Read Bawm Chin ISAI 51 Bible Online

ISAI 51 - Bawm Chin bible

ISAI 51

¹LALPA nih, “Nannih ruangsuah duhtu leh ṭangpi ding duh hen ka sinah hawngtu tla ka thu ngâi u. Nan hawng suaknâk lungpi, a nan chawh na nâk kha dawn u.

²Nan thlâktu, Abraham leh Sari thawk hen thlâk nan si mi kha dawn u. Abraham ka kawh liauah fa neilo hen a um le, sikhawmsele mal ka sâwm le, fa tla ka pêk; thlâk tamtak nei hen ka siam.

³“Jerusalem leh â râwk mi lakah um mi zawzawng tla sinah sunhsaknâk ka langh lai. A ram chu a karo hen um menza khawmsele Eden ah dûm ka tuah mi hâwi hen dûm ah ka tuah awt. Lâwmnâk leh lâwptlonâk chunah chun a um lai le sawrnâk la an sak lai le, ka sinah lâwmthu an sim lai.

⁴“Ka mi tla, ka thu ngâi ule, ka sim mi ngâi u: Phun tla rangah sîntirnâk ka pêk na le ka dân tla nih an rangah chêunâk a pêk lai.

⁵Ka hawng sawm lai le, lungum tak hen an hawng ka ngâk.

⁶Vânlei zauh le tual zauh! Vân chu meikhû hâwi hen a vei ving lai le tual chu puan li hâwi hen a ṭet lai. A minung tla chu thovâi hâwi hen an thi lai. Sikhawmsele ruangsuahnâk ka hawng tlungtir ding mi chu zungzâl asi lai le, ka nehnâk chu a dawnghnâk asi lai.

⁷Nannih thil dik theihtu tla, nan thinlung ah ka nan sîntir na mi kiltu tla, ka thu ngâi u. Mi nih a nan nihsanh hen an siar na lo tikah chun tih lah u;

⁸Rulchawn nih puan a ei hep mi hâwi hen an vei dep lai! Sikhawmsele ruangsuahnâk ka hawng tlungtir ding mi chu zungzâl asi lai le, ka nehnâk chu zeiliau zawng a um kumza lai,” a ti.

⁹LALPA, meng le, hawng kan ṭangpi! Na thiltikhonâk mang le, ruang hawng kan suah rawh; a lânah na ti mi hâwi hen mang rawh. Tipi mi thilnung lian Rahab sâm diptu na si.

¹⁰Tipi kangtirtu leh tî lakah lampi siamtu kha na si. Churawhchun ruang na suah mi tla nih an tan kho rawh.

¹¹Ruang na suah mi tla nih Jerusalem chu lâwmnâk hen lâwm ruangah lasak leh âu bû hen an tlung lai. Lâwptlo tak hen an um kumza lai le ngaihsiatnâk leh lawksawngnâk lakah mi chu an thaw a suak kumza lai rawh.

¹²LALPA nih, “Kei hi a nan chaktir natu chu ka si. Belh tluk khawm a dam sâwt lo ding mi thi kho mi minung rangah zeirangah na ṭih awt?

¹³LALPA a nan siamtu vân pharhtu leh tual lungphûm phûmtu na philh rawh na maw? A nan veih ding hen a timhtuah mi leh a nan nehsawhtu thinrunhnâk ṭih kumza hen zeirangah na um? An thinthawknâk nih a nan tawngh kumza kho lai lo.

¹⁴Rêngtlâ mi tla chu sâwtlotê ah suah an si lai le; sâwt tak hen an dam lai le, tî-râwl an herh mi zawzawng an tawng lai.

¹⁵“Kei, LALPA nan Pathian tipi tla tlingtlawktirtu leh tîlian rihâu suahtirtu chu ka si. Ka min chu LALPA Zeizawng tikhotu ka si!

¹⁶Vân tla ka pharh le, tual lungphûm tla ka phûm; Jerusalem sinah, ‘Nang chu ka mi tla na si! Ka sîntirnâk ka nan pêk hen ka kut hen ka nan hum,’” a ti.

¹⁷Jerusalem, thawk rawh! A ṭhang le, thawk rawh! LALPA nih a thinthawknâk rêpnâk hâi a nan pêk mi chu na din rawh; Na din hep le, a nan hâwrtir.

¹⁸Âukhawm a nan ruitu ding an um lo. Âukhawm na mi tla lakah kut hen an tleihtu ding an um lo.

¹⁹Siatnâk letnih na tlûnah a hawng tlung: Tuknâk nih na ram chu a râwk hep le na mi tla nih ei ding an nei lo. Nang rangah lungkhamtu pakhat khawm an um lo.

²⁰Khuadung a ken a pak ah na mi tla chu an uai tuk le an tlû; Sazuk a râltu lên nih a awh mi hâwi an si. Pathian thinrunhnâk an tuar.

²¹Nannih Jerusalem ah um mi tuartu tla nan rî hen hâwrtu tla,

²²LALPA nan Pathian a nan vêngtu nih, “Ka thinthawknâk hâi ka nan pêk mi chu ka lâk ving rawh. A nan hâwrtirtu uain chu na din lai lo rawh.

²³Nannih a nan nehsawh natu, khuadung ah a nan rilh phut na le nâwm hâwi hen nan tlûnah an lamh natu sinah ka pêk na awt rawh,” a ti.