Read Bawm Chin ISAI 58 Bible Online

ISAI 58 - Bawm Chin bible

ISAI 58

¹LALPA nih, “A fâk kho rirî hen âu le, ka mi Israel tla an sual thu simh na.

²Nisiar hen ka umdân theih ding leh ka dân tla zûl ding duh hen an sim le, an hawng ka sawnh. Dân dik tak pêk na ding an ka duh mi leh an hawng ka sawnh mi lakah nuam an ti mi thu an sim,” a ti.

³Zapi tla nih, “LALPA nih â theihtir lêm lo hen zeirangah buh kan ngei lai? Kan thu ngâilo pet hen zeirangah buh lo hen kan kal lai?” an ti. LALPA nih an sinah, “A san dik tak chu, buh nan ngei liauah nanmah nuam tinâk leikâng nan zûl le, nan rianṭuantu rangah nan nehsawh na.

⁴Nan buh ngeinâk nih a nan râwk na le, nanna êl le, nanna sual. Hi bang hâwi buh ngei hen thlachamnâk lakah hin an ngâi piak na ding hen nan ka ruat ma?

⁵Buh nan ngei mi chu nanmah nanna hamhtir salam mi asi; belh nah â thlâi mi hâwi hen nan lû nan kûn le, salâpuan leh vachâm itnâk ah nan phah. Chubang tla chu ma buh ngei nan ti mi? Chubang lakah a lâwm ding hen ma nan ka ruat?

⁶Kei nih ka duh mi buh ngei dân chu hi hi asi: Nehsawhnâk rêngrî chu sût piak hen, ritphurhnâk diklo tla lît piak hen nehsawh hen um mi tla suah na ding mi chu asi.

⁷Mi sungvâng tla rangah na buh ṭhenh le, mipâm dawrnâk neilo mi tla rangah na in awng piak na. Aih ding neilo mi tla rangah puan pêk na le, na rualsia tla ṭangpi ding mi chu êl lah.

⁸“Ka sunhsaknâk chu na tlûnah zînglei nî hâwi hen a hawng chêu lai le, na liam mi mâ chu a dam sawm lai. A nan hum ding hen na sinah ka um kumza lai le; ka nan umpinâk nih zei leikâng zawngah an hum lai.

⁹Thla na cham tik chun ka nan sâng lai. Na ka kawh tikah ka nan sâng lai. “Nehsawhnâk, zauhnawmhnâk leh thu ṭhalo zawzawng tla na bângtâk hen;

¹⁰mi sungvâng rangah buh na pêk hen a herh mi rangah na khimtir na chun, na kiangkam ah mi mûi tla chu nî sûn chir liau mi chêu ah a hawng a chang lai.

¹¹Ka nan rui kumza lai le, thil ṭha tla hen ka nan khimtir lai. Chak tak leh nung dam hen ka nan kilkâwi lai. Dûm tî tamtak nei mi, tinung va kang dah lo mi hâwi na si lai.

¹²Na mi tla nih chun thil hun sâwt tak â râwk rawh mi chu an dirh nawlh lai le, lungphûm li tlûnah an sak nawlh lai. Kulh remhnawlhnâk leh in sia tla sak nawlhtu nan si ti an theih na lai,” a ti.

¹³LALPA nih, “Dinhni chu thenhlimh tak hen na ulh hen chu ni ah nangmah duhkâng na ti lo hen; ka ni thenhlimh na sung-û tir hen na zah hen chu ni chu khualtlâwngnâk, rianṭuannâk ah mawh dâithlâng tak hen thuruatnâk ah na mang lo mi asi chun,

¹⁴keimah rian na ṭuan ruangah lâwmnâk na tawng lai. Laikulh pumpi nih zah ding hen ka nan siam lai le, a nan thlâktu Jakob sinah ka pêk mi ram ah lâwm tak hen na um lai. LALPA, keimah nih ka sim mi asi,” a ti.