Read Bawm Chin ISAI 55 Bible Online

ISAI 55 - Bawm Chin bible

ISAI 55

¹LALPA nih, “A tîhâl mi zawng hawng u-hinah tî a um! Tangka nei lo mi tla hawng ule, Fâng châwk ule ei u! Hawng u! Nûk leh uain tla châwk u-Zeikhawm nan hêu lai lo!

²Khawp lo ding mi lakah zeirangah tangka nan veih? Sungvâng nget ṭung ding hen zeirangah ni lawh nan lawnh? Ka thu ngâi ule, ka sim mi chu ti u. Buh zawzawng ah a ṭha chem mi lakah nanna lâwm lai.

³“Ka mi tla, tuah ka thu ngâi ule ka sinah hawng u; ka sinah hawng ule, nungnâk nan nei lai! Nanmah hen thudântuk um kumza ding mi ka siam lai le David sinah ka tiamh mi malsâwmnâk chu ka nan pêk na lai.

⁴Anih chu phun tla lakah ruitu ah leh thupêktu ah ka siam le, amah mang hen ka thiltikhonâk ka langh.

⁵Tuah ram dangah mi phun tla na kawh na lai le; veikhat ko chun an theih lai lo le, sikhawmsele tuah nangmah sinah a fawnh ding an hawng tek lai! Kei LALPA na Pathian Israel Pathian thenhlimh nih hi bang zawzawng hi ka hawng tlungtir lai le, zahnâk leh rokualnâk ka nan pêk lai,” a ti.

⁶Tuah a nâi tek liauah LALPA leiah a her ule, a sinah thlacham u.

⁷Misual tla nih an umdân sual tla bângtâk na sele, an thinlung dawn lêt na seh. LALPA kan Pathian leiah hawng a hawi na seh; anih chu mi khuaruat leh ngaihdam sawmtu asi.

⁸LALPA nih, “Kei dawn mi chu nannih dawn mi hâwi asi lo. Ka lampi leh nannih lampi khawm â bang lo.

⁹Vân chu tual ngâk hen a sâng hâwi hen ka lampi leh dawnnâk khawm nannih tâ ngâk hen a sâng.

¹⁰“Ka thu chu vûr leh ruah vân thawk hen tual ah chinh ding hen a sûr mi hâwi asi. Thlâi tla a ṭhangtir hen, tuh ding mi chî leh ei ding mi buh a pêk.

¹¹Chu hâwi hen thu ka sim mi chu a um lai le, ka tum mi thil chu pakhat khawm a tlawlhnâk a um lai lo; Ti ding hen ka hawng fial mi thil zeizawng chu ti asi lai.

¹²Babulon chu lâwm bû hen nan kaltâk lai le, chu khuapi lakah mi chu thlangam tak hen nan suak lai. Tlâng sâng tla leh tlâng tênâu chu la sak hen hâu an suah lai le thing tla chu lâwm hen an âu lai.

¹³Bua nâwngah far thing chi dang tla a kho lai le, Lênmui kûng tla chu bualingnei ruangrûl ah a kho lai. Chu chu zungzâl um ding mi singsiahnâk asi lai le, Kei, LALPA nih ka ti mi theihtir nawlhnâk asi,” a ti.