Read Bawm Chin ISAI 59 Bible Online

ISAI 59 - Bawm Chin bible

ISAI 59

¹LALPA chu nanmah an hum na ding hen chak lo tukah mawh, ṭangpi ding hen nan kawh mi lakah a nâ a sêt tuktarâi ah ruat lah u.

²Nanmah sual ruangah an ngâi piak duh na lo mi asi. Sawnh ding nan awt liauah Pathian lakah mi an ṭhen natu chu nan sualnâk asi.

³Âwkrâwl thusim hen, siat leh râwk hen, mi thah hen nan sual asi.

⁴Lâirêlnâk in ah nan va kal le, sikhawmsele nanmah leiah diknâk nan nei lo. Nan thunawk lakah âwkrâwl thusim hen neh ding nan tum. Nan thiltum chu midang rangah nganfâk pêk ding nan awt.

⁵Thilsual ti ding nan dawn mi chu thihnâk rûl tûrnei ti hâwi asi! A ti chu a keuh le, rûl a suak! Sikhawmsele nan thiltum nih chun zeikhawm an ṭhattir na lai lo, mâimawrâng bâw puan hâwi hen mang tlâk lo asi.

⁷Thilsual karo nan dawn kumza le, ti ding hen nan ngâk rarâm. Sualnâk neilo mi tla chu thah ding hen nanna sûm dah lo. Nan kalnâk kipah siat leh râwk hen nan kaltâk le,

⁸chubang hâwi nan um mi lakah chun âukhawm a him lo. Thil zeizawng nan ti mi chu a dik lo hep. Lampi ngâwi nan zawh le, chu lampi ah kal mi chu âukhawm an him dah lai lo.

⁹Mi tla nih, “Pathian nih hawng kan nehsawhtu lakah mi hawng kan hum lonâk a san tuah kan theih rawh. Chêu ah kal ding hen kan lungum le, sikhawmsele mûinâk lâwng a um le,

¹⁰mitchâw tla hâwi hen kanna dap. Zân ah mi hâwi hen sûn ah kanna suih le, laikulh thihnâk mûi ah um mi hâwi kan si.

¹¹Ningṭih kumza leh hamh hen kan um. Nehsawhnâk leh thil diklo lakah ruang hawng kan suah ding hen Pathian kan ngâi, sikhawmsele zeikhawm a hawng tlung lo.

¹²“LALPA, na lakah kan thilsual ti thungâi a tam. Kan sualnâk tla nih hawng kan phiar. Chubang tla lakah kan theihthiam.

¹³Na lakah kan hel le, kan nawng le, a nan zûl ding kan êl. Midang rangah kan nehsawh le, kâng dang leiah kan hawitâk. Kan thinlung dawn khawm a dik lo rawh, kan thusim tla khawm âwkrâwl asi.

¹⁴Diknâk chu nar ving asi le, diknâk nih hawng kan naih kho lo rawh. Zapi nâwngah thudik chu a um kho lo rawh, chunah chun zumhkâinâk nih mun a tawng lo.

¹⁵Zumhkâinâk chu a tâwm tuktarâi rawh ruangah, thilsual ti bângtâktu tla khawm nih anmah ngelchel dân buartu an si ti anna theih,” an ti. LALPA nih repnâk rerêng a um lo ti a muh le, â lâwm lo thlo.

¹⁶Nehsawh hen a um mi tla rangah ṭangpitu an um lo ti a muh le, thungâi chê a ti. Churuangah anmah ruangsuah na ding leh neh ding hen amah thiltikhonâk a mang lai.

¹⁷Repnâk chu râlthuam kawrdawh hâwi hen â ruk lai le, nehnâk chu lukhuh hâwi hen â khuh lai. Thil diktir ding duhnâk fâk tak hen â thuam lai le, diklo tak hen mi zapi tla phû lam hen a rêp na lai.

¹⁸Ram lât takah um mi tla sin tiang khawmah a mêlma tla chu an thilti zia hâwi vima hen a rêp na lai.

¹⁹Saklei thawk hen thlanglei tiang nih amah leh a thiltikhonâk rokual chu an ṭih lai. Tiva mi tî luang chak tak leh thli chawp tak hâwi hen a hawng lai.

²⁰LALPA nih a mi tla sinah, “Sualnâk kaltâktu zawzawng vêng na ding leh ruang an suah na ding hen Jerusalem ah ka hawng awt.

²¹Nan sinah thudântuk ka siam asi: Nan tâ si kumza ding hen ka thiltikhonâk leh sîntirnâk ka nan pêk na, tu thawk hen ka thu tla nan zâwt hen, nan fa tla leh nan thlâk tla tik a hawng um ding mi zawzawng lakah zûl kumza ding hen sîntir na u,” a ti.