Read Bawm Chin ISAI 63 Bible Online

ISAI 63 - Bawm Chin bible

ISAI 63

¹“Edom ram ah mi Bozrah khuapi thawk hen a hawng mi âu mesi? A sen hen â thuam ziar le, thiltikhonâk leh chaknâk hen a kal vima mi khi âu mesi?” “Ruangsuah ding hen LALPA thiltikho tak, a nehnâk thu phuang ding hen a hawng mi asi.”

²“Zeirangah uain siam ding hen grep sûrtu hâwi hen a nipuan a sen?”

³LALPA nih a sâng le, “Keimah nih phun tla chu grep hâwi hen ka chîl na le, pakhat khawm hawng ka ṭangpi ding hen an hawng lo. Ka thinthawknâk hen ka chîl na le, ka nipuan lakah an thî â buaih ver asi.

⁴Ka mi le tla ruangsuah ding hen ka ruat mi tik chu a tlung rawh; an mêlma tla rêp tik asi rawh.

⁵Ka zauh le, pakhat khawm hawng ka ṭangpitu an um lo ti ka muh hen thungâi chê ka ti asi. Sikhawmsele ka thinthawknâk nih hawng ka chaktir le, keimah nih nehnâk ka ting rawh.

⁶Ka thinthawknâk hen phun tla chu ka lamh na le, ka râwk na. An nungnâk thisen chu tual tlûnah ka thlêt,” a ti.

⁷LALPA dâwtnâk tlawlh dah lo ka sim lai le; Kan rangah thil a ti mi zawzawng ruangah amah chu ka sawr lai. A dâwtnâk leh khuaruatnâk dawnglo ruangah Israel mi tla chu cherkhet hen mal a sâwm na.

⁸LALPA nih, “Ka mi le an si; an ka perpet lai lo,” a ti. Churuangah an tuarnâk zawzawng lakah mi ruang a suah na.

⁹Anmah ruangsuah natu chu vânmifial asi lo, amah LALPA tak asi. A dâwtnâk leh a lungkhamnâk ruangah ruang a suah na mi asi. A lân khawmah a zauhkhenh kumza na le,

¹⁰sikhawmsele a lakah an hel le, a ngaih an siatir. Churawhchun LALPA chu an mêlma ah â chang le, a do na rawh.

¹¹Sikhawmsele a lânah Mosi, LALPA to-aw dam liau an theihkumza le, thu an deih, “Tuah a mi ruitu tla tipi lakah mi ruangsuahtu LALPA kha zeiah a um? Mosi sinah a thlarau pêktu LALPA kha zeiah a um?” ti hen.

¹²Mosi mang hen a thiltikhonâk rokual tak hen tipi tî a ṭhen phawk le, tî thûk tak lakah mi tla rui hen amah rangah zungzâl minthangnâk tawngtu LALPA kha zeiah a um? LALPA nih mâng ah mi rang hâwi hen kê a kal hen a rui na le, an tlû lêm lo.

¹⁴Belh no nâk mun tivakuam ah ran tla kalpi mi hâwi hen LALPA nih a mi tla chu dinhnâk a pêk na. LALPA nih a mi tla a rui na le, a min zahkâitirtu an si.

¹⁵LALPA, vân ah na umnâk thenhlimhnâk leh rokualnâk thawk hen hawng kan zauhnik. Kan rangah na kan ruatnâk zeiah a um rawh? Na thiltikhonâk zeiah a um? Na dâwtnâk leh lungkhamnâk zeiah a um? Hawng kan zauhtâu lah.

¹⁶Nang chu kan pa na si. Hawng kan thlâktu Abraham leh Jakob nih hawng kan theihpi lo le, sikhawmsele LALPA nang chu kan pa, ruang hawng kan suah kumzatu na si.

¹⁷Na lampi lakah mi zeirangah na kan vâitir? An hertâk ding hen zeirangah lungkhung tak hen hawng kan siam? Nangmah nâwl zulhtu tla leh na tâ si kumza mi tla zârah hawng kîr rawh.

¹⁸Kannih, na mi thenhlimh tla hi, kan mêlma tla nih zeimaw tiang chu hawng kan nar ving le; na mun thenhlimh tla an lamhbêk rawh.

¹⁹Kan lâirêltu na si dah lo mi hâwi hen, na mi tla kan si dah lo mi hâwi hen na kan ti.