Read Bawm Chin ISAI 64 Bible Online

ISAI 64 - Bawm Chin bible

ISAI 64

¹Zeirangah vân chu na thlêk zek hen na hawng ṭum lo? Tlâng sâng tla nih an muh lai le, lâu hen anna nîn lai.

²Mei lakah tî a tlawk mi hâwi hen an thir lai. Hawng le, na mêlma lakah na thiltikhonâk langh le, na mâika ah phun tla thirtir na.

³Na hawng kal liauah kan ruat lo hâwi tak hen thil ṭihnungkâi na ti mi tik tla a hawng um le; tlâng sâng tla nih an muh le, lâu hen anna nîn.

⁴A lakah an lungumnâk siahtu tla rangah chubang hâwi thil titu nangmah hâwi mi Pathian khawm nih an muh hen an theih lo.

⁵Thil dik ti hen lâwmnâk hâwltu leh nangmah duh dân hen um ding theihkumzatu tla chu na lawmh na. Kan lakah na thinthawk le, sikhawmsele kan sual vima rih; a lân thawk hen na thinthawknâk fâk tak na suah khawmah thil diklo kan ti nget rih.

⁶Kan ektê hen misual kan si; kan thilti ṭha chem khawm a nâwm mi hep asi. Kan sual ruangah thingnah a uai mi thli nih a sêm ving mi hâwi kan si.

⁷Âukhawm nangmah lei hawi hen thlachamtu an um lo; âukhawm ṭangpi duh hen na sinah an hawng lo. Kan sual ruangah kan lakah na thup le, na kan kaltâk.

⁸Sikhawmsele, LALPA, nang chu kan pa na si. Kannih chu sunhtlung valei hâwi kan si, nang chu bêl hêmtu hâwi na si. Nangmah siam mi kan si,

⁹churuang chun kan lakah na thinthawk tuktarâi lah le, kan sualnâk kan tlûnah siah kumza lah. Na mi tla kan si le; kan lakah khuaruat rawh.

¹⁰Na khuapi thenhlimh tla chu a karo hen a um: Jerusalem chu râwk dep hen a um,

¹¹kan Biakin, mun thenhlimh leh dawh tak, hawng kan thlâktu tla nih a nan sawrnâk chu mei hen râwk dep asi rawh. Mun kan duh tatak mi tla chu â râwk dep.

¹²LALPA, hi zawzawng thil tla nih a nan ninh lo nget rih ma? Zeikhawm ti tum lo hen kan tuar kho lo rê hen na maw na kan siam awt?