Read Bawm Chin ISAI 57 Bible Online

ISAI 57 - Bawm Chin bible

ISAI 57

¹Mi ṭha tla chu an thi le, âukhawm nih an theih hen an âwva lo. Sikhawmsele an thih liau khawmah vânduainâk nih an lung a fâktir kho lo.

²Ṭha tak a umtu nih thlangamnâk a tawng le, thihnâk ah â dîn.

³Nannih misual tla, nan lâirêl ding hen hinah hawng u! Dâwithiam, ṭangdang pawmtu tla, nunau â zuar mi ngâk hen nan ṭha dauh lêm lo.

⁴Âu me nan nihsanh? Nannih âwkrâwl thusim tla âu me nan diriamh?

⁵Ram ningnotirtu pathian tla chu nan thing thenhlimh tangah lung bû hen nan sawnh. Tiva mi tili kiangah lungpûk ah nan fa tla chu bâwlnâk ah nan mang.

⁶Chunah mi lung a mil dan mi tla chu nan lâk le, pathian tla hâwi hen nan sawnh. An inah uain tla ap hen nan thlêt le, fâng thil ap tla nan put piak na. Hi bang zawzawng lakah hin lâwm ding hen ma nan ka ruat?

⁷Tlâng sâng takah bâwlnâk ap ding hen nan va kal le, chunah nanna pung.

⁸Nan milem fihnungkâi chu in sungah nan kawtkâ kiangah nan siah. Kei chu nan ka kaltâk le; nan nipuan tla nan lît le, ihpi ding hen a man nan pêk mi nan duh mi tla hen nan ihkhun kâu takah nan kâi. Chunah chun nan thinlung duh mi nan va ti.

⁹Rimthâw leh sariak nanna thuh le, Molek, pathian sawnh ding hen nan kal. Pathian tla sawnh ding hâwl hen ram lât tak leh mun dang dangah mi nan fial le, laikulh thihnâk lei tiang khawmah nan fial.

¹⁰Nanmah khawm pathian dang hâwl hen nan dî phah rê rawh, sikhawmsele nan bâng dah lo rih. Nan milem fihnungkâi nih chaknâk an pêk na ding nan ruat le, churuang chun nan lung a dawng kholo mi asi.

¹¹LALPA nih, “Ka sinah âwkrâwl thusim hen hawng ka philh hep ding hen an ṭhih natu tla hi zei pathian me an si? Sâwt tak ka dâisip ruangah keimah nan ka zah ding mi chu nan bâng mu?

¹²Nan thilti tla chu dik hen nan ruat le, sikhawmsele nan umdân chu ka langh lai le, nan milem tla nih a nan ṭangpi kho na lai loh.

¹³Ṭangpi hauh hen nan ngiar tikah nan milem tla nih a nan hum na seh! Thli a lêng mi nih a put ving na lai! Sikhawmsele keimah hawng ka rinhsanhtu chu ram lakah a um lai le, ka Biakin ah hawng ka sawnh lai,” a ti.

¹⁴LALPA nih, “Ka mi tla ka sinah hawng kîr na seh. An lampi khamtu chu lawnh na seh! Lampi remh hen timhtuah zet hen siam na seh!

¹⁵“Kei chu Pathian thenhlimh leh sâng tak um kumza mi chu ka si. Mun sâng leh mun thenhlimh ah ka um le, sikhawmsele an lungnâk leh lungumnâk ka neitir nawlh kho na ding hen mi â nautir mi leh sual rim mi sinah khawm ka um ber.

¹⁶Ka mi tla chu nungnâk ka pêk tâwn le, an lakah phiarnâk leh thinthawknâk ka umtir kumza awt lo.

¹⁷An sual ruang leh an hamkahnâk ruangah an lakah ka thin a run le, anmah ka rêp na hen ka kaltâk na. Sikhawmsele ê-aw ngâilo hen anmah duh dân hâwi kumza hen an kal.

¹⁸“An thilti tla ka muh le, sikhawmsele ka damh na lai. Ka rui hen ka ṭangpi na lai le, thinlung ngaihsia tla chu thla ka ngamh na lai.

¹⁹Mun nâi leh mun lât ah mi an ektê sinah thlangamnâk ka pêk na lai! Ka mi tla chu ka damh na lai.

²⁰Sikhawmsele misual tla chu tipi tîlian nih rawng leh nâwmtâm chat lo hen a fenh mi hâwi an si.

²¹“Misual tla rangah himnâk rêng a um lo,” LALPA nih a ti.