêl tla nih belh ningno an tawng lai.

¹⁸Râwk leh siat hen na um rawh! Na sualnâk lakah mi suak kho na si lo rawh.

¹⁹“LALPA nih ti ding hen a sim mi chu khulrang tak hen ti seh, chu tikah kan muh kho lai. Israel Pathian thenhlimh nih a thiltum chu zawh ko seh; a thinlung ah zei a um kan zauh lai,” na ti.

²⁰Râwk leh siat hen na um rawh! Sual chu ṭha na ti le, a ṭha mi chu sual na ti. Mûi chu chêu na ti le, chêu chu mûi na ti. A khâ mi chu a thlum na ti, a thlum mi chu a khâ na ti.

²¹Râwk leh siat hen na um rawh! Fing leh theih hen na ruat.

²²Râwk leh siat hen na um rawh! Uain palang ah râlṭha tla! Telh hen din tikah râlṭha hen ṭihnâk neilo mi!

²³Sikhawmsele nawhnâk ruangah misual chu dik hen na siam, midik lam chu a dik sual lebang lai ti hen na vêng rêt.

²⁴Churuang chun LALPA Zeizawng tikho Israel Pathian thenhlimh nih hawng kan sîntir mi na duh lo ruangah, fapawn leh belh châr mei nih a khangh mi hâwi na si lai le, na ram tla a pawng hen na pâr tla a châr lai le, sêm ving na si lai.

²⁵LALPA chu a mi le lakah a thinrun le, anmah rêp ding hen a kut a zangh. Tlâng tla â nîn lai le, a thi mi ruak tla chu nâwm pawng hâwi hen khua lâi ah mâk asi lai. Chu khawmah LALPA thinthawknâk chu a bâng lai lo rih le, anmah rêp ding hen a kut chu a zangh nget lai rih.

²⁶Lât tak a um mi phun tla chu kawh ding hen LALPA nih theihtirnâk a pêk. Tual dawnghnâk ah mi tla hawng ding hen sûrsîk hen a kawh na. Chun hinah chak tak leh rang tak hen an hawng!

²⁷An lakah âukhawm a dî mi an um lo; âukhawm an lakah an bah lo. Âukhawm an ngû hen an it lo. An tâisâwm khawm a pelh lo; pheikawk rî khawm a chat lo.

²⁸An thalzum tla chu a hâr, an chanhtiang khawm kah ding hen tîm chia asi. An rang tin tla chu lung hâwi hen a chang, an kari kê khawm thlivir â hêl mi hâwi asi.

²⁹An kawrsen tla chu chakeibaknei nih sa a seh mi âukhawm nih suh kholonâk ah a kalpi ving le, a hûk mi hâwi hen hâu an suah.

³⁰Chu ni a hawng tlung tik chun, Israel tlûnah tipi rihâu hâwi hen hâu an suah lai. Hi ram hi zauhnik! Mûinâk leh hamhnâk! Chêu chu mûi nih a dawlh hep.